Ieremia 4:1-31
4 “Ia hoˈi mai oe, e Iseraela,” te parau ra Iehova,“Ia hoˈi mai oe ia ˈu raE ia faaore oe i ta oe mau idolo faufau mai mua ia ˈu,Eita ïa oe e riro ei overe.+
2 E ia horeo oe ma te parau mau, te afaro e te parau-tia:‘Te horeo nei au i te ora o Iehova!,’E roaa ïa i te mau nunaa te hoê haamaitairaa na roto ia ˈna,E e haapeu ratou ia ˈna.”+
3 Teie hoi ta Iehova e parau ra i to Iuda e tei parahi ra i Ierusalema:
“A arote no outou i te fenua e nehenehe e faaapuhia,E a faaea i te ueue i te huero maa na roto i te raau taratara.+
4 A peritome ia outou no Iehova,E a faaore i te iri i mua o to outou aau,+Outou to Iuda e tei parahi ra i Ierusalema,Eita ïa to ˈu riri rahi tahoo e ura mai te auahiA ama noa ˈi e aita e taata no te tupohe,No ta outou mau ohipa ino.”+
5 A faaite i te reira i Iuda e a poro i te reira i Ierusalema.
A tuô e a faaoto i te pu tara na teie fenua atoa.+
A pii ma te reo puai a na ô ai: “A haaputuputu mai,E e horo ê anaˈe i roto i te mau oire auahia i te patu.+
6 A faatia i te tahi tapao* e faaite ra i te eˈa e tae ai i Ziona.
A imi i te haapuraa, e eiaha e faaea noa,”
Te faahaere mai ra hoi au i te ati na apatoerau mai,+ e ati rahi.
7 Ua faura mai te enemi mai te hoê liona no roto i te uru aihere.+Te haere ra tei haamou ra i te mau nunaa.+
Ua faarue oia i to ˈna vahi no te faariro i to oe fenua ei riariaraa.
E faaanohia to oe mau oire, e aita faahou e taata i reira.+
8 No reira, a oomo i te ahu oto,+A oto* e a auê,No te mea aita te riri ura o Iehova i fariu ê ia tatou.
9 “I tera mahana,” te parau ra Iehova, “e toaruaru te aau o te arii,*+Oia atoa te aau o te huiarii.*E mehameha te mau tahuˈa, e e hitimahuta te mau peropheta.”+
10 Parau atura vau: “Auê te Arii hau ê e Fatu ra o Iehova! Ua haavarevare mau â oe i teie nunaa+ e tei parahi ra i Ierusalema, a na ô ai: ‘E fanaˈo outou i te hau,’+ tei raro aˈe râ te ˈoˈe i to matou arapoa.”
11 I taua tau ra, e parauhia i teie nunaa e to Ierusalema:
“E mataˈi veavea na te mau aivi ruperupe ore o te medebaraTe farara i nia i te tamahine* a to ˈu nunaa,E ere no te hue i te huero maa i nia aore ra no te tamâ i te reira.
12 I ta ˈu faaueraa e farara mai ai te mataˈi puai na tera mau vahi.
I teie nei, e faaite au i te mau faautuaraa i nia ia outou.
13 Inaha, e haere mai te enemi mai te ata poiri,E mai te mataˈi vero to ˈna mau pereoo.+
Mea vitiviti aˈe ta ˈna mau puaahorofenua i te aeto.+
Ua ati tatou, ua pau hoi tatou!
14 A tamâ i to oe aau no te iriti ê i te ino, e Ierusalema, ia faaorahia oe.+
Ehia â maororaa e tapea noa ˈi oe i te manaˈo ino?
15 E reo hoi te faaara ra i te parau apî mai Dana mai,+E te faaite ra i te ati mai te mau mouˈa o Epheraima mai.
16 A faaite i te reira, oia mau, i te mau nunaa.A poro i te reira ia Ierusalema.”
“E tiai* te haere mai ra na te hoê fenua atea mai,E e huro ratou i te mau oire o Iuda.
17 E haaati ratou ia ˈna na te mau vahi atoa mai te mau tiai o te tahi faaapu,+No te mea ua orure hau oia ia ˈu,”+ te parau ra Iehova.
18 “E faaruru oe i te faahopearaa o to oe haerea e ta oe mau ohipa.+
Mea ino mau â to oe ati,E raea roa hoi to oe aau i te reira!”
19 Auê au i te ahoaho,* auê au i te ahoaho!
E mauiui rahi to roto i to ˈu mafatu.
Te otuˈituˈi puai ra to ˈu mafatu i roto ia ˈu.
Eita ta ˈu e nehenehe e mamû noa,Ua faaroo hoi au* i te oto o te pu,Te faaararaa tamaˈi.*+
20 E ati e e ati â tei faaroohia,Ua mou hoi teie fenua taatoa.
Ua mou taue to ˈu mau fare ie,Ta ˈu mau ie+ mai te amoraa mata.
21 Ehia â maororaa e ite noa ˈi au i te tapao,*E faaroo noa ˈi au i te oto o te pu tara?+
22 “Mea maamaa hoi to ˈu nunaa.+Eita ratou e tâuˈa mai ia ˈu.
E tamarii haapao ore ratou, o te ore e feruri.
Mea maramarama ratou no te rave i te ohipa ino,No te rave râ i te mea maitai, aita ïa ratou i ite.”
23 Hiˈo ihora vau i to ratou fenua, e inaha te vai ano ra e aita e taata.+
Hiˈo ihora vau i te raˈi, e aita faahou to ˈna maramarama.+
24 Hiˈo ihora vau i te mau mouˈa, e inaha te aueue ra,E te faaaueuehia ra te mau aivi.+
25 Hiˈo ihora vau, e inaha aita hoê aˈe taata,E ua maue ê pauroa te manu o te raˈi.+
26 Hiˈo ihora vau, e inaha ua riro teie fenua faaapu maa hotu ei medebara,E ua vavahihia pauroa to ˈna oire.+
O Iehova te tumu,No to ˈna riri ura.
27 Teie hoi ta Iehova e parau ra: “E riro teie fenua taatoa ei vahi ano,+Eita râ vau e faaore roa i te reira.
28 No reira teie fenua e oto ai,+E te raˈi i nia e haapoiri ai,+
No te mea ua parau vau, ua faaoti au,E eita vau e taui i te manaˈo,* eita atoa vau e hoˈi mai i muri.+
29 I te maniania a te feia faahoro puaahorofenua e te feia teˈa,E horo pauroa to te oire.+
E tapuni ratou i roto i te uru aihere,E e pauma ratou i nia i te mau mato.+
Pauroa te oire tei faaruehia,E aita e taata e parahi i reira.”
30 I teie nei ua ano oe, eaha ïa ta oe e rave?
I oomo na oe i te ahu uteute,I faanehenehe na ia oe i te taoˈa faaunauna auro,E i parai na i to oe mata i te peni ereere.
Aita râ e faufaa to oe faaneheneheraa ia oe,+Ua faaruehia hoi oe e te feia e hinaaro e taoto ia oe.Te imi ra ratou i teie nei i te haapohe ia oe.+
31 Ua faaroo hoi au i te taˈi mai ta te tahi vahine maˈi,Te ahoaho mai to te tahi vahine e fanau ra i ta ˈna tamarii matahiapo,Te reo o te tamahine o Ziona te mure noa ra to ˈna aho.
Te parau ra oia a hohora ˈi oia i to ˈna apu rima:+
“Ua ati au, ua rohirohi roa hoi au* no te feia haapohe!”
Nota i raro i te api
^ Aore ra “pou tapao.”
^ Aore ra “A tupaipai i to outou ouma.”
^ Aore ra “E ere atoa te huiarii i te itoito.”
^ Aore ra “e ere te arii i te itoito.”
^ E faahohoˈaraa pehepehe no te faaite paha i te aroha aore ra te aumauiui.
^ Heb: “feia hiˈopoa,” oia hoi te feia o te hiˈopoa i te oire no te faaoti eaha te taime e aro ai.
^ Heb: “to ˈu aau.”
^ Huri-atoa-hia “umere tamaˈi.”
^ Aore ra “pou tapao.”
^ Aore ra “tatarahapa.”
