Ieremia 40:1-16
40 Tae maira te parau a Iehova ia Ieremia i muri iho i to Nebuzaradana+ te raatira o te mau tiai vaiihoraa ia ˈna ia haere na Rama+ mai. I afai na Nebuzaradana ia Ieremia i reira ma te rima taamuhia i te fifi, e to rotopu Ieremia i te feia atoa o Ierusalema e o Iuda tei hopoi-ê-hia i Babulonia.
2 Rave ihora te raatira o te mau tiai ia Ieremia e parau atura: “Ua tohu Iehova to oe Atua i teie ati i nia i teie vahi,
3 e ua faatae mai Iehova i te reira mai ta ˈna iho â i parau, no te mea ua hara outou ia Iehova e aita outou i faaroo i to ˈna reo. No reira outou i roohia ˈi i te reira.+
4 I teie mahana, e tatara vau i te mau fifi i nia i to oe rima. Mai te peu i to oe manaˈo mea maitai ia haere mai oe na muri ia ˈu i Babulonia, a haere mai ïa, e na ˈu e aupuru ia oe. Mai te peu râ eita oe e hinaaro e haere mai na muri ia ˈu i Babulonia, eiaha ïa e haere mai. A hiˈo! To mua ia oe teie fenua taatoa. A haere i te vahi ta oe e maiti.”+
5 Hou râ Ieremia a faaoti ai e hoˈi, parau atura Nebuzaradana: “A hoˈi ia Gedalia+ ra te tamaiti a Ahikama+ te tamaiti a Saphana,+ ta te arii o Babulonia i faatoroa i nia i te mau oire o Iuda, e a faaea ˈtu ia ˈna ra i rotopu i te huiraatira. Aita ra, a haere ïa i te vahi ta oe e maiti.”
Horoa ˈtura te raatira o te mau tiai i te tahi maa na ˈna e te tahi ô, e vaiiho atura ia ˈna ia haere.
6 Haere atura ïa Ieremia ia Gedalia ra te tamaiti a Ahikama i Mizepa,+ e faaea ˈtura ia ˈna ra i rotopu i te huiraatira tei vaiihohia i te fenua o Iuda.
7 I muri aˈe, faaroo aˈera pauroa te raatira nuu i rapae i te oire e ta ratou mau faehau e i faatoroa na te arii o Babulonia ia Gedalia te tamaiti a Ahikama i nia i te fenua o Iuda e i faatoroa na oia ia ˈna i nia i te mau tane, vahine e tamarii i rotopu i te feia veve o te fenua aita i hopoi-ê-hia i Babulonia.+
8 Haere maira ïa ratou ia Gedalia ra i Mizepa.+ O Isemaela+ te tamaiti a Netania, Iohanana+ e Ionatana na tamaiti a Karea, Seraia te tamaiti a Tanahumeta, na tamaiti a Ephai te taata Netopha, e Iezania+ te tamaiti a te taata Maakata, e ta ratou atoa mau faehau.
9 Horeo ihora Gedalia te tamaiti a Ahikama te tamaiti a Saphana ia ratou e ta ratou mau faehau, a na ô ai: “Eiaha e mǎtaˈu i te tavini i te mau Kaladaio. A ora i teie fenua e a tavini i te arii o Babulonia, e maitai ïa outou.+
10 O vau nei, i Mizepa vau e faaea ˈi no te tia ˈtu no outou i mua i te mau Kaladaio o te haere mai ia tatou nei. E haaputu râ outou i te uaina, te mau maa hotu o te tau auhune e te hinu e e tuu outou i te reira i roto i ta outou mau farii, e a parahi i te mau oire ta outou i rave.”+
11 Faaroo atoa aˈera pauroa te ati Iuda i Moabi, Amona e Edoma, oia atoa to te tahi atu mau fenua, e ua vaiiho te arii o Babulonia vetahi mau taata i Iuda e ua faatoroa oia ia Gedalia te tamaiti a Ahikama te tamaiti a Saphana i nia ia ratou.
12 Haamata aˈera ïa pauroa te ati Iuda na te mau vahi atoa i haapurarahia ˈi ratou i te hoˈi mai, e haere maira ratou i te fenua o Iuda, ia Gedalia ra i Mizepa. E haaputu aˈera ratou i te uaina e te maa hotu o te tau auhune e rave rahi roa.
13 Haere maira Iohanana te tamaiti a Karea e pauroa te raatira nuu no rapae mai i te oire ia Gedalia ra i Mizepa.
14 Parau maira ratou ia ˈna: “Aita anei oe i ite e ua tono mai Baalisa, te arii o te ati Amona,+ ia Isemaela te tamaiti a Netania no te haapohe ia oe?”+ Aita râ Gedalia te tamaiti a Ahikama i tiaturi ia ratou.
15 Parau omoˈe maira ïa Iohanana te tamaiti a Karea ia Gedalia i Mizepa: “Te hinaaro nei au e haere e haapohe ia Isemaela te tamaiti a Netania, e aita e taata e ite i te reira. No te aha e vaiiho ai ia ˈna ia haapohe ia oe, e no te aha e haapurarahia ˈi to Iuda taatoa o tei haaputuputu mai ia oe ra, e e pohe ai te toea o Iuda?”
16 Na ô atura râ Gedalia+ te tamaiti a Ahikama ia Iohanana te tamaiti a Karea: “Eiaha e na reira, e haavare hoi ta oe e parau ra no Isemaela.”
