Ezera 4:1-24
4 I to te mau enemi o Iuda e o Beniamina+ faarooraa e te patu ra te feia tei hoˈi mai na te hopoi-ê-raa+ i te hoê hiero no Iehova te Atua o Iseraela,
2 tapiri oioi maira ratou ia Zerubabela e te mau upoo o te mau utuafare, e parau maira: “A vaiiho ia matou ia patu na muri ia outou. Mai ia outou hoi, te haamori* ra matou i to outou Atua+ e i pûpû noa na matou i te tusia ia ˈna mai te mau mahana mai â o te arii Esarahadona+ no Asura, tei hopoi mai ia matou i ǒ nei.”+
3 Na ô atura râ Zerubabela, Iesua e te toea o te mau upoo o te mau utuafare o Iseraela: “Eita outou e apiti mai ia matou i roto i te paturaa i te hoê fare no to matou Atua.+ Na matou anaˈe e patu i te reira no Iehova te Atua o Iseraela, mai ta te arii Kuro no Peresia i faaue ia matou.”+
4 Tamau noa ˈtura ïa te mau taata o taua fenua ra i te faatoaruaru i* to Iuda e te haamǎtaˈu ia ratou ia faaea ratou i te patu.+
5 Tarahu aˈera ratou i te tahi mau taata aˈo no te haafifi i ta ratou mau opuaraa+ i te mau mahana atoa o te arii Kuro no Peresia tae roa i te faatereraa a te arii Dariu+ no Peresia.
6 I te haamataraa o te faatereraa a Ahasueru, papai aˈera ratou i te tahi pariraa i to Iuda e to Ierusalema.
7 E i te mau mahana o te arii Aretehasaseta no Peresia, papai aˈera Biselama, Miteredata, Tabeela e te toea o to ˈna mau apiti ia Aretehasaseta te arii. Ua hurihia te rata na roto i te reo Arama+ e ua papaihia na roto i te papairaa Arama.*
8 * Papai aˈera Rehuma te tia mana rahi raua Simisai te papai parau i te tahi rata faahaparaa ia Ierusalema i te arii Aretehasaseta, mai teie:
9 (No ǒ mai te rata ia Rehuma te tia mana rahi e ia Simisai te papai parau e te toea o to raua mau apiti, te mau haava e te mau tavana, te mau papai parau, to Ereka,+ to Babulonia, to Susa,+ oia hoi te ati Elama,+
10 e te toea o te mau nunaa ta Asenapera rahi e te faaturahia i hopoi ê e i haaparahi i te mau oire no Samaria,+ e te toea i te tuhaa fenua i tera ˈtu pae o te Anavai,* e teie nei
11 teie te rata ta ratou i faatae ia ˈna.)
“I te arii Aretehasaseta, to mau tavini, to te tuhaa fenua i tera ˈtu pae o te Anavai: E teie nei
12 ia ite te arii e ua tae mai te ati Iuda mai ia oe ra i Ierusalema nei. Te patu faahou ra ratou i te oire orure hau e te ino, e te faaoti ra ratou i te aua+ e te tataî ra i te mau niu.
13 Teie nei, ia ite te arii e ia patu-faahou-hia teie oire e ia oti to ˈna aua, eita ratou e horoa i te tute, te ô titauhia+ aore ra te tute ratere, e e riro te reira ei pau no te mau faufaa a te mau arii.
14 I te mea te amu ra matou i te miti papaa a te aorai* e e ere mea tano ia hiˈo noa ˈtu matou i te arii ia ere i ta ˈna mau faufaa, ua faatae atu ïa matou i teie rata no te faaara i te arii,
15 ia nehenehe e maimihia i roto i te buka o te mau pueraa parau o to oe mau tupuna.+ I roto i tera buka, e ite e e taa atoa ia oe e oire orure hau teie oire, e te atâta no te mau arii e te mau fenua. E i roto i taua oire ra, te vai ra tei faatupu i te faahuehueraa mai tahito mai â. No reira teie oire i haamouhia ˈi.+
16 Te faaite nei matou i te arii e ia patu-faahou-hia teie oire e ia oti to ˈna aua, aita faahou to oe e mana i nia* i te tuhaa fenua i tera ˈtu pae o te Anavai.”+
17 Faatae ihora te arii i te tahi parau ia Rehuma te tia mana rahi, ia Simisai te papai parau, te toea o to raua mau apiti e parahi ra i Samaria e te toea o te tuhaa fenua i tera ˈtu pae o te Anavai:
“Te aroha ˈtu nei au ia outou! E teie nei
18 ua taio-maitai-hia* i mua ia ˈu te rata ta outou i faatae mai.
19 E maimiraa tei ravehia na nia i ta ˈu faaueraa, e ua itehia mai e mai tahito mai â ua tia mai teie oire no te patoi i te mau arii, e ua tupu te orureraa hau e te faahuehueraa i reira.+
20 E arii mana tei tia mai i Ierusalema o tei faatere i te tuhaa fenua taatoa i tera ˈtu pae o te Anavai, e ia ratou ra i aufauhia ˈi te tute, te ô titauhia e te tute ratere.
21 Teie nei, a horoa i te tahi faaueraa ia faaea tera mau tane i te ohipa, ia ore te oire ia patu-faahou-hia tae roa i te taime e horoa ˈtu ai au i te tahi atu faaueraa.
22 A ara eiaha e haamoˈe i te na reira, ia ore te arii ia ere â i ta ˈna mau faufaa.”+
23 I muri iho i te taioraahia te parau mana a te arii Aretehasaseta i mua ia Rehuma, ia Simisai te papai parau e to raua mau apiti, haere oioi aˈera ratou i Ierusalema i te ati Iuda ra e faaohipa aˈera i te mauhaa tamaˈi no te tapea ia ratou.
24 I reira ïa te mauraa te paturaa o te hiero o te Atua i Ierusalema, e mau noa ˈtura te reira tae roa i te piti o te matahiti faatereraa a te arii Dariu no Peresia.+
Nota i raro i te api
^ Heb: “imi.”
^ Heb: “haaparuparu i te rima o.”
^ Huri-atoa-hia “Ua papaihia te reira na roto i te reo Arama, a hurihia ˈtu ai.”
^ Ua papaihia Ezr 4:8 tae roa 6:18 na roto i te reo Arama.
^ Oia hoi Eupharate.
^ Aore ra “no ǒ mai i te aorai ta matou moni ohipa.”
^ Ar: “aita ta oe e tuhaa.”
^ Huri-atoa-hia “ua hurihia e ua taiohia.”
