Iosua 14:1-15
14 E teie ta te ati Iseraela i rave ei tuhaa na ratou i te fenua o Kanaana, ta Eleazara te tahuˈa, ta Iosua te tamaiti a Nuna e te mau upoo o te mau opu fetii o Iseraela i horoa ei tuhaa na ratou.+
2 Ua tufa-kelero-hia ta ratou tuhaa,+ mai ta Iehova i faaue na roto ia Mose no na iva opu e te afa.+
3 Ua horoa Mose na te tahi atu na piti opu e te afa i ta ratou tuhaa i te tahi atu pae* o Ioridana,+ e aita oia i horoa na te ati Levi i te tahi tuhaa i rotopu ia ratou.+
4 E piti opu te huaai o Iosepha,+ Manase e Epheraima.+ E aita i horoahia na te ati Levi te tahi tuhaa i tera fenua, te tahi noa râ mau oire+ ia parahi ratou i reira, e te mau vahi i rapaeau mai no ta ratou mau animara e ta ratou mau faufaa.+
5 Tufa aˈera ïa te ati Iseraela i tera fenua mai ta Iehova i faaue ia Mose.
6 Tapiri maira te mau tane o te opu o Iuda ia Iosua i Gilagala,+ e parau maira Kaleba+ te tamaiti a Iephune te ati Kenizi ia ˈna: “Ua ite maitai oe eaha ta Iehova i parau+ ia Mose te taata o te Atua mau+ no oe e no ˈu i Kadesa-barenea.+
7 E 40 matahiti to ˈu i to Mose te tavini a Iehova tonoraa ia ˈu mai Kadesa-barenea e hiˈopoa i teie fenua,+ e e faatiaraa parau mau ta ˈu* i to ˈu hoˈiraa ˈtu.+
8 Noa ˈtu ua toaruaru te aau o te nunaa no to ˈu mau taeae tei pauma na muri ia ˈu, ua pee au ma te aau atoa* ia Iehova to ˈu Atua.+
9 Ua horeo Mose i taua mahana ra: ‘E riro te fenua ta to avae i taahi ei tuhaa vai maoro na oe e ta oe mau tamarii, no te mea ua faaroo oe ma te aau atoa ia Iehova to ˈu Atua.’+
10 I teie nei mai ta ˈna i fafau,+ ua faaherehere Iehova ia ˈu+ tera e 45 matahiti mai te taime i fafau ai Iehova i te reira ia Mose i to Iseraela haereraa na te medebara.+ Teie noa â vau i teie mahana, e 85 matahiti.
11 E teie mahana, hoê â puai to ˈu mai i te mahana i tono ai Mose ia ˈu. Hoê â to ˈu puai i teie nei mai i tera mau mahana ra, no te tamaˈi e no te tahi atu mau ohipa.
12 No reira, a horoa mai no ˈu i teie tuhaa fenua mouˈa ta Iehova i fafau i tera mahana, noa ˈtu ua faaroo oe i tera mahana e ati Anaka+ e e oire rahi auahia i te patu to ratou.+ Ei pihai iho Iehova ia ˈu,+ e e tiahi au ia ratou,* mai ta Iehova i fafau.”+
13 Haamaitai ihora ïa Iosua ia ˈna e horoa ˈtura ia Heberona ei tuhaa+ na Kaleba te tamaiti a Iephune.
14 Teie te tumu Heberona i fatuhia ˈi e Kaleba te tamaiti a Iephune te ati Kenizi ei tuhaa na ˈna tae roa mai i teie mahana, no te mea ua faaroo oia ma te aau atoa ia Iehova te Atua o Iseraela.+
15 Te iˈoa o Heberona na mua ˈˈe, o Kiriata-araba+ (o Araba te taata rahi i rotopu i te ati Anaka). E aita ˈtura e tamaˈi i tupu i tera fenua.+
Nota i raro i te api
^ Oia hoi te pae hitia o te râ.
^ Heb: “e parau ta ˈu ia au i to ˈu aau.”
^ Heb: “pee maite au.”
^ Aore ra “e faaere au ia ratou i to ratou fenua.”
