Ieremia 3:1-25
3 Te ui ra te taata: “Ia tuu ê te hoê tane i ta ˈna vahine faaipoipo e ia faarue mai oia ia ˈna a riro atu ai i te tahi atu tane, e hoˈi faahou anei te tane ia ˈna ra?”
Aita anei tera fenua i viivii roa?+
“Ua taiata oe e te tane e rave rahi,+E te hinaaro nei oe e hoˈi mai ia ˈu ra?” te parau ra Iehova.
2 “A hiˈo i te mau aivi ruperupe ore e a mataitai.
Teihea te vahi aita oe i taoto i te tane?*
Ua parahi oe na te hiti purumu a tiai ai i te tane,Mai te hoê ratere* i te medebara.
Te haaviivii noa nei oe i te fenuaI ta oe taiataraa e to oe ino.+
3 No reira te papape e tapeahia ˈi,+E eita te ûa hopea e topa.
E mata pateo* to oe mai to te hoê vahine faaipoipo e taiata ra.Aita oe na te haama.+
4 I teie nei râ, te pii mai ra oe ia ˈu:‘To ˈu Metua, o oe to ˈu hoa mai to ˈu apîraa mai!+
5 E inoino noa anei oe e a muri noa ˈtu?E tamau noa anei oe i te riri ia ˈu?’
Ta oe ïa e parau,Te tamau noa nei râ oe i te rave i te mau ohipa ino atoa ta oe e nehenehe e rave.”+
6 I te mau mahana a faatere ai te arii Iosia,+ parau maira Iehova ia ˈu: “‘Ua ite anei oe eaha ta Iseraela taiva i rave? Ua haere oia i nia i te mau mouˈa teitei atoa e i raro aˈe i te mau tumu raau ruperupe atoa no te taiata.+
7 I muri aˈe atoa i to ˈna raveraa i teie mau ohipa, ua parau noa vau ia ˈna ia hoˈi mai ia ˈu ra,+ aita râ oia i hoˈi mai. E ua hiˈo noa Iuda i to ˈna tuahine taiva.+
8 I to ˈu iteraa i te reira, tuu ê ihora vau ia Iseraela taiva na roto i te hoê parau faataaraa+ no to ˈna faaturiraa.+ Aita râ to ˈna tuahine taiva o Iuda i mǎtaˈu. Ua haere atoa oia e taiata.+
9 Ua manaˈo oia e ere ta ˈna taiataraa i te mea ino, e ua tamau oia i te haaviivii i teie fenua e i te faaturi e te ofai e te tumu raau.+
10 Noa ˈtu teie mau mea atoa, aita to ˈna tuahine taiva o Iuda i hoˈi mai ia ˈu ra ma to ˈna aau atoa, ma te haavarevare noa râ,’ te parau ra Iehova.”
11 Parau maira Iehova ia ˈu: “Mea parau-tia aˈe Iseraela taiva ia Iuda taiva.+
12 A haere e poro i teie mau parau i apatoerau:+
“‘“A hoˈi mai, e Iseraela taiva e,” te parau ra Iehova.’+ ‘“Eita vau e hiˈo riri* ia oe,+ e Atua taiva ore hoi au,” te parau ra Iehova.’ ‘“Eita vau e inoino e a muri noa ˈtu.
13 A faˈi noa mai ua hara oe, ua orure hau hoi oe ia Iehova to oe Atua. Ua tamau hoi oe i te taoto i te mau atua ěê i raro aˈe i te mau tumu raau ruperupe atoa, aita râ oe i auraro i to ˈu reo,” te parau ra Iehova.’”
14 “A hoˈi mai, outou te mau tamarii taiva,” te parau ra Iehova. “Ua riro hoi au ei fatu mau no* outou. E e rave au ia outou, hoê no roto mai i te hoê oire e e piti no roto mai i te hoê utuafare, e e aratai au ia outou i Ziona.+
15 E e horoa vau i te tiai mamoe no outou o te rave i to ˈu hinaaro,*+ e e faaamu ratou ia outou i te ite e te haroˈaroˈa.
16 E rahihia outou e to outou huaai i nia i te fenua i tera mau mahana,” te parau ra Iehova.+ “Eita ratou e parau faahou: ‘Te afata o te faufaa a Iehova!’ Eita te reira e manaˈohia, eita e haamanaˈohia aore ra e mihihia, e eita e hamani-faahou-hia.
17 I tera tau, e piihia Ierusalema te terono o Iehova.+ E pauroa te nunaa te putuputu no te arue i te iˈoa o Iehova i Ierusalema,+ e eita ratou e mârô faahou i te pee i to ratou iho aau ino.”
18 “I tera mau mahana e haere amui ratou, te nunaa o Iuda e te nunaa o Iseraela,+ e e haere amui mai ratou mai te fenua apatoerau mai i te fenua ta ˈu i horoa no to ratou mau tupuna ei tuhaa.+
19 E ua manaˈo vau: ‘Ia ˈu te oaoa i te faariroraa ia oe ei tamaiti e i to ˈu horoaraa i te fenua hinaarohia no oe, te tuhaa nehenehe roa ˈˈe i rotopu i te mau nunaa!’*+ Ua manaˈo atoa vau e pii mai oe ia ˈu: ‘To ˈu Metua!’ e eita oe e faaea i te pee mai ia ˈu.
20 ‘Oia mau mai te hoê vahine faaipoipo taiva e faarue i ta ˈna tane faaipoipo,* ua na reira atoa oe, e te nunaa o Iseraela, i te taivaraa ia ˈu,’+ te parau ra Iehova.”
21 Te faaroohia ra te hoê taˈi i nia i te mau aivi ruperupe ore,Te auê e te taparuparuraa a te nunaa o Iseraela,Ua haapiˈo hoi ratou i to ratou haerea.Ua haamoˈe ratou ia Iehova to ratou Atua.+
22 “A hoˈi mai, outou te mau tamarii taiva.
E rapaau vau i to outou feruriraa taiva.”+
“Teie matou! Ua haere mai matou ia oe ra,O oe hoi, e Iehova, to matou Atua.+
23 Oia mau, e haavare te mau aivi e te ahoaho i nia i te mau mouˈa.+
Oia mau, tei ia Iehova to matou Atua te faaoraraa o Iseraela.+
24 Ua pau râ ta to matou mau tupuna i rohi i te mea* haama mai to matou apîraa mai,+Ta ratou nǎnǎ mamoe e puaatoro,Ta ratou mau tamaiti e ta ratou mau tamahine.
25 Ia tarava matou i roto i to matou haama,E ia tapoˈi to matou haama ia matou,Ua hara hoi matou ia Iehova to matou Atua,+Matou e to matou mau metua mai to matou apîraa mai tae roa i teie mahana,+E aita matou i auraro i te reo o Iehova to matou Atua.”
Nota i raro i te api
^ Heb: “maferahia.”
^ Heb: “Arabia.”
^ Heb: “rae.”
^ Heb: “e faatopa i to ˈu aro i nia.”
^ Huri-atoa-hia “ei tane faaipoipo na.”
^ Heb: “o te haa ia au i to ˈu aau.”
^ Heb: “o te mau nuu o te mau nunaa.”
^ Heb: “to ˈna hoa.”
^ Aore ra “atua.”
