Ezekiela 26:1-21
26 I te 11 o te matahiti, i te mahana matamua o te avaˈe, tae maira te parau a Iehova ia ˈu a na ô ai:
2 “Tamaiti a te taata, no te mea ua parau Turia no Ierusalema:+ ‘Ua tano! Ua tupararihia te uputa o te mau nunaa!+ E haere te mau mea atoa na ǒ nei i ǒ ˈu, e e rahi atu â ta ˈu faufaa i teie nei ua haamouhia oia.’
3 No reira, teie ta te Arii hau ê e Fatu ra o Iehova e parau ra: ‘Teie au e aro nei ia oe, e Turia, e e faatae atu vau e rave rahi nunaa no te aro ia oe, mai te miti ia huri mai i to ˈna mau are.
4 E vavahi ratou i te mau patu o Turia e e huri ratou i to ˈna mau pare i raro.+ E paraˈu vau i te repo e e faariro vau ia ˈna ei ofai anaana e te vai ano.
5 E riro oia ei vahi taraˈiraa upeˈa i ropu i te moana.’+
“‘O vau hoi tei paraparau,’ te parau ra te Arii hau ê e Fatu ra o Iehova, ‘e e riro oia ei taoˈa haru na te mau nunaa.
6 E tairihia to ˈna mau oire* i te mataeinaa i te ˈoˈe, e e ite te taata o vau o Iehova.’
7 “Teie hoi ta te Arii hau ê e Fatu ra o Iehova e parau ra: ‘Teie au e faatae atu nei i te arii Nebukanesa o Babulonia e aro ia Turia na apatoerau mai.+ E arii oia no te mau arii,+ ma te puaahorofenua,+ te pereoo tamaˈi,+ te feia faahoro puaahorofenua e te nuu e rave rahi faehau.*
8 E haamou oia i to oe mau oire i te mataeinaa i te ˈoˈe, e faatia oia i te tahi patu ati aˈe, e hamani oia i te tahi puu repo e e faatia oia i te tahi aua paruru no te aro ia oe.
9 E vavahi oia i ta oe mau patu i ta ˈna mauhaa otuˈi,* e e huri oia i ta oe mau pare i raro i ta ˈna mau opahi.*
10 E rahi roa ta ˈna mau puaahorofenua a poˈi roa ˈi oe i te repo, e e aueue ta oe mau patu ia tomo oia i to oe mau uputa i te haruru o te feia faahoro puaahorofenua, te mau huira e te mau pereoo, mai te mau taata ia faura ˈtu i roto i te tahi oire ua marua to ˈna mau patu.
11 E taataahi te maiuu o ta ˈna mau puaahorofenua i ta oe mau aroâ atoa.+ E haapohe oia i to oe nunaa i te ˈoˈe, e e topa ta oe mau pou etaeta i raro.
12 E haruhia ta oe mau faufaa e ta oe mau taoˈa hoo,+ e hurihia ta oe mau patu i raro, e e vavahihia to oe mau fare nehenehe. I reira e taorahia ˈi ta oe mau ofai, ta oe mau taoˈa raau e ta oe repo i roto i te pape.’
13 “‘E faaore au i te reo o ta oe mau himene, e eita te taˈi o ta oe mau kinura e faaroo-faahou-hia.+
14 E faariro vau ia oe ei ofai anaana e te vai ano, e e riro oe ei vahi taraˈiraa upeˈa.+ E ore roa oe e patu-faahou-hia, o vau hoi, o Iehova, tei paraparau,’ te parau ra te Arii hau ê e Fatu ra o Iehova.
15 “Teie ta te Arii hau ê e Fatu ra o Iehova e parau ra ia Turia: ‘I te haruru o to oe toparaa, ia uuru te feia e pohe ra,* ia tupu te tahi taparahiraa taata i rotopu ia oe, eita anei te mau motu e aueue?+
16 Pauroa te huiarii* o te moana te pou mai nia mai i to ratou mau terono e te tatara i to ratou mau ahu roa* e to ratou mau ahu nira-faanehenehe-hia, e e rûrû ratou.* E parahi ratou i raro, e rûrû noa ratou e e hiˈo ratou ia oe ma te maere.+
17 E himene ratou i te tahi himene oto+ no oe e e na ô ratou:
“Auê hoi e, ua pohe oe,+ oe tei parahihia e te feia no te moana, te oire aruehia.I nia i te miti, mea puai oe* e te feia e parahi ra i ǒ oe,*+Mea mǎtaˈuhia e to te fenua atoa!
18 E aueue te mau motu i te mahana o to oe toparaa,E horuhoru te mau motu o te moana aita faahou anaˈe oe.”’+
19 “Teie hoi ta te Arii hau ê e Fatu ra o Iehova e parau ra: ‘Ia haamou vau ia oe mai te mau oire aita e taata, ia ninahia oe e au i te pape arepurepu e ia moˈe oe i te mau pape puai,+
20 e hopoi au ia oe e te feia e pou ra i te apoo* i te nunaa no mutaa iho ra. E haaparahi au ia oe i te vahi haehaa roa ˈˈe, mai te mau vahi no mutaa iho ra tei haamouhia, e te feia e pou ra i te apoo,+ ia ore oe ia parahihia e te taata. I reira vau e faateitei ai* i te fenua o te feia ora.
21 “‘E roohia oe i te riaria tupu taue, e aita faahou oe.+ E imihia oe, e ore roa râ oe e ite-faahou-hia,’ te parau ra te Arii hau ê e Fatu ra o Iehova.”
Nota i raro i te api
^ Heb: “ta ˈna mau tamahine.”
^ Heb: “nunaa.”
^ Aore ra “no te aro atu.”
^ Aore ra “ˈoˈe.”
^ Heb: “tei haapohehia.”
^ Aore ra “raatira.”
^ Aore ra “ahu aita e rima.”
^ Heb: “e ahuhia ratou i te rûrû.”
^ Heb: “oia.”
^ Heb: “i ǒ ˈna.”
^ Aore ra “menema.”
^ Aore ra “faaunauna ˈi.”
