Iosua 3:1-17
-
Haereraa Iseraela na roto i te Ioridana (1-17)
3 Tia aˈera Iosua e pauroa te ati* Iseraela i te poipoi roa, reva aˈera mai Sitima+ mai e haere atura i Ioridana. Taoto ihora ratou i reira hou a haere atu ai i te tahi atu pae.
2 I muri iho e toru mahana, haere aˈera te feia toroa+ na roto i te puhapa
3 e faaue atura i te nunaa: “I te taime iho â outou e ite ai i te afata o te faufaa a Iehova to outou Atua ia amohia e te mau tahuˈa ati Levi,+ e faarue outou i te vahi to reira outou e e pee outou i te reira.
4 Ia atea noa râ outou i te reira e 2 000 kubiti.* Eiaha e tapiri atu â, ia nehenehe outou e ite i te purumu na reira ia haere, aita hoi outou i haere aˈenei na tera purumu.”
5 Na ô atura Iosua i te nunaa: “A haamoˈa ia outou,+ ananahi hoi Iehova e rave ai i te tahi mau mea faahiahia i rotopu ia outou.”+
6 Na ô atura Iosua i te mau tahuˈa: “A rave i te afata+ o te faufaa e a haere na mua i te nunaa.” Rave aˈera ïa ratou i te afata o te faufaa e haere aˈera na mua i te nunaa.
7 Na ô maira Iehova ia Iosua: “Mai teie mahana atu nei au e faateitei ai ia oe i mua i te mata o Iseraela taatoa,+ ia ite hoi ratou e ei pihai iho noa vau ia oe+ mai ia ˈu i pihai iho noa na ia Mose.+
8 Teie ta oe e faaue i te mau tahuˈa e amo i te afata o te faufaa: ‘Ia tae outou i te hiti pape o Ioridana,+ e haere outou i roto e e tia noa outou i reira.’”
9 Na ô atura Iosua i te ati Iseraela: “A haere mai i ǒ nei e a faaroo i te mau parau a Iehova to outou Atua.”
10 Na ô faahou atura Iosua: “Mai teie outou e ite ai e to rotopu ia outou te hoê Atua ora,+ e e tiahi mau â oia mai mua ia outou i te ati Kanaana, te ati Heta, te ati Hevi, te ati Perizi, te ati Geregasi, te ati Amori e te ati Iebusi.+
11 Inaha, e na mua ia outou te afata o te faufaa a te Fatu o te fenua taatoa no te na roto atu i te pape Ioridana.
12 I teie nei, a rave 12 tane no roto i na opu o Iseraela, hoê tane no te opu tataitahi,+
13 e i te taime iho â te tapuae avae o te mau tahuˈa o te amo i te Afata a Iehova, te Fatu o te fenua taatoa, e tano ai i nia* i te pape o Ioridana, e mau te pape e tahe ra na uta mai e e tia noa te reira mai te hoê patu.”+
14 I to te nunaa faarueraa i to ratou mau fare ie hou a na roto atu ai i te pape Ioridana, haere aˈera te mau tahuˈa e amo ra i te afata+ o te faufaa na mua i te nunaa.
15 I te taeraa iho â te mau tahuˈa e amo ra i te Afata i Ioridana e i te taahiraa iho â to ratou avae i roto i te pape (e vaipue+ na Ioridana i te roaraa o te tau ootiraa),
16 mau ihora te pape e tahe ra na uta mai. Ua tia te reira mai te hoê patu i Adamu roa, e oire piri ia Zaretana, a mǎrô atu ai te mau pape e tahe atu ra i te miti o te Araba, te miti Avaava.* Ua mau te reira, e haere aˈera te nunaa i te tahi atu pae i mua noa ia Ieriko.
17 A tia noa ˈi te mau tahuˈa e amo ra i te afata o te faufaa a Iehova i nia i te repo mǎrô+ i ropu i te anavai Ioridana, haere aˈera Iseraela taatoa na nia i te repo mǎrô+ e ia tae roa te nunaa taatoa i te tahi atu pae o Ioridana.
Nota i raro i te api
^ Heb: “tamarii.”
^ Piri i te 890 m. Hiˈo i te tuhaa hau B14.
^ Heb: “taahi ai i roto.”
^ Oia hoi te miti Pohe.
