Ezekiela 24:1-27
24 I te iva o te matahiti, i te ahuru o te mahana o te ahuru o te avaˈe, tae faahou maira te parau a Iehova ia ˈu a na ô ai:
2 “Tamaiti a te taata, a tapao i teie taio mahana,* teie mahana. Ua haamata te arii o Babulonia i ta ˈna aroraa ia Ierusalema i teie mahana.+
3 E a faatia i te tahi parau paari* no nia i te nunaa orure hau, e a parau no ratou:
“‘Teie ta te Arii hau ê e Fatu ra o Iehova e parau ra:
“A tuu i te pani.* A tuu atu i nia i te auahi e a ninii i te pape i roto.+
4 A tuu atu i te inaˈi i roto,+ e inaˈi maitai anaˈe,Te huha e te avae mua. A faaî atu i te mau ivi maitai roa ˈˈe.
5 A rave i te mau mamoe maitai roa ˈˈe o te nǎnǎ,+ e a apǎpǎ i te mau tâpû raau i raro aˈe i te pani e ati aˈe.
A vaipâ i te reira, e a tunu i te mau ivi i roto.”’
6 “No reira, teie ta te Arii hau ê e Fatu ra o Iehova e parau ra:
‘Ua ati te oire haamanii toto,+ te pani tutae auri, tei ore i tamâhia te tutae auri!
A tatara hoê hoê mai i te mau inaˈi i roto,+ eiaha e tuu i te kelero no te reira.
7 To roto noa hoi ia ˈna te toto ta ˈna i haamanii,+ ua haamanii oia i te reira i raro noa i te mato.
Aita oia i haamanii i te reira i nia i te fenua, no te tapoˈi atu i te repo.+
8 Ia tupu to ˈu riri rahi no te tahooraa,Ua tuu vau i te toto o te feia ta ˈna i haapohe i nia noa i te mato anaanaIa ore te reira ia tapoˈihia.’+
9 “No reira, teie ta te Arii hau ê e Fatu ra o Iehova e parau ra:
‘Ua ati te oire haamanii toto!+
E faatia vau i te tahi apǎpǎraa vahie teitei.
10 A haapue i te mau tâpû raau e a tahu i te auahi,A vaipâ maitai i te inaˈi, a faarue i te pape inaˈi, e a vaiiho i te mau ivi ia paapaa roa.
11 A tuu i te pani aita e maa i roto i nia iho i te arahu ia veavea te reira,Ia uteute roa to ˈna veo no te veavea.
E tahe to ˈna viivii i roto ia ˈna,+ e e pau to ˈna tutae auri i te auahi.
12 Mea fiu e mea rohirohi,Eita hoi te tutae auri meumeu e matara.+
A taora ˈtu i te pani i roto i te auahi e to ˈna tutae auri!’
13 “‘Ua viivii oe no to oe haerea faufau.+ Ua tamata vau i te tamâ ia oe, aita râ oe i mâ i to oe viivii. Eita oe e mâ hou to ˈu riri rahi ia oe e pee ai.+
14 O vau iho, o Iehova, tei paraparau. E tupu te reira. E ohipa vau ma te ore e otohe, ma te ore e oto, ma te ore e tatarahapa.+ E haavahia oe ia au i to oe mau haerea e ta oe mau raveraa,’ te parau ra te Arii hau ê e Fatu ra o Iehova.”
15 Tae faahou maira te parau a Iehova ia ˈu, a na ô ai:
16 “Tamaiti a te taata, fatata vau i te rave ê i tei herehia e oe hoê noa tairiraa.+ Eiaha e oto.* Eiaha atoa e taˈi, eiaha atoa ia tahe to oe roimata.
17 A autâ mamû noa, e eiaha e haapao i te mau peu oto no tei pohe.+ A taamu i to oe taamu upoo,+ e a oomo i to oe tiaa.+ Eiaha e tapoˈi i to oe huruhuru utu,+ e eiaha e amu i te maa ta vetahi ê e afai mai na oe.”*+
18 Paraparau atura vau i te nunaa i te poipoi, e pohe ihora ta ˈu vahine faaipoipo i te ahiahi. Rave ihora ïa vau i te poipoi aˈe mai tei faauehia ia ˈu.
19 Te parau mai ra te nunaa ia ˈu: “Eita anei oe e faaite ia matou eaha ta matou ohipa i roto i teie mau mea ta oe e rave nei?”
20 Pahono atura vau ia ratou: “Ua tae mai te parau a Iehova ia ˈu, a na ô ai:
21 ‘A parau i te nunaa o Iseraela: “Teie ta te Arii hau ê e Fatu ra o Iehova e parau ra: ‘Fatata vau i te haaviivii i to ˈu nao,*+ te tumu e teoteo rahi ai outou, te mea faufaa roa no outou e ta to outou aau e hinaaro. Ta outou mau tamaiti e tamahine tei ore i haere mai na muri ia outou, e pohe ïa i te ˈoˈe.+
22 I reira outou e rave ai mai ta ˈu iho â i rave. Eita outou e tapoˈi i to outou huruhuru utu, e eita outou e amu i te maa ta vetahi ê e afai mai na outou.+
23 Ei nia i to outou upoo to outou taamu upoo, e ei nia i to outou avae to outou tiaa. Eita outou e oto aore ra e taˈi. E pê râ outou no ta outou mau hape,+ e e autâ outou te tahi i te tahi.
24 Ua riro Ezekiela ei tapao no outou.+ Mai ta ˈna iho â i rave, e na reira outou. Ua tupu anaˈe te reira, e ite outou o vau te Arii hau ê e Fatu ra o Iehova.’”’”
25 “E oe tamaiti a te taata, i te mahana e rave ê ai au i ta ratou mau pare, te mea nehenehe e oaoa ˈi ratou, te mea faufaa roa no ratou, ta to ratou aau e hinaaro, e ta ratou mau tamaiti e tamahine,+
26 na te tahi taata tei ora mai e faatia ia oe.+
27 I taua mahana ra, e hamǎmǎ oe i to oe vaha e e paraparau oe i tei ora mai, e ere oe mea vava faahou.+ E riro oe ei tapao no ratou, e e ite ratou o vau o Iehova.”
Nota i raro i te api
^ Heb: “te iˈoa o te mahana.”
^ Aore ra “faahohoˈaraa.”
^ Aore ra “pani auvaha rahi.”
^ Aore ra “e tupaipai i to oe ouma.”
^ Heb: “maa a te taata.”
