Ieremia 52:1-34
52 E 21 matahiti to Zedekia+ i to ˈna riroraa mai ei arii, e 11 matahiti to ˈna faatereraa i Ierusalema. O Hamutala+ te iˈoa o to ˈna metua vahine, e tamahine na Ieremia no Libena.
2 Ua rave noa oia i te mea ino i mua ia Iehova, mai ta Iehoiakima i rave.+
3 No to Iehova riri i tupu ai taua mau mea ra i Ierusalema e i Iuda, e tiahi roa ˈtu ai oia ia ratou mai mua i to ˈna mata.+ E orure hau atura Zedekia i te arii o Babulonia.+
4 I te iva o te matahiti faatereraa a Zedekia, i te ahuru o te mahana o te ahuru o te avaˈe, haere maira Nebukanesa te arii o Babulonia e ta ˈna nuu taatoa e aro ia Ierusalema. Puhapa aˈera ratou ati aˈe i te oire e faatia aˈera i te hoê aua haaatiraa.+
5 Haaatihia ihora te oire e tae roa i te 11 o te matahiti faatereraa a te arii Zedekia.
6 I te iva o te mahana o te maha o te avaˈe,+ mea ino te oˈe i roto i te oire, e aita e maa faahou no te taata o taua fenua ra.+
7 Faaapoohia ˈtura te patu o te oire, e horo ê aˈera te mau faehau atoa i te oire i te po na te uputa i ropu i na patu e piti i pihai iho i te ô o te arii, a haaati noa ˈi te mau Kaladaio i te oire. E haere noa ˈtura ratou na te eˈa e tae atu ai i te Araba.+
8 Tapapa ihora râ te nuu Kaladaio i te arii, e noaa maira Zedekia+ ia ratou i te mau vahi papu pâpâmǎrô o Ieriko. Purara ê ihora ta ˈna mau faehau atoa mai pihai iho ia ˈna.
9 Haruhia ˈtura te arii, arataihia maira oia i Ribela i te fenua o Hamata, i te arii o Babulonia ra, e faautua ˈtura oia ia ˈna.
10 E haapohe atura te arii o Babulonia i te mau tamaiti a Zedekia i mua i to ˈna mata, e haapohe atoa ˈtura oia pauroa te huiarii o Iuda i reira i Ribela.
11 Haapo ihora te arii o Babulonia i te mata o Zedekia,+ ponao ihora ia ˈna i te tapea veo, hopoi atura ia ˈna i Babulonia e tapea noa ˈtura ia ˈna i reira e pohe noa ˈtu oia.
12 I te ahuru o te mahana o te pae o te avaˈe, oia hoi i te 19 o te matahiti faatereraa a te arii Nebukanesa no Babulonia, tae maira Nebuzaradana te raatira o te mau tiai i Ierusalema.+ E tavini o ˈna na te arii o Babulonia.
13 Tutui ihora oia i te fare o Iehova,+ te aorai* o te arii, e te mau fare atoa o Ierusalema. Ua tutui atoa oia i te mau fare rarahi atoa.
14 Vavahi aˈera te nuu Kaladaio o tei na muri mai i te raatira o te mau tiai i te mau patu e haaati ra ia Ierusalema.+
15 Hopoi ê atura Nebuzaradana te raatira o te mau tiai vetahi taata rii o te nunaa e te feia i roto â i te oire. Ua hopoi atoa oia i te feia tei horo i te arii ra o Babulonia, e te toea o te mau rimaî aravihi.+
16 Vaiiho maira râ Nebuzaradana te raatira o te mau tiai vetahi o te mau taata veve roa ˈˈe o taua fenua ra no te tavini ei feia faaapu vine e ei feia rave i te ohipa titauhia.+
17 Vavahi ihora te mau Kaladaio i na pou veo+ o te hiero* o Iehova, te mau pereoo turairai+ e te Miti veo+ no roto mai i te hiero* o Iehova, e hopoi aˈera ratou pauroa te veo i Babulonia.+
18 Rave atoa aˈera ratou i te mau farii rehu, te mau ope, te mau paoti uiti, te mau auˈa,+ te mau hapaina+ e te mau taihaa veo atoa o tei faaohipahia no te taviniraa i te hiero.
19 Rave aˈera te raatira o te mau tiai i te mau farii pape rarahi,+ te mau farii auahi, te mau auˈa, te mau farii rehu, te mau mori avae,+ te mau hapaina e te mau auˈa hamanihia i te auro e te ario mau.+
20 No na pou e piti, te Miti, na 12 puaatoro veo+ i raro aˈe i te Miti e te mau pereoo turairai ta te arii Solomona i hamani no te hiero o Iehova, aita i tia ia faito i te teiaha o te veo o teie mau taoˈa.
21 No na pou, 18 kubiti* te teitei to te pou tataitahi, e ati te reira i te hoê taura faito 12 kubiti.+ E maha manimani* te meumeu o te veo, e mea apoopoo te reira.
22 E e veo te tapoˈi i nia iho. E pae kubiti te teitei to te tapoˈi tataitahi,+ e ua hamanihia te upeˈa e te mau remuna ati aˈe i te tapoˈi i te veo. Mai tera atoa te piti o te pou veo, oia atoa te mau remuna.
23 E 96 remuna na te hiti. Ia amuihia, 100 remuna ati aˈe te auri varavara.+
24 Hopoi tîtî atoa maira te raatira o te mau tiai ia Seraia+ te tahuˈa tiaau, ia Zephania+ te tahuˈa tauturu, e na toru tiai uputa.+
25 Rave maira oia mai roto mai i te oire hoê tia mana o tei tuuhia i nia i te mau faehau, e hitu taata aˈo piri roa i te arii, oia atoa te papai parau o te raatira o te nuu, o te titau i te mau faehau o taua fenua ra, e 60 taata rii atoa o taua fenua ra o tei itehia mai i roto i te oire.
26 Hopoi tîtî maira Nebuzaradana te raatira o te mau tiai ia ratou e afai aˈera ia ratou i te arii ra o Babulonia i Ribela.
27 Haapohe ihora te arii o Babulonia ia ratou i Ribela+ i te fenua o Hamata. Mea na reira to Iuda i te hopoi-ê-raahia mai to ˈna fenua mai.+
28 Teie te mau taata ta Nebukanesa i hopoi ê: i te hitu o te matahiti o ta ˈna faatereraa, e 3 023 ati Iuda.+
29 I te 18 o te matahiti faatereraa a Nebukanesa,+ e 832 taata tei hopoihia mai Ierusalema mai.
30 I te 23 o te matahiti faatereraa a Nebukanesa, e 745 taata ta Nebuzaradana te raatira o te mau tiai i hopoi ê, e ati Iuda.+
Ia amuihia, e 4 600 taata tei hopoi-ê-hia.
31 E i te 37 o te matahiti i hopoi-ê-hia ˈi Iehoiakina+ te arii o Iuda, i te 25 o te mahana o te 12 o te avaˈe, tuu maira Evile-merodaka te arii o Babulonia ia* Iehoiakina te arii o Iuda e faahaere maira ia ˈna i rapae i te fare tapearaa.+ Tei te matahiti ïa i riro ai Evile-merodaka ei arii.
32 Paraparau maira oia ia ˈna ma te hamani maitai e faateitei ihora i to ˈna terono i nia ˈˈe i to te tahi atu mau arii i pihai iho ia ˈna i Babulonia.
33 Tatara ihora ïa Iehoiakina i to ˈna ahu tapearaa, e tamaa noa ˈtura oia i te amuraa maa a te arii i te roaraa o to ˈna oraraa.
34 I te mau mahana atoa o to ˈna oraraa, tae noa ˈtu i te mahana i pohe ai oia, e tuhaa maa no ǒ mai i te arii ra tei horoahia na ˈna i te mahana tataitahi.
Nota i raro i te api
^ Heb: “fare.”
^ Heb: “fare.”
^ Heb: “fare.”
^ 1 kubiti: 44,5 cm. Hiˈo i te tuhaa hau B14.
^ 1 manimani: 1,85 cm. Hiˈo i te tuhaa hau B14.
^ Heb: “faateitei aˈera Evile-merodaka te arii o Babulonia i te upoo o.”
