Iosua 10:1-43
10 Faaroo ihora te arii Adoni-zedeka no Ierusalema e ua haru e ua haamou Iosua ia Ai a rave ai ia Ai e to ˈna arii+ mai ta ˈna i rave ia Ieriko e to ˈna arii,+ e ua faaau te mau taata o Gibeona i te hau ia Iseraela+ e te faaea ra i rotopu ia ratou.
2 Mǎtaˈu roa ihora oia,+ no te mea e oire rahi o Gibeona, mai hoê o te mau oire faaterehia e te hoê arii. Mea rahi aˈe te reira ia Ai,+ e e aito anaˈe te mau tane i reira.
3 Faatae ihora ïa te arii Adoni-zedeka no Ierusalema ia Hohama arii no Heberona,+ ia Pirama arii no Iaremuta, ia Iaphia arii no Lakisa e ia Debira arii no Egalona+ i teie poroi:
4 “A haere mai e tauturu ia ˈu e aro ia Gibeona, no te mea ua faaau to reira mau taata i te hau ia Iosua e te ati Iseraela.”+
5 Putuputu aˈera na arii e pae o te ati Amori,+ te arii o Ierusalema, te arii o Heberona, te arii o Iaremuta, te arii o Lakisa e te arii o Egalona, ratou e ta ratou mau nuu, haere aˈera e haaati aˈera ia Gibeona no te aro atu.
6 Faatae aˈera to Gibeona i te tahi poroi ia Iosua i te puhapa i Gilagala:+ “Eiaha e* faarue i to mau tîtî.+ A haere oioi mai! A faaora e a tauturu ia matou! Ua putuputu pauroa te arii o te ati Amori o te tuhaa fenua mouˈa no te aro ia matou.”
7 Pauma aˈera Iosua mai Gilagala mai, te mau faehau e te mau aito puai atoa.+
8 Na ô maira Iehova ia Iosua: “Eiaha e mǎtaˈu ia ratou,+ ua tuu hoi au ia ratou ia oe.+ Aita hoê o ratou e nehenehe e aro ia oe.”+
9 Haere atura Iosua hoê po taatoa mai Gilagala mai e aro atura ia ratou i te hoê taime manaˈo-ore-hia e ratou.
10 Faarapu ihora Iehova ia ratou i mua ia Iseraela+ e tairi aˈera Iseraela ia ratou i te hoê taparahiraa rahi i Gibeona, a aˈuaˈu ai ia ratou na te purumu e tae ai i nia i Bete-horona e a taparahi pohe ai ia ratou e tae roa i Azeka e i Makeda.
11 Te horo ê ra ratou ia Iseraela e to nia ratou i te haapouraa o Bete-horona, faatopa maira Iehova i te ofai pape paari rarahi mai te raˈi mai i nia ia ratou e tae roa i Azeka, e mou aˈera ratou. Oia mau, mea rahi aˈe tei pohe i te ûa paari i tei pohe i te ˈoˈe a te ati Iseraela.
12 I te mahana i horo ê ai te ati Amori ia Iehova i mua i te mata o te ati Iseraela, i reira to Iosua parauraa ia Iehova i mua ia Iseraela:
“Mahana, ia mau oe+ i nia ia Gibeona,+E avaˈe, i nia i te peho o Aialona.”
13 Mau ihora ïa te mahana e aita te avaˈe i tere noa ˈˈe e ia faautua roa te nunaa i to ˈna mau enemi. Ua papaihia te reira i roto i te buka a Iasara.+ Ua mau te mahana i ropu i te raˈi e aita i ru i te topa fatata hoê mahana taatoa.
14 Aita i itehia aˈenei hoê mahana mai tera, na mua ˈtu aore ra i muri mai, i to Iehova faarooraa i te reo o te hoê taata,+ te aro ra hoi Iehova no Iseraela.+
15 I muri iho, hoˈi aˈera Iosua e Iseraela taatoa i te puhapa i Gilagala.+
16 I taua taime ra, horo ê aˈera na arii e pae e tapuni aˈera i roto i te ana i Makeda.+
17 Faaarahia maira ia Iosua: “Ua itehia mai na arii e pae e tapuni ra i roto i te ana i Makeda.”+
18 Na ô atura ïa Iosua: “A turai i te tahi mau ofai rahi i mua i te tomoraa o te ana e a faataa i te tahi mau tane no te tiai ia ratou.”
19 Eiaha râ te toea o outou e faaea. A aˈuaˈu i to outou mau enemi e a tairi ia ratou na muri.+ Eiaha e vaiiho ia ratou ia hoˈi i roto i to ratou mau oire, ua tuu hoi Iehova to outou Atua ia ratou i to outou rima.”
20 I te otiraa ia Iosua e te ati Iseraela i te tairi ia ratou i te tahi taparahiraa rahi mau, a mou roa ˈi ratou maori noa râ vetahi tei ora ˈtu e tei hoˈi i roto i to ratou mau oire auahia i te patu,
21 hoˈi maitai aˈera pauroa te faehau ati Iseraela ia Iosua ra i te puhapa i Makeda. Aita hoê taata i haamǎtaˈu aˈe* i te ati Iseraela.
22 Na ô atura Iosua: “A tatara i te tomoraa o te ana e a aratai mai i na arii e pae ia ˈu nei.”
23 Aratai maira ïa ratou i teie na arii e pae ia ˈna: te arii o Ierusalema, te arii o Heberona, te arii o Iaremuta, te arii o Lakisa e te arii o Egalona.+
24 I to ratou aratairaa mai i teie na arii ia Iosua ra, titau ihora oia pauroa te tane o Iseraela e parau atura i te mau raatira faehau tei haere na muri ia ˈna: “A tapiri mai. A tuu i to outou avae i nia iho i to ratou aˈî.” Tapiri maira ïa ratou e tuu aˈera i to ratou avae i nia iho i to ratou aˈî.+
25 Na ô atura Iosua ia ratou: “Eiaha e mǎtaˈu e eiaha e riaria.+ Ia itoito e ia puai outou, teie hoi ta Iehova e rave i to outou mau enemi atoa ta outou e aro ra.”+
26 Haapohe ihora Iosua ia ratou e tarî atura ia ratou i nia e pae pou,* e vai noa ˈtura ratou i nia i na pou e ahiahi noa ˈtu.
27 I te toparaa mahana, faaue ihora Iosua ia haapouhia ratou mai nia mai i na pou+ e ia taorahia i roto i te ana i tapuni ai ratou. Tuuhia ihora te tahi mau ofai rahi i te tomoraa o te ana, e vai noa ˈtura te reira e tae roa mai i teie mahana.
28 Haru ihora Iosua ia Makeda+ i taua mahana ra e tairi ihora i to reira mau taata i te ˈoˈe. Haamou ihora oia i to ˈna arii e pauroa te taata i reira. Aita e taata i ora mai.+ Ua rave oia i te arii o Makeda+ mai ta ˈna i rave i te arii o Ieriko.
29 Haere aˈera Iosua e o Iseraela taatoa mai Makeda mai i Libena e aro atura ia Libena.+
30 Tuu atoa ˈtura Iehova i taua oire ra e to ˈna arii+ i te rima o Iseraela, e tairi aˈera ratou pauroa te taata i reira i te ˈoˈe. Aita e taata i ora mai. Ua rave ratou i to ˈna arii mai ta ratou i rave i te arii o Ieriko.+
31 I muri iho, haere aˈera Iosua e o Iseraela taatoa mai Libena mai i Lakisa,+ puhapa ihora i reira e tairi atura i to reira mau taata.
32 Tuu atura Iehova ia Lakisa i te rima o Iseraela, e haru aˈera ratou i te reira i te piti o te mahana. Tairi aˈera ratou pauroa te taata i reira i te ˈoˈe,+ mai ta ratou i rave ia Libena.
33 Pauma aˈera Horama arii o Gezera+ e tauturu ia Lakisa. Tairi ihora râ Iosua ia ˈna e ta ˈna mau faehau e aita e taata i ora mai.
34 Haere aˈera Iosua e o Iseraela taatoa mai Lakisa mai i Egalona,+ puhapa ihora i reira, e tairi atura i to reira mau taata.
35 Haru aˈera ratou i tera oire i taua mahana ra e tairi ihora i to reira mau taata i te ˈoˈe. Haamou aˈera ratou pauroa te taata i reira i taua mahana ra, mai ta ratou i rave ia Lakisa.+
36 Haere aˈera Iosua e o Iseraela taatoa mai Egalona mai i Heberona+ e aro atura i to reira mau taata.
37 Haru aˈera ratou i taua oire ra e tairi aˈera ratou i te ˈoˈe i to reira mau taata, to ˈna arii, te mau oire atoa ati aˈe e pauroa te taata i reira. Aita e taata i ora mai. Mai ta ˈna i rave ia Egalona, ua haamou oia i tera mau oire e pauroa te taata i reira.
38 I te hopea, fariu atura Iosua e o Iseraela taatoa ia Debira+ e aro atura i to reira mau taata.
39 Haru ihora oia i taua oire ra, to ˈna arii e te mau oire atoa ati aˈe e tairi aˈera i to reira mau taata i te ˈoˈe, a haamou+ ai pauroa te taata i reira. Aita e taata i ora mai.+ Ua rave oia ia Debira e to ˈna arii mai ta ˈna i rave ia Heberona, e ia Libena e to ˈna arii.
40 Upootia ˈtura Iosua i nia i te fenua taatoa o te tuhaa fenua mouˈa, te Negeba, te Sephela+ e te mau taha mouˈa, e pauroa to ratou arii. Aita e taata i ora mai. Haamou+ ihora oia pauroa tei huti ra i te aho, mai ta Iehova te Atua o Iseraela i faaue.+
41 Ua upootia Iosua i nia ia ratou mai Kadesa-barenea+ tae roa i Gaza+ e te fenua taatoa o Gosena+ tae roa i Gibeona.+
42 Ua haru Iosua i tera mau arii atoa e to ratou fenua, pauroa ratou i te hoê â taime, no te mea o Iehova te Atua o Iseraela te aro ra no Iseraela.+
43 E hoˈi aˈera Iosua e Iseraela taatoa i te puhapa i Gilagala.+
Nota i raro i te api
^ Heb: “Eiaha to rima ia.”
^ Heb: “faaoi aˈe i to ˈna arero.”
^ Aore ra “tumu raau.”
