Iosua 20:1-9
-
Te mau oire haapuraa (1-9)
20 Na ô maira Iehova ia Iosua:
2 “A parau i te ati Iseraela: ‘A maiti no outou i te mau oire haapuraa+ ta ˈu i parau ia outou na roto ia Mose,
3 ia nehenehe tei haapohe i te taata ma te opua ore aore ra ma te manaˈo ore* e horo i reira. E riro te reira ei haapuraa no outou i te taata tahoo i te toto.+
4 E horo oia i te hoê o teie mau oire,+ e tia oia i te tomoraa o te uputa o te oire+ e e faaite oia i te ohipa i tupu i te mau matahiapo o tera oire. E farii ratou ia ˈna i roto i te oire, e horoa ratou i te tahi vahi no ˈna e e ora oia i rotopu ia ratou.
5 Ia aˈuaˈu te taata tahoo i te toto ia ˈna, eiaha ratou e tuu i tei haapohe i te taata i to ˈna rima, ua haapohe hoi oia i to ˈna taata tupu ma te manaˈo ore* e aita oia i hae ia ˈna na mua ˈˈe.+
6 E noho oia i tera oire e ia haava-roa-hia oia i mua i te amuiraa,+ e e faaea oia i reira e ia pohe roa te tahuˈa rahi+ e tavini ra i tera mau mahana. I reira tei haapohe i te taata e nehenehe ai e hoˈi i te oire no reira oia i te horo-ê-raa, e e hoˈi ai i ǒ ˈna i to ˈna oire.’”+
7 Haamoˈa* aˈera ïa ratou ia Kedesa+ i Galilea i te tuhaa fenua mouˈa o Naphatali, ia Sekema+ i te tuhaa fenua mouˈa o Epheraima, e ia Kiriata-araba,+ oia hoi Heberona, i te tuhaa fenua mouˈa o Iuda.
8 I te tuhaa fenua o Ioridana, i hitia o te râ o Ieriko, maiti aˈera ratou ia Bezera+ i te medebara, i te vahi papu teitei no roto mai i te opu o Reubena, ia Ramota+ i Gileada no roto mai i te opu o Gada, e ia Golana+ i Basana no roto mai i te opu o Manase.+
9 Riro atura te reira ei oire faataahia no te ati Iseraela taatoa e no te mau taata ěê e noho ra i rotopu ia ratou, ia nehenehe tei haapohe i te taata ma te opua ore e horo i reira+ a ore atu ai e pohe i te rima o te taata tahoo i te toto hou oia a haavahia ˈi i mua i te amuiraa.+
