Ieremia 18:1-23
18 Teie te parau a Iehova tei tae mai ia Ieremia:
2 “A tia e a pou i te fare o te potera,+ e i reira vau e faaite ai ia oe i ta ˈu mau parau.”
3 Pou ihora ïa vau i te fare o te potera, e te ohipa ra oia i nia i ta ˈna mauhaa potera.
4 Te farii râ ta te potera e hamani ra i te araea, ua ino ïa i roto i to ˈna rima. Hamani faahou ihora ïa te potera i te reira ei farii ê atu, ia au iho â i te hohoˈa ta ˈna i hinaaro.*
5 E tae maira te parau a Iehova ia ˈu e na ô ra:
6 “‘Eita anei ta ˈu e nehenehe e rave ia outou mai ta teie potera i rave, e te nunaa o Iseraela?’ te parau ra Iehova. ‘Inaha, mai te araea i roto i te rima o te potera, o outou atoa ïa i roto i to ˈu rima, e te nunaa o Iseraela.+
7 Ia parau vau e iriti tumu, e huri i raro e e haamou vau i te tahi nunaa aore ra faatereraa arii,+
8 e ia haapae taua nunaa ra i to ˈna ino ta ˈu i faahapa, e taui atoa ïa vau i to ˈu manaˈo no nia* i te ati ta ˈu i opua e faatae i nia ia ratou.+
9 Ia parau râ vau e patu e e tanu vau i te tahi nunaa aore ra faatereraa arii,
10 e ia rave taua nunaa ra i te mea ino i to ˈu aro e ia ore e faaroo i to ˈu reo, e taui ïa vau i to ˈu manaˈo no nia* i te maitai ta ˈu i opua e rave no ratou.’
11 “I teie nei, a parau na i te mau taata no Iuda e tei parahi ra i Ierusalema: ‘Teie ta Iehova e parau ra: “Teie au e faaineine* nei i te tahi ati e e feruri nei e nafea ia faautua ia outou. A fariu ê mai na i ta outou mau ohipa ino, e a faatitiaifaro i to outou haerea e ta outou mau raveraa.”’”+
12 Ua parau râ ratou: “Aita e apî!+ E pee hoi matou i to matou iho mau manaˈo, e e haa matou tataitahi ia au i te etaeta o to matou aau ino.”+
13 Teie ïa ta Iehova e parau ra:
“A uiui na i te mau nunaa.
O vai tei faaroo i te parau mai teie?
E ohipa riaria mau â ta te tamahine apî* a Iseraela i rave.+
14 E moˈe anei te hiona mai nia mai i te mau taha mouˈa mato o Lebanona?
Aore ra e mǎrô anei te pape haumârû e tahe ra na te atea mai?
15 Ua haamoˈe râ to ˈu nunaa ia ˈu.+
Te pûpû ra hoi ratou i te tusia* i te tahi mea faufaa ore,+E te faaturori ra ratou i te taata e haere ra na nia i to ratou mau eˈa, te mau eˈa tahito,+Ia haere hoi ratou na te mau eˈa rii apoopoo e te manina ore,*
16 No te faariro i to ratou fenua ei riariaraa+E ei hioraa faaooo e a muri noa ˈtu.+
Pauroa te taata o te haere atu na reira, e hiˈo atu ïa ma te riaria e e tairiiri i to ratou upoo.+
17 Mai te mataˈi na hitia o te râ mai, e haapurara vau ia ratou i mua i te enemi.
E faaite atu vau ia ratou i to ˈu tua, eiaha to ˈu aro, i te mahana e roohia ˈi ratou i te ati.”+
18 E ua parau ratou: “Mai, feruri anaˈe i te tahi opuaraa ino ia Ieremia,+ e vai noa hoi te ture* i to tatou mau tahuˈa, te aˈoraa i te feia feruriraa paari e te parau i te mau peropheta. Mai, faaino anaˈe ia ˈna* e eiaha e haapao i ta ˈna e parau ra.”
19 A haapao mai ia ˈu, e Iehova,E a faaroo i ta to ˈu mau enemi e parau ra.
20 E faahoˈihia anei te maitai i te ino?
Ua ô hoi ratou i te tahi apoo no te rave i to ˈu ora.+
A haamanaˈo e i tia na vau i mua ia oe no te parau i te maitai no nia ia ratou,Ia fariu ê to oe riri rahi tahoo ia ratou.
21 No reira, a tuu atu i ta ratou mau tamarii i te oˈe,E a faarue atu ia ratou i te puai o te ˈoˈe.+
Ia faaerehia ta ratou mau vahine faaipoipo i te tamarii e ia riro ratou ei vahine ivi.+
Ia haapohehia ta ratou mau tane i te ati pohe,E ia tairihia ta ratou mau tane apî i te ˈoˈe i te aroraa.+
22 Ia faaroohia te tahi tuô no roto mai i to ratou mau fareIa faahaere taue mai oe i te feia haru taoˈa i nia ia ratou.
Ua ô hoi ratou i te tahi apoo no te haru ia ˈuE ua tuu ratou i te herepata no to ˈu avae.+
23 O oe râ, e Iehova,Ua ite maitai oe pauroa ta ratou opuaraa e haapohe ia ˈu.+
Eiaha e tapoˈi i ta ratou hape,Eiaha e tumâ i ta ratou hara mai mua ia oe.
Ia turori ratou i mua ia oe+I te taime e faautua ˈi oe ia ratou i roto i to oe riri.+
Nota i raro i te api
^ Heb: “ia au i tei tano i te mata o te potera ia hamani.”
^ Aore ra “e tatarahapa atoa ïa vau.”
^ Aore ra “e tatarahapa ïa vau.”
^ Heb: “hamani.”
^ Heb: “aita i taoto aˈenei i te tane.”
^ Aore ra “tusia au auahi.”
^ Aore ra “aita i faaîhia.”
^ Heb: “tairi anaˈe ia ˈna i te arero.”
^ Aore ra “haapiiraa.”
