Ieremia 36:1-32
36 I te maha o te matahiti faatereraa a Iehoiakima+ te tamaiti a Iosia, te arii o Iuda, tae maira teie parau a Iehova ia Ieremia e na ô ra:
2 “A rave i te tahi otaro* e a papai i nia iho pauroa te parau ta ˈu i parau ia oe no nia ia Iseraela, ia Iuda+ e te mau nunaa atoa,+ mai te mahana matamua mai â i paraparau ai au ia oe i te mau mahana a faatere ai Iosia tae roa mai i teie mahana.+
3 Peneiaˈe ia faaroo to te nunaa o Iuda pauroa te ati ta ˈu e opua ra e faatae i nia ia ratou, e fariu ê mai ratou i to ratou haerea ino, a nehenehe atu ai au e faaore i ta ratou hape e ta ratou hara.”+
4 Titau ihora Ieremia ia Baruka+ te tamaiti a Neria, e faahiti atura Ieremia pauroa te parau ta Iehova i parau ia ˈna, e papai ihora Baruka i te reira i roto i te otaro.*+
5 Faaue atura Ieremia ia Baruka: “Ua tapeahia vau e eita ta ˈu e nehenehe e tomo i roto i te fare o Iehova.
6 Na oe ïa e tomo atu i roto e e taio haapuai i te mau parau a Iehova ta ˈu i faahiti ia oe e ta oe i papai i roto i te otaro. A taio i te reira i te fare o Iehova i te tahi mahana haapaeraa maa i mua i to reira mau taata atoa, tae noa ˈtu te mau taata atoa no Iuda tei haere mai na to ratou mau oire mai.
7 Peneiaˈe e faaroo Iehova i ta ratou aniraa i ta ˈna farii maitai, e e fariu ê mai ratou tataitahi i to ratou haerea ino, mea uˈana hoi to Iehova riri e riri rahi tahoo i teie nunaa.”
8 Rave ihora ïa Baruka te tamaiti a Neria pauroa ta Ieremia te peropheta i faaue ia ˈna. Ua taio haapuai oia i te mau parau a Iehova i roto i te otaro* i te fare o Iehova.+
9 I te pae o te matahiti faatereraa a Iehoiakima+ te tamaiti a Iosia, te arii o Iuda, i te iva o te avaˈe, haapae aˈera pauroa te taata o Ierusalema e pauroa te taata o te mau oire o Iuda tei tae mai i Ierusalema, i te maa i mua ia Iehova.+
10 Taio haapuai atura Baruka i te mau parau a Ieremia i roto i te otaro* i mua i te mau taata atoa i te fare o Iehova, i roto i te piha o* Gemaria+ te tamaiti a Saphana+ te papai parau, i te aua i nia ˈˈe, i te tomoraa o te uputa apî o te fare o Iehova.+
11 I to Mikaia te tamaiti a Gemaria te tamaiti a Saphana faarooraa i te mau parau atoa a Iehova i roto i te otaro,*
12 pou ihora oia i te aorai* o te arii, i te piha o te papai parau. Te parahi ra i reira pauroa te huiarii:* Elisama+ te papai parau, Delaia te tamaiti a Semaia, Elenatana+ te tamaiti a Akabora,+ Gemaria te tamaiti a Saphana, Zedekia te tamaiti a Hanania e te tahi atu huiarii atoa.
13 Faaite atura Mikaia ia ratou i te mau parau atoa ta ˈna i faaroo i to Baruka taioraa i te otaro* i mua i te taata.
14 Tono aˈera ïa pauroa te huiarii ia Iehudi te tamaiti a Netania te tamaiti a Selemia te tamaiti a Kusi, ia Baruka ra no te parau: “A rave i te otaro ta oe i taio i mua i te taata e a haere mai.” Rave ihora ïa Baruka te tamaiti a Neria i te otaro e haere maira ia ratou ra.
15 Parau atura ratou ia ˈna: “A parahi mai na, e a taio haapuai mai i te otaro.” Taio ihora ïa Baruka i te reira ia ratou.
16 I to ratou iho â faarooraa i te mau parau atoa, hiˈo aˈera te tahi i te tahi ma te mǎtaˈu, e parau atura ia Baruka: “E faaite mau â matou i te arii i teie mau parau atoa.”
17 E ui atura ratou ia Baruka: “A faaite mai na mea nafea to oe papairaa i teie mau parau atoa. Na Ieremia anei i faahiti atu ia oe?”
18 Pahono maira Baruka ia ratou: “E, na ˈna i faahiti mai ia ˈu i teie mau parau atoa, e na ˈu i papai i te reira i te inita i nia i teie otaro.”*
19 Parau atura te huiarii ia Baruka: “A haere a tapuni, orua Ieremia, e eiaha e faaite i te taata teihea orua.”+
20 Vaiiho aˈera ratou i te otaro i roto i te piha o Elisama te papai parau, haere aˈera i ǒ te arii, i roto i te aua, e faaite atura ia ˈna pauroa te parau ta ratou i faaroo.
21 Tono ihora ïa te arii ia Iehudi+ e tii i te otaro e rave maira Iehudi i te reira i roto i te piha o Elisama te papai parau. Taio ihora Iehudi i te reira i mua i te arii e pauroa te huiarii e tia noa ra i pihai iho i te arii.
22 Tei te iva ïa o te avaˈe.* Te parahi ra te arii i roto i te fare no te tau toˈetoˈe, a ama noa ˈi te auahi i roto i te tahuraa i mua ia ˈna.
23 Ua oti anaˈe ia Iehudi i te taio e toru aore ra e maha tuhaa, e tâpû te arii i taua mau tuhaa ra i te tipi a te papai parau, a taora ˈtu ai i roto i te auahi e ama ra i roto i te tahuraa, haapao pau roa te otaro taatoa i roto i te auahi.
24 E aita te arii e aita atoa ta ˈna mau tavini atoa i mǎtaˈu noa ˈˈe i to ratou faarooraa i teie mau parau atoa, e aita ratou i hahae i to ratou ahu.
25 Ua taparu Elenatana,+ Delaia+ e Gemaria+ i te arii eiaha e tutui i te otaro, aita râ oia i faaroo ia ratou.
26 Hau atu â, faaue ihora te arii ia Ierameela te tamaiti a te arii, ia Seraia te tamaiti a Azeriela e ia Selemia te tamaiti a Abedeela e haere e haru ia Baruka te papai parau e ia Ieremia te peropheta. Ua faatapuni noa râ Iehova ia raua.+
27 I muri iho i to te arii tutuiraa i te otaro to nia iho te mau parau ta Ieremia i faahiti e ta Baruka i papai, tae faahou maira te parau a Iehova ia Ieremia+ e na ô ra:
28 “A rave i te tahi atu otaro e a papai i nia iho pauroa te parau tei papaihia i nia i te otaro matamua, ta Iehoiakima te arii o Iuda i tutui.+
29 E e parau oe no Iehoiakima te arii o Iuda: ‘Teie ta Iehova e parau ra: “Ua tutui oe i teie otaro e ua parau oe: ‘Eaha oe i papai ai i nia iho: “E haere mai iho â te arii o Babulonia e haamou i teie fenua, a ore atu ai e taata e e animara faahou”?’+
30 Teie ïa ta Iehova e parau ra no Iehoiakima te arii o Iuda: ‘Aita hoê aˈe o to ˈna huaai e parahi i nia i te terono o Davida,+ e e vaiiho-noa-hia to ˈna tino pohe i te âhu ia ao e i te toˈetoˈe ia po.+
31 E faautua vau ia ˈna, to ˈna huaai e ta ˈna mau tavini no ta ratou hape, e e faatae au i nia ia ratou, i nia i te feia e parahi ra i Ierusalema e i nia i te mau taata no Iuda pauroa te ati ta ˈu i parau e faatae i nia ia ratou,+ no te mea aita ratou i faaroo.’”’”+
32 Rave ihora ïa Ieremia i te tahi atu otaro e horoa ˈtura ia Baruka te tamaiti a Neria, te papai parau.+ E faahiti atura Ieremia pauroa te parau o te otaro* ta Iehoiakima te arii o Iuda i tutui+ e papai ihora Baruka i te reira. E mea rahi atu â te parau mai tera te huru tei faaôhia mai.
Nota i raro i te api
^ Heb: “otaro o te tahi buka.”
^ Heb: “otaro o te buka.”
^ Aore ra “buka.”
^ Aore ra “buka.”
^ Aore ra “piha tamaaraa a.”
^ Aore ra “buka.”
^ Aore ra “tia mana.”
^ Heb: “fare.”
^ Aore ra “buka.”
^ Aore ra “buka.”
^ Te afaraa o Novema tae roa i te afaraa o Titema. Hiˈo i te tuhaa hau B15.
^ Aore ra “buka.”
