Ieremia 42:1-22
42 Haere maira pauroa te raatira nuu, Iohanana+ te tamaiti a Karea, Iezania te tamaiti a Hosaia, e pauroa te huiraatira, te taata haihai tae noa ˈtu i te taata rahi
2 e parau ia Ieremia te peropheta: “A faaroo mai na i ta matou taparuparuraa, e a pure ia Iehova to oe Atua no matou, no teie feia atoa e toe ra, mea iti hoi te toe ra,+ mai ta oe e ite ra.
3 Ia faaite mai Iehova to oe Atua ia matou i te eˈa ia na reira matou i te haere e eaha ta matou e rave e tia ˈi.”
4 Pahono atura Ieremia te peropheta ia ratou: “Na reira ïa. E pure au ia Iehova to outou Atua mai ta outou e ani mai ra. E e faaite atu vau ia outou pauroa ta Iehova e parau ia outou. Eita vau e huna i te tahi parau ia outou.”
5 Parau maira ratou ia Ieremia: “Ei ite parau mau e te haapao maitai o Iehova o te faahapa ia matou ia ore matou e rave mai ta Iehova iho â to oe Atua e faaue ia matou na roto ia oe.
6 Noa ˈtu e au matou i ta ˈna pahonoraa aore ra eita, e faaroo matou i te reo o Iehova to matou Atua, ta matou e ani nei ia oe e uiui, ia maitai hoi matou, no te mea e faaroo matou i te reo o Iehova to matou Atua.”
7 Hoê ahuru mahana i muri iho, tae maira te parau a Iehova ia Ieremia.
8 Titau ihora ïa Ieremia ia Iohanana te tamaiti a Karea, pauroa te raatira nuu na muri ia ˈna, e pauroa te huiraatira, te taata haihai tae noa ˈtu i te taata rahi.+
9 Parau atura oia ia ratou: “Teie ta Iehova te Atua o Iseraela e parau ra, ta outou i ani mai ia ˈu e taparuparu no outou:
10 ‘Ia faaea mai iho â outou i teie fenua, e patu ïa vau ia outou e eita vau e vavahi ia outou, e e tanu vau ia outou e eita vau e iriti tumu ia outou, e tatarahapa hoi au i* te ati ta ˈu i faatae i nia ia outou.+
11 Eiaha e mǎtaˈu no te arii o Babulonia ta outou e mǎtaˈu ra.’+
“‘Eiaha e mǎtaˈu no ˈna aˈe,’ te parau ra Iehova, ‘tei pihai iho hoi au ia outou no te faaora ia outou e no te faatiamâ ia outou i to ˈna rima.
12 E e aroha hamani maitai au ia outou, e e aroha hamani maitai+ oia ia outou, a faahoˈi atu ai ia outou i to outou fenua.
13 “‘Ia na ô râ outou: “Eita, eita matou e faaea mai i teie fenua!” e ia faaroo ore outou i te reo o Iehova to outou Atua,
14 a na ô ai: “Eita, e haere râ matou i te fenua o Aiphiti,+ i ǒ, eita matou e ite i te tamaˈi, e faaroo i te oto pu tara, aore ra e ere i te faraoa, i ǒ matou e ora ˈi,”
15 a faaroo mai ïa i te parau a Iehova, outou te toea o Iuda. Teie ta Iehova o te mau nuu,* te Atua o Iseraela, e parau ra: “Mai te peu ua faaoti papu outou e haere i Aiphiti e e haere iho â outou e faaea* i ǒ,
16 e noaahia ïa outou i te ˈoˈe ta outou e mǎtaˈu i ǒ i te fenua o Aiphiti, e te oˈe ta outou e taiâ ra, e na muri atu ïa ia outou i Aiphiti, e i reira outou e pohe ai.+
17 Pauroa te taata tei faaoti e haere e faaea i Aiphiti, e pohe ïa i te ˈoˈe, te oˈe e te maˈi pee.* Aita hoê o ratou e ora ˈtu aore ra e ape i te ati ta ˈu e faatae i nia ia ratou.”’
18 “Teie hoi ta Iehova o te mau nuu, te Atua o Iseraela, e parau ra: ‘Mai to ˈu riri e to ˈu riri rahi tahoo ta ˈu i ninii i nia i tei parahi ra i Ierusalema,+ e ninii atoa ïa vau i to ˈu riri rahi tahoo i nia ia outou ia haere outou i Aiphiti, e e riro outou ei faainoraa, ei riariaraa, ei haamaraa e ei faaoooraa,+ e eita outou e ite faahou i teie vahi.’
19 “Ua paraparau Iehova ia outou, te toea o Iuda. Eiaha outou e haere i Aiphiti. Ia ite maitai outou e ua faaara vau ia outou i teie mahana
20 e e ere outou i to outou ora* no ta outou hape. Ua ani mai hoi outou ia ˈu ia taparuparu ia Iehova to outou Atua, a na ô ai: ‘A pure ia Iehova to matou Atua no matou, e a faaite mai ia matou pauroa ta Iehova to matou Atua e parau, e e na reira matou.’+
21 E ua faaite au ia outou i teie mahana i ta ˈna i parau, eita râ outou e faaroo i te reo o Iehova to outou Atua, eita atoa outou e rave i ta ˈna i faaue ia ˈu e parau ia outou.+
22 No reira, papu maitai i te ˈoˈe, te oˈe e te maˈi pee e pohe ai outou i te fenua ta outou e hinaaro ra e haere e faaea.”+
Nota i raro i te api
^ Aore ra “e oto hoi au no.”
^ Aore ra “sabaota.”
^ Aore ra “e faaea tau taime.”
^ Aore ra “maˈi.”
