Iosua 23:1-16
23 E rave rahi mahana i muri aˈe i to Iehova horoaraa i te faafaaearaa+ ia Iseraela i to ˈna mau enemi atoa ati aˈe, ua paari roa hoi Iosua,+
2 titau atura Iosua ia Iseraela taatoa,+ to ˈna mau matahiapo, to ˈna mau raatira, to ˈna mau haava e to ˈna feia toroa,+ e na ô atura ia ratou: “Ua paari roa vau.
3 E ua ite roa outou i te mau mea atoa ta Iehova to outou Atua i rave i tera mau nunaa atoa no outou no te mea o Iehova to outou Atua te aro ra no outou.+
4 Inaha, ua tufa kelero*+ vau no outou i te fenua o teie mau nunaa e vai noa ra ei tuhaa na to outou mau opu,+ oia atoa to te mau nunaa ta ˈu i haamou,+ mai Ioridana tae roa i te miti Rahi* i tooa o te râ.*
5 E o Iehova to outou Atua tei faaatea ê noa na ia ratou mai mua ia outou.+ Ua tiahi oia ia ratou* no outou, e ua haru outou i to ratou fenua, mai ta Iehova to outou Atua i fafau ia outou.+
6 “I teie nei, ia itoito roa outou no te haapao e no te faaohipa i te mau parau atoa i papaihia i roto i te buka o te Ture+ a Mose ma te ore roa e hahi ê i te reira i te pae atau aore ra te pae aui,+
7 ma te ore roa e amui i tera mau nunaa+ e faaea ra e outou. Eiaha roa e faahiti i te iˈoa o to ratou mau atua+ e eiaha atoa e horeo na nia ia ratou. Eiaha roa e tavini ia ratou e eiaha atoa e piˈo i raro i mua ia ratou.+
8 E ati maite râ outou ia Iehova to outou Atua,+ mai ta outou i rave tae roa mai i teie mahana.
9 E nunaa rahi aˈe e te puai aˈe ta Iehova e tiahi mai mua ia outou,+ aita hoê i mau i mua ia outou tae roa mai i teie mahana.+
10 Hoê noa tane i rotopu ia outou te aˈuaˈu hoê tausani,+ no te mea o Iehova to outou Atua te aro ra no outou,+ mai ta ˈna i fafau ia outou.+
11 Ia haapao maitai noa+ ïa outou a here ai ia Iehova to outou Atua.+
12 “Tera râ, ia fariu ê roa outou i te Atua e ia ati atu i tei toe o tera mau nunaa e faaea+ ra i rotopu ia outou, ia taati outou ia ratou na roto i te faaipoiporaa*+ e ia amui outou ia ratou e ratou ia outou,
13 ia ite maitai outou e eita Iehova to outou Atua e tiahi noa i teie mau nunaa* no outou.+ E riro ratou ei marei e ei hui e tairi i to outou aoao+ e ei tara i roto i to outou mata e ia mou roa outou mai nia mai i teie fenua maitai ta Iehova to outou Atua i horoa no outou.
14 “Inaha, fatata roa vau i te pohe,* e ua ite maitai outou ma to outou aau atoa e ma to outou ora* atoa e aita hoê parau no roto mai i te mau parau fafau maitai atoa ta Iehova to outou Atua i parau tei ore i tupu. Ua tupu pauroa te reira no outou. Aita hoê o tera mau parau i ore i tupu.+
15 Mai te mau parau fafau maitai atoa ta Iehova to outou Atua i parau ia outou tei tupu i nia ia outou,+ na reira atoa Iehova i te faatae i nia ia outou pauroa te ati ta ˈna i fafau* e i te haamou ia outou mai nia mai i teie fenua maitai ta Iehova to outou Atua i horoa no outou.+
16 Ia ofati outou i te faufaa a Iehova to outou Atua ta ˈna i faaue ia outou ia haapao, ia haere outou e tavini i te tahi atu mau atua e ia piˈo outou i raro i mua ia ratou, e ura to Iehova riri ia outou+ e e mou oioi outou mai nia mai i te fenua maitai ta ˈna i horoa no outou.”+
Nota i raro i te api
^ Aore ra “faataa.”
^ Oia hoi Mediteranea.
^ Aore ra “i te toparaa mahana.”
^ Aore ra “ua faaere oia ia ratou i to ratou fenua.”
^ Aore ra “ia tupu te faaipoiporaa i rotopu ia outou e ia ratou.”
^ Aore ra “e faaere noa i teie mau nunaa i to ratou mau fenua.”
^ Heb: “Te haere nei au na te eˈa o to te fenua atoa nei.”
^ Heb: “parau hamani ino.”
