Ieremia 43:1-13
43 Faaite atura Ieremia i te huiraatira taatoa pauroa teie parau a Iehova to ratou Atua, pauroa te parau ta Iehova to ratou Atua i faaue ia ˈna e faaite ia ratou. I te otiraa,
2 na ô maira Azaria te tamaiti a Hosaia, Iohanana+ te tamaiti a Karea, e pauroa te feia teoteo ia Ieremia: “E haavare ta oe e parau ra! Aita Iehova to matou Atua i faaue ia oe ia parau: ‘Eiaha e haere e faaea i Aiphiti.’
3 Na Baruka+ râ te tamaiti a Neria e parau ra ia oe ia paraparau ia matou mai tera, te hinaaro ra hoi oia ia topa matou i roto i te rima o te mau Kaladaio, ia pohe matou aore ra ia hopoi-ê-hia i Babulonia.”+
4 Faaroo ore aˈera ïa Iohanana te tamaiti a Karea, pauroa te raatira nuu e pauroa te huiraatira i te reo o Iehova a ore ai e faaea mai i te fenua o Iuda.
5 Rave aˈera râ Iohanana te tamaiti a Karea e pauroa te raatira nuu na muri ia ratou pauroa te toea o Iuda tei hoˈi mai na te mau nunaa atoa i haapurarahia ˈi ratou no te faaea i te fenua o Iuda.+
6 Rave aˈera ratou i te tane, te vahine, te tamarii, te mau tamahine a te arii, e te taata atoa ta Nebuzaradana+ te raatira o te mau tiai i vaiiho atu ia Gedalia+ ra te tamaiti a Ahikama+ te tamaiti a Saphana,+ ia Ieremia atoa te peropheta e ia Baruka te tamaiti a Neria.
7 E tomo aˈera ratou i te fenua o Aiphiti, aita hoi ratou i faaroo i te reo o Iehova, e haere roa ˈtura ratou i Tahapanehesa.+
8 Tae maira te parau a Iehova ia Ieremia i Tahapanehesa e na ô ra:
9 “A rave i te mau ofai rarahi i roto i to rima, e a huna i te reira i te tapiri araea i roto i te paˈepaˈe ofai araea i te tomoraa o te aorai o Pharao i Tahapanehesa, i mua i te ati Iuda.
10 E a parau ia ratou: ‘Teie ta Iehova o te mau nuu,* te Atua o Iseraela, e parau ra: “E tii au ia Nebukanesa te arii o Babulonia ta ˈu tavini,+ e e tuu vau i to ˈna terono i nia mau â i taua mau ofai ra ta ˈu i huna, e e faatia oia i to ˈna fare ie arii na nia iho i te reira.+
11 E e haere mai oia e e tairi oia i te fenua o Aiphiti.+ Tei faataahia no te ati pohe, no te ati pohe ïa, tei faataahia no te faatîtîraa, no te faatîtîraa ïa, e tei faataahia no te ˈoˈe, no te ˈoˈe ïa.+
12 E e tutui au i te mau fare* o te mau atua o Aiphiti,+ e na ˈna e tanina i te reira a hopoi tîtî atu ai i taua mau atua ra. E vehî oia ia ˈna i te fenua o Aiphiti, mai te hoê tiai mamoe o te vehî ia ˈna i to ˈna ahu, e e reva oia mai reira ˈtu ma te hau.*
13 E e vavahi oia i te mau pou* o Bete-semesa* i te fenua o Aiphiti, e e tanina oia i te mau fare* o te mau atua o Aiphiti.”’”
Nota i raro i te api
^ Aore ra “sabaota.”
^ Aore ra “hiero.”
^ Aore ra “ma te fifi ore.”
^ Aore ra “ofai roroa oeoe.”
^ Aore ra “Fare (Hiero) o te mahana,” oia hoi Heliopoli.
^ Aore ra “hiero.”
