Iosua 17:1-18
17 E tuhaa tei tufa-kelero-hia+ no te opu o Manase,+ no te mea o ˈna te matahiapo a Iosepha.+ I te mea e faehau o Makira,+ te matahiapo a Manase e te metua tane o Gileada, horoahia ˈtura o Gileada e o Basana no ˈna.+
2 E tuhaa atoa tei tufa-kelero-hia no te toea o te huaai o Manase ia au i to ratou mau fetii, ta te mau tamarii a Abi-ezera,+ ta te mau tamarii a Heleka, ta te mau tamarii a Aseriela, ta te mau tamarii a Sekema, ta te mau tamarii a Hepheri e ta te mau tamarii a Semida. Tera te huaai o Manase te tamaiti a Iosepha, te mau tane ia au i to ratou mau fetii.+
3 Area o Zelophehada+ te tamaiti a Hepheri, te tamaiti a Gileada, te tamaiti a Makira, te tamaiti a Manase, aita ïa ta ˈna e tamaiti, e tamahine anaˈe, e teie te iˈoa o ta ˈna mau tamahine: Mahala, Noa, Hogela, Mileka e Tireza.
4 Haere maira ïa ratou i mua ia Eleazara+ te tahuˈa, ia Iosua te tamaiti a Nuna e te mau raatira, e na ô maira: “Na Iehova i faaue ia Mose e horoa mai i te tahi tuhaa na matou i rotopu i to matou mau taeae.”+ Horoa ˈtura ïa oia, ia au i te faaueraa a Iehova, i te tahi tuhaa na ratou i rotopu i te mau taeae o to ratou metua tane.+
5 Tufa-atoa-hia ˈtura hoê ahuru tuhaa na Manase taa ê atu i te fenua o Gileada e Basana, tei te tahi atu pae* o Ioridana,+
6 ua horoahia hoi te tahi tuhaa na te mau tamahine a Manase e ta ˈna mau tamaiti, e riro atura te fenua o Gileada ei fenua no te toea o te huaai o Manase.
7 E te otia o Manase, mai Asera ïa tae roa i Mikameta,+ i mua noa ia Sekema,+ e e haere roa te otia i apatoa* i te fenua o to Ene-tapua.
8 Riro atura te fenua o Tapua+ ia Manase, riro atura râ o Tapua i te otia o Manase i te huaai o Epheraima.
9 E haapou te otia i te tahora o Kâna, i te pae apatoa o te tahora. E oire to Epheraima i rotopu i te mau oire o Manase,+ e tei apatoerau o te tahora te otia o Manase, e e hope te reira i te miti.+
10 No Epheraima i apatoa, e no Manase i apatoerau, e o te miti te otia o Manase,+ e i apatoerau e farerei ai te tuhaa fenua o Manase* ia Asera, e i hitia o te râ ia Isakara.
11 I te mau tuhaa fenua o Isakara e Asera, horoahia ˈtura no Manase o Bete-seana e to ˈna mau oire ati aˈe, o Ibeleama+ e to ˈna mau oire ati aˈe, to Dora+ e to ˈna mau oire ati aˈe, to Ene-dora+ e to ˈna mau oire ati aˈe, to Taanaka+ e to ˈna mau oire ati aˈe, e to Megido e to ˈna mau oire ati aˈe. No ˈna e toru o na fenua teitei.
12 Aita râ i noaa i te huaai o Manase ia haru i tera mau oire, ua onoono te ati Kanaana i te parahi i tera fenua.+
13 I te puairaa mai te ati Iseraela, faarave aˈera ratou i te ati Kanaana i te ohipa faahepohia,+ aita râ i tiahi ia ratou pauroa.*+
14 Na ô maira te huaai o Iosepha ia Iosua: “Eaha oe i horoa mai ai ei tuhaa na matou* hoê noa tuhaa tufa-kelero-hia+ e hoê noa tuhaa faitohia? E nunaa rahi matou, ua haamaitai hoi Iehova ia matou tae roa mai i teie nei.”+
15 Pahono atura Iosua ia ratou: “I te mea e nunaa rahi outou, a pauma i te uru raau e a vaere i reira i te tahi vahi no outou i te fenua o te ati Perizi+ e te ati Repha,+ i te mea hoi mea apǐapǐ roa te tuhaa fenua mouˈa o Epheraima+ no outou.”
16 Na ô maira te huaai o Iosepha: “Eita e navai te tuhaa fenua mouˈa no matou, e e pereoo tamaˈi+ e ˈoˈe to nia iho i te huira* to te ati Kanaana atoa e parahi ra i te fenua o te peho, to Bete-seana+ e to ˈna mau oire ati aˈe e to te peho o Iezereela.”+
17 Na ô atura ïa Iosua i te huaai o Iosepha, te opu o Epheraima e to Manase: “E nunaa rahi outou, e e puai rahi to outou. Eita outou e fanaˈo hoê noa tuhaa fenua tufa-kelero-hia,+
18 e riro atoa râ te tuhaa fenua mouˈa no outou.+ Noa ˈtu e uru raau, e vaere outou i te reira, e o te reira te hopearaa o to outou tuhaa fenua. E tiahi hoi outou i te ati Kanaana, noa ˈtu mea puai ratou e e pereoo tamaˈi e ˈoˈe to nia iho i te huira* to ratou.”+
Nota i raro i te api
^ Oia hoi te pae hitia o te râ.
^ Heb: “i te pae atau.”
^ Aore ra “to te opu o Manase.” Heb: “ratou.”
^ Aore ra “i faaere ia ratou pauroa i to ratou fenua.”
^ Heb: “na ˈu.”
^ Heb: “pereoo tamaˈi auri.”
^ Heb: “pereoo tamaˈi auri.”
