Ieremia 25:1-38
25 Tae maira te parau a te Atua ia Ieremia no nia i te nunaa taatoa o Iuda i te maha o te matahiti faatereraa a Iehoiakima+ te tamaiti a Iosia, te arii o Iuda, i te matahiti matamua o te faatereraa a te arii Nebukanesa no Babulonia.
2 Teie ta Ieremia te peropheta i parau no nia i* te nunaa taatoa o Iuda e te taata atoa e parahi ra i Ierusalema:
3 “Mai te 13 o te matahiti faatereraa a Iosia+ te tamaiti a Amôna, te arii o Iuda, tae roa mai i teie mahana, a 23 ïa matahiti, ua tae mai te parau a Iehova ia ˈu, e ua paraparau noa â vau ia outou,* aita râ outou i faaroo.+
4 E ua tono Iehova i ta ˈna mau tavini atoa te mau peropheta ia outou, e ua tono noa â ia ratou,* aita râ outou i faaroo aore ra i fariu mai i to outou tariˈa no te faaroo.+
5 Ua parau ratou: ‘A fariu ê mai na outou tataitahi i to outou haerea ino e ta outou mau ohipa ino.+ E nehenehe ïa outou e parahi maoro i te fenua ta Iehova i horoa mea maoro aˈenei no outou e no to outou mau tupuna.
6 Eiaha e pee i te tahi atu mau atua, e tavini e e piˈo i mua ia ratou, a inoino atu ai au i te ohipa a to outou rima, aˈunei au e faatae ai i te ati i nia ia outou.’
7 “‘Aita râ outou i faaroo ia ˈu,’ te parau ra Iehova. ‘Ua faainoino râ outou ia ˈu i te ohipa a to outou rima, a roohia ˈtu ai outou i te ati.’+
8 “No reira, teie ta Iehova o te mau nuu* e parau ra: ‘“No te mea aita outou i faaroo i ta ˈu mau parau,
9 te titau nei au i te mau nunaa atoa no apatoerau,”+ te parau ra Iehova, “te titau nei au i te arii Nebukanesa no Babulonia, ta ˈu tavini,+ e e tono vau ia ratou e aro i teie fenua+ e te feia e parahi ra i reira e teie mau nunaa atoa ati aˈe.+ E faataa vau ia ratou no te haamouraa e e faariro vau ia ratou ei riariaraa, ei hioraa faaooo, e ei vahi ano e a muri noa ˈtu.
10 E faaore au mai reira mai i te tutuô o te popou e o te oaoa,+ te reo o te tane faaipoipo-apî-hia e te reo o te vahine faaipoipo-apî-hia,+ te maniania o te taviri huero maa e te maramarama o te mori.
11 E e riro teie fenua taatoa ei vahi ano e ei riariaraa, e ia tavini teie mau nunaa i te arii o Babulonia e 70 matahiti.”’+
12 “‘Ua hope anaˈe râ e 70 matahiti,+ e faautua vau i te arii o Babulonia e to ˈna nunaa no ta ratou hape,’+ te parau ra Iehova, ‘e e faariro vau i te fenua o te mau Kaladaio ei vahi ano e a muri noa ˈtu.+
13 E faatae au i nia i tera fenua i te mau parau atoa ta ˈu i parau no nia i te reira, pauroa tei papaihia i roto i teie buka ta Ieremia i tohu no nia i te mau nunaa atoa.
14 E rave rahi hoi nunaa e arii puai+ te faariro ia ratou ei tîtî no ratou,+ e e faahoˈi au i ta ratou ia au i ta ratou mau ohipa e ta to ratou rima i hamani.’”+
15 Teie hoi ta Iehova te Atua o Iseraela i parau ia ˈu: “A rave atu i teie auˈa uaina o te riri rahi tahoo i to ˈu rima, e a faainu i te reira i te mau nunaa atoa e tono ai au ia oe.
16 E e inu ratou, e peretete e e haa ratou mai te taata maamaa no te ˈoˈe ta ˈu e faatae nei no te tairi ia ratou.”+
17 Rave maira ïa vau i te hapaina i roto i te rima o Iehova e faainu atura vau i te reira i te mau nunaa atoa i tono ai Iehova ia ˈu:+
18 a haamata ˈi na Ierusalema e te mau oire o Iuda,+ to ˈna mau arii e to ˈna huiarii, no te faariro i te reira ei vahi ano, ei riariaraa, ei hioraa faaooo e ei ati,+ mai i teie nei mahana,
19 o Pharao te arii o Aiphiti i muri iho e ta ˈna mau tavini, to ˈna huiarii e to ˈna nunaa taatoa,+
20 e pauroa te taata ê e ora ra i to ratou fenua, pauroa te arii o te fenua o Ûza, pauroa te arii o te fenua o te mau Philiseti,+ Asekelona,+ Gaza, Ekerona e te feia e toe ra i Asadoda,
21 Edoma,+ Moabi+ e te ati Amona,+
22 pauroa te arii o Turia, pauroa te arii o Sidona+ e te mau arii o te motu i nia i te moana,
23 Dedana,+ Têma, Buza e te feia atoa ua tâpûhia te rouru tae roa i te aoao o te upoo,+
24 pauroa te arii o to Arabia+ e pauroa te arii o te mau nunaa rau e parahi ra i te medebara,
25 pauroa te arii o Zimeri, pauroa te arii o Elama+ e pauroa te arii o Medai,+
26 pauroa te arii no apatoerau, to pihai iho e to te atea, te tahi i muri iho i te tahi, e pauroa te tahi atu faatereraa arii o te ao nei e vai ra i nia i te fenua, e te arii Seseka*+ te inu i te reira i muri iho.
27 “E e parau oe ia ratou: ‘Teie ta Iehova o te mau nuu, te Atua o Iseraela, e parau ra: “A inu haapao taero, a pihaˈe e a topa ˈtu, a ore atu ai outou e nehenehe e tia mai+ no te ˈoˈe ta ˈu e faatae nei no te tairi ia outou.”’
28 E ia ore ratou e hinaaro e rave mai i te hapaina i to oe rima no te inu, a parau ia ratou: ‘Teie ta Iehova o te mau nuu e parau ra: “A inu, e faaueraa teie!
29 Inaha hoi, mai te peu e faatae au i te ati i nia i te oire tei mairihia i to ˈu iˈoa+ na mua, e ere ïa no te vaiiho noa ia outou ma te ore e faautuahia.”’+
“‘E faautuahia iho â outou, te titau nei hoi au i te hoê ˈoˈe no te tairi i te mau taata atoa o te fenua nei,’ te parau ra Iehova o te mau nuu.
30 “E e tohu oe i teie mau parau atoa ia ratou e e parau oe ia ratou:‘Mai nia mai e uuru ai Iehova,E mai to ˈna nohoraa moˈa mai e faaroohia ˈi to ˈna reo.
E uuru uˈana oia i nia i to ˈna faaearaa.
A tuô ai mai te feia e taataahi ra i te vine,E himene oia i te huro i te mau taata atoa o te fenua nei.’
31 ‘E maniania te haruru tae roa i te hopea o te fenua,E mârôraa hoi ta Iehova e te mau nunaa.
Na ˈna e haava i te mau taata atoa.+
E e tuu oia i te taata ino i te ˈoˈe,’ te parau ra Iehova.
32 Teie ta Iehova o te mau nuu e parau ra:
‘Inaha, e ati te purara ra i tera e tera nunaa,+E e tuuhia te hoê vero rahi mai te mau vahi atea roa ˈˈe o te fenua.+
33 “‘E te feia tei pohe ia Iehova i tera mahana, mai te hoê pae ïa haere roa i te tahi atu pae o te fenua. Eita ratou e otohia, eita atoa e haaputuputuhia e e hunahia. E riro ratou mai te pera i nia i te fenua.’
34 A auê, outou te mau tiai, e a tuô!
A taaviriviri na raro, outou te feia rahi o te nǎnǎ,No te mea ua tae mai te taime e haapohehia ˈi e e haapurarahia ˈi outou,E e topa outou mai te hoê auˈa moni rahi!
35 Aita e vahi no te mau tiai no te horo atu,E aita e hororaa to te feia rahi o te nǎnǎ.
36 A faaroo! Te tuô ra te mau tiaiE te auê ra te feia rahi o te nǎnǎ,Te haamou ra hoi Iehova i te vahi e amu ai ratou i te aihere.
37 E ua faarirohia te mau nohoraa hau ei vahi aita e oraNo te riri ura o Iehova.
38 Ua faarue oia i to ˈna tapuniraa mai te hoê liona apî,+Ua riro hoi to ratou fenua ei riariaraaNo te ˈoˈe ino mauE no to ˈna riri ura.”
Nota i raro i te api
^ Aore ra “i parau i.”
^ Heb: “ua tia noa vau i te poipoi roa e ua paraparau atu.”
^ Heb: “ua tia oia i te poipoi roa e ua tono atu.”
^ Aore ra “sabaota.”
^ E au ra o te tahi atu iˈoa o Babela (Babulonia).
