Ieremia 44:1-30
44 Tae maira te parau a te Atua ia Ieremia no te ati Iuda atoa e parahi ra i te fenua o Aiphiti,+ tei parahi ra i Migadola,+ Tahapanehesa,+ Nopha*+ e i te fenua o Patarota,+ e na ô ra:
2 “Teie ta Iehova o te mau nuu,* te Atua o Iseraela, e parau ra: ‘Ua ite outou pauroa te ati ta ˈu i faatae i nia ia Ierusalema+ e i nia i te mau oire atoa o Iuda, e i teie mahana, ua ano te reira e aita e taata faahou i roto.+
3 No te mau ohipa ino ïa ta outou i rave no te faainoino ia ˈu, a haere ai outou e pûpû i te tusia+ e a tavini ai i te tahi atu mau atua aita outou i matau, outou e to outou mau tupuna.+
4 Ua tamau noa vau i te tono i ta ˈu mau tavini atoa te mau peropheta ia outou ra, a tono noa ˈi ia ratou,* a na ô ai: “Eiaha na outou e rave i teie ohipa hairiiri mea au ore roa na ˈu.”+
5 Aita râ outou i faaroo aore ra i fariu mai i to outou tariˈa no te fariu ê mai i to outou ino a pûpû ai outou i te tusia i te tahi atu mau atua.+
6 Ninii ihora ïa vau i to ˈu riri rahi tahoo e to ˈu riri i nia i te mau oire o Iuda e te mau aroâ o Ierusalema, a paapaa ˈtu ai te reira, e riro atura te reira ei vahi ano e te taata ore, mai i teie mahana.’+
7 “E teie ta Iehova te Atua o te mau nuu, te Atua o Iseraela, e parau ra: ‘Eaha outou e imi ai ia tae mai te ati rahi i nia ia outou,* a mou atu ai pauroa te tane e te vahine, te tamarii e te aiû, i Iuda, aita e taata e toe mai?
8 Eaha outou e faainoino ai ia ˈu i te mau ohipa a to outou rima i te pûpûraa i te tusia i te tahi atu mau atua i te fenua o Aiphiti i reira to outou haereraa e faaea? E mou outou, a riro atu ai outou ei faainoraa e ei haamaraa i rotopu i te mau nunaa atoa o te fenua nei.+
9 Ua moˈe anei ia outou te mau ohipa ino a to outou mau tupuna, te mau ohipa ino a te mau arii o Iuda,+ te mau ohipa ino a ta ratou mau vahine faaipoipo,+ tae noa ˈtu ta outou iho mau ohipa ino e te mau ohipa ino a ta outou mau vahine faaipoipo,+ tei ravehia i te fenua o Iuda e na te mau aroâ o Ierusalema?
10 Tae roa mai i teie mahana aita outou i faahaehaa ia outou,* aita i mǎtaˈu,+ aita atoa i haapao i ta ˈu ture e ta ˈu mau faatureraa ta ˈu i horoa ˈtu ia outou e to outou mau tupuna.’+
11 “No reira, teie ta Iehova o te mau nuu, te Atua o Iseraela, e parau ra: ‘Ua faaoti au e faatae i te ati i nia ia outou, no te haamou pauroa to Iuda.
12 E e rave ê au i te toea o Iuda tei faaoti e haere e faaea i te fenua o Aiphiti, e e mou ratou pauroa i te fenua o Aiphiti.+ E pohe ratou i te ˈoˈe e e mou ratou i te oˈe. Te taata haihai tae noa ˈtu i te taata rahi, e pohe ïa i te ˈoˈe e te oˈe. E e riro ratou ei faainoraa, ei riariaraa, ei haamaraa e ei faaoooraa.+
13 E faautua vau i te feia e parahi ra i te fenua o Aiphiti mai ia ˈu i faautua ia Ierusalema i te ˈoˈe, te oˈe e te maˈi pee.*+
14 E te toea o Iuda tei haere e faaea i te fenua o Aiphiti, eita ïa e ora ˈtu no te hoˈi i te fenua o Iuda. E hinaaro ratou e hoˈi e faaea i ǒ, eita râ ratou e hoˈi, vetahi noa râ taata tei ora mai.’”
15 Pauroa te tane tei ite e i pûpû na ta ratou mau vahine faaipoipo i te tusia i te tahi atu mau atua, pauroa te vahine faaipoipo e tia ra na reira, e pǔpǔ rahi hoi, e pauroa te taata e faaea ra i te fenua o Aiphiti,+ i Patarota,+ pahono maira ïa ia Ieremia:
16 “Eita matou e faaroo i ta oe i parau ia matou i te iˈoa o Iehova.
17 E rave mau â râ matou i ta to matou vaha atoa i parau, e pûpû i te tusia i te Arii vahine o te raˈi* e e ninii i te tusia uaina na ˈna,+ mai ta matou iho â, to matou mau tupuna, to matou mau arii e huiarii i rave i te mau oire o Iuda e na te mau aroâ o Ierusalema a pue ai ta matou maa e a ora maitai ai matou, aita roa ˈtu matou i roohia i te ati.
18 Mai te taime râ i faaea ˈi matou i te pûpû i te tusia i te Arii vahine o te raˈi* e i te ninii i te tusia uaina na ˈna, ere atura matou i te mau mea atoa e mou atura matou i te ˈoˈe e te oˈe.”
19 Na ô atoa maira te mau vahine: “E i to matou pûpûraa i te tusia i te Arii vahine o te raˈi* e niniiraa i te tusia uaina na ˈna, e ere anei ia au i te parau faatia a ta matou mau tane faaipoipo i hamani ai matou i te pane ia au i to ˈna hohoˈa no te pûpû atu ei tusia e i ninii ai matou i te tusia uaina na ˈna?”
20 Parau atura ïa Ieremia i te nahoa taatoa, te tane e ta ratou mau vahine faaipoipo e te feia atoa e paraparau ra ia ˈna:
21 “Te mau tusia ta outou, to outou mau tupuna, to outou mau arii, to outou huiarii e to te fenua, i pûpû i roto i te mau oire o Iuda e te mau aroâ o Ierusalema,+ ua haamanaˈo Iehova i te reira, aita i moˈe ia ˈna!
22 Aita ˈtura Iehova i faaoromai faahou i ta outou mau peu ino e te mau ohipa hairiiri ta outou i rave, e riro atura to outou fenua ei vahi ano, ei riariaraa, ei faainoraa, aita e taata faahou i reira, mai i teie mahana.+
23 Ua tae mai teie ati i nia ia outou, mai i teie mahana, no te mea ua pûpû outou i tera mau tusia e no te mea ua hara outou ia Iehova i te oreraa e faaroo i te reo o Iehova e te oreraa e pee i ta ˈna ture, ta ˈna mau faatureraa e ta ˈna mau haamanaˈoraa.”+
24 Parau atoa ˈtura Ieremia i te nahoa taatoa e i te mau vahine atoa: “A faaroo i te parau a Iehova, outou pauroa to Iuda e parahi ra i te fenua o Aiphiti.
25 Teie ta Iehova o te mau nuu, te Atua o Iseraela, e parau ra: ‘Ta to outou vaha e te vaha o ta outou mau vahine faaipoipo i parau, na to outou ïa rima i rave, ua parau hoi outou: “E tapea iho â matou i ta matou euhe, e pûpû i te tusia i te Arii vahine o te raˈi* e e ninii i te tusia uaina na ˈna.”+ Outou te mau vahine, e tapea iho â outou i ta outou euhe e e rave outou mai ta outou i euhe.’
26 “No reira, a faaroo mai i te parau a Iehova, outou pauroa to Iuda e parahi ra i te fenua o Aiphiti: ‘“Teie au e horeo nei i to ˈu iˈoa rahi,” te parau ra Iehova, “eita to ˈu iˈoa e faahiti-faahou-hia ia horeo te taata atoa no Iuda+ e parahi ra i te fenua taatoa o Aiphiti, a na ô ai: ‘Te horeo nei au i te Atua ora, te Arii hau ê e Fatu ra o Iehova!’+
27 I teie nei, to nia iho to ˈu mata ia ratou no te faatae i te ati eiaha râ te maitai.+ Pauroa to Iuda e parahi ra i te fenua o Aiphiti te mou i te ˈoˈe e te oˈe, haapao mou roa ratou.+
28 Te tahi noa te ora ˈtu i te ˈoˈe e te hoˈi i te fenua o Iuda na te fenua o Aiphiti mai.+ I reira ïa pauroa te toea o Iuda tei haere e faaea i te fenua o Aiphiti e ite ai ta vai te parau tei tupu: ta ˈu anei aore ra ta ratou!”’”
29 “‘E teie te tapao e ite ai outou e e faautua vau ia outou i teie vahi,’ te parau ra Iehova, ‘ia ite outou e e tupu iho â ta ˈu mau parau o te faaite ra i to outou ati:
30 Teie ta Iehova e parau ra: “E tuu vau ia Pharao Hophara te arii o Aiphiti i te rima o to ˈna mau enemi e o te feia e imi ra i te rave i to ˈna ora, mai ia ˈu i tuu ia Zedekia te arii o Iuda i te rima o Nebukanesa te arii o Babulonia, to ˈna enemi e imi ra i te rave i to ˈna ora.”’”+
Nota i raro i te api
^ Aore ra “Memephi.”
^ Aore ra “sabaota.”
^ Heb: “a tono ai ia ratou, a tia ˈi i te poipoi roa e a tono ai.”
^ Aore ra “tatarahapa.”
^ Aore ra “maˈi.”
^ Tiaraa o te hoê ruahine haamorihia e te ati Iseraela taiva. E ruahine paha o te faahapû i te mau vahine.
^ Tiaraa o te hoê ruahine haamorihia e te ati Iseraela taiva. E ruahine paha o te faahapû i te mau vahine.
^ Tiaraa o te hoê ruahine haamorihia e te ati Iseraela taiva. E ruahine paha o te faahapû i te mau vahine.
^ Tiaraa o te hoê ruahine haamorihia e te ati Iseraela taiva. E ruahine paha o te faahapû i te mau vahine.
