Exodo 40:1-38
40 Na ô maira Iehova ia Mose:
2 “I te mahana matamua o te avaˈe matamua, ia faatia oe i te sekene, te tiahapa o te amuiraa.+
3 A tuu i te afata o te Haamanaˈoraa i roto,+ e ei muri te Afata i te paruru.+
4 A tuu i te iri vairaa pane+ i roto, a faanaho i to nia iho, a tuu i te vairaa mori+ i roto e a faaama i te mori.+
5 I muri iho, a tuu i te fata auro no te mea noˈanoˈa+ i mua i te afata o te Haamanaˈoraa e a tamau i te paruai* no te tomoraa o te sekene.+
6 “A tuu i te fata no te tusia taauahi+ i mua i te tomoraa o te sekene, te tiahapa o te amuiraa,
7 a tuu i te tura i ropu i te tiahapa o te amuiraa e te fata e a tuu i te pape i roto.+
8 I muri iho, a faatia i te aua+ ati aˈe te sekene e a tamau i te paruai*+ no te tomoraa o te aua.
9 I muri iho, a rave i te monoˈi faatavai+ e ia faatavai i te sekene e te mau mea atoa i roto,+ e a haamoˈa i te reira e to ˈna mau taihaa atoa, ia riro te reira ei mea moˈa.
10 A faatavai i te fata no te tusia taauahi e to ˈna mau taihaa atoa e a haamoˈa i te fata, ia riro te reira ei fata moˈa roa.+
11 E a faatavai i te tura e to ˈna vairaa e a haamoˈa i te reira.
12 “I muri iho, a aratai ia Aarona e ta ˈna mau tamaiti i pihai iho i te tomoraa o te tiahapa o te amuiraa, e a horoi ia ratou i te pape.+
13 A faaoomo ia Aarona i te mau ahu moˈa+ e a faatavai ia ˈna+ e a haamoˈa ia ˈna, e e tavini oia ia ˈu ei tahuˈa.
14 I muri iho, a haafatata mai i ta ˈna mau tamaiti, e a faaoomo ia ratou i te ahu roa.+
15 A faatavai ia ratou mai ta oe i faatavai i to ratou metua tane,+ ia tavini hoi ratou ia ˈu ei tahuˈa, e na roto i to ratou faatavairaahia e vai noa ˈi ia ratou te autahuˈaraa e hope noa ˈtu to ratou mau uˈi.”+
16 Rave ihora Mose mai ta Iehova i faaue ia ˈna.+ Ua na reira iho â oia.
17 I te mahana matamua o te avaˈe matamua, i te piti o te matahiti, i faatiahia ˈi te sekene.+
18 I to Mose faatiaraa i te sekene, tuu ihora oia i raro i to ˈna mau niu,+ tamaumau ihora i te mau iri pǎpai,+ patia ihora i to ˈna mau raau tarava,+ e faatia aˈera i to ˈna mau pou.
19 Vauvau ihora oia i te tapoˈi+ na nia iho i te sekene, e tuu ihora i te tahi atu tapoˈi+ o te tiahapa na nia iho, mai ta Iehova iho â i faaue ia Mose.
20 I muri iho, rave ihora oia i te Haamanaˈoraa,+ tuu atura i roto i te Afata,+ patia ihora i na raau amoraa+ i roto i na potaa o te Afata e tuu ihora i te tapoˈi+ i nia iho i te Afata.+
21 Afai ihora oia i te Afata i roto i te sekene e tamau ihora i te paruru+ o te paruai e to muri mai te afata o te Haamanaˈoraa,+ mai ta Iehova iho â i faaue ia Mose.
22 I muri iho, tuu ihora oia i te iri vairaa pane+ i roto i te tiahapa o te amuiraa i te pae apatoerau o te sekene i rapaeau atu i te paruru,
23 e apǎpǎ ihora oia i na anairaa pane+ i nia iho i mua ia Iehova, mai ta Iehova iho â i faaue ia Mose.
24 Tuu ihora oia i te vairaa mori+ i roto i te tiahapa o te amuiraa i mua i te iri vairaa pane, i te pae apatoa o te sekene.
25 Faaama ihora oia i na mori+ i mua ia Iehova, mai ta Iehova iho â i faaue ia Mose.
26 I muri iho, tuu ihora oia i te fata auro+ i roto i te tiahapa o te amuiraa i mua i te paruru,
27 ia au auahi te mea noˈanoˈa i nia iho,+ mai ta Iehova iho â i faaue ia Mose.
28 I muri iho, tamau ihora oia i te paruai*+ no te tomoraa o te sekene.
29 Tuu ihora oia i te fata tusia taauahi+ i te tomoraa o te sekene, te tiahapa o te amuiraa, ia nehenehe oia e pûpû i te tusia taauahi+ e te tusia huero maa i nia iho, mai ta Iehova iho â i faaue ia Mose.
30 I muri iho, tuu ihora oia i te tura i ropu i te tiahapa o te amuiraa e te fata e tuu ihora i te pape i roto ei horoiraa.+
31 I reira Mose e o Aarona e ta ˈna mau tamaiti e horoi ai i to ratou rima e to ratou avae.
32 I te mau taime atoa e tomo ai ratou i roto i te tiahapa o te amuiraa aore ra e faafatata ˈtu ai i te fata, e horoi ratou i to ratou rima e to ratou avae,+ mai ta Iehova iho â i faaue ia Mose.
33 Faatia ˈtura oia i te aua+ ati aˈe te sekene e te fata, e tamau ihora i te paruai* no te tomoraa o te aua.+
Oti atura ïa taua ohipa ra ia Mose.
34 Tapoˈi ihora te ata i te tiahapa o te amuiraa, e î ihora te sekene i te hanahana o Iehova.+
35 Aita Mose i nehenehe e tomo i roto i te tiahapa o te amuiraa, no te mea te vai noa ra te ata i nia iho, e ua î te sekene i te hanahana o Iehova.+
36 E ia pee te ata mai nia mai i te sekene, e tatara te ati Iseraela i te mau fare ie i tera e tera vahi ta ratou e puhapa.+
37 Tera râ, ia ore te ata e pee, e ore ïa ratou e tatara i te mau fare ie e tae roa i te mahana e pee ai te ata.+
38 I te ao, to nia iho te ata a Iehova i te sekene, e i te po e auahi te vai noa i nia iho i mua i te aro o te nunaa taatoa o Iseraela i tera e tera vahi ta ratou e puhapa.+
Nota i raro i te api
^ Aore ra “paruru.”
^ Aore ra “paruru.”
^ Aore ra “paruru.”
^ Aore ra “paruru.”
