Iosua 4:1-24
-
Ei haamanaˈoraa te mau ofai (1-24)
4 I te taeraa iho â pauroa te nunaa i te tahi atu pae o Ioridana, na ô maira Iehova ia Iosua:
2 “A rave 12 tane no roto i te nunaa, hoê tane no roto i te opu tataitahi,+
3 e teie ta oe e faaue ia ratou: ‘A rave 12 ofai no ropu i te anavai Ioridana, i te vahi e vai noa ˈi te avae o te mau tahuˈa,+ a amo i te reira na muri ia outou e a tuu i raro i te vahi e taoto ai outou.’”+
4 Titau atura ïa Iosua na 12 tane ta ˈna i faatoroa no roto i te ati Iseraela, hoê tane no roto i te opu tataitahi,
5 e na ô atura oia ia ratou: “A haere na mua i te Afata a Iehova to outou Atua i ropu i te anavai Ioridana, e e amo outou tataitahi hoê ofai i nia i to outou tapono, ia au i te rahiraa opu o te ati Iseraela,
6 ei tapao i rotopu ia outou. Ia ui mai ta outou mau tamarii* i muri aˈe: ‘No te aha outou i tuu ai i tera mau ofai i ǒ?,’+
7 e parau outou ia ratou: ‘No te mea ua mau te pape o Ioridana mai mua mai i te afata+ o ta Iehova faufaa. I te na rotoraa ˈtu te reira i te anavai Ioridana, mau ihora te pape o Ioridana. Ei haamanaˈoraa vai maoro tera mau ofai no te nunaa o Iseraela.’”+
8 Rave aˈera ïa te ati Iseraela mai ta Iosua i faaue. Rave maira ratou 12 ofai no ropu i te anavai Ioridana, mai ta Iehova i faaue ia Iosua, ia tuati i te rahiraa opu o Iseraela. Hopoi aˈera ratou i te reira i te vahi e taoto ai ratou e tuu ihora i raro.
9 Faatia atoa ˈtura Iosua 12 ofai i ropu i te anavai Ioridana i te vahi i tia ˈi te avae o te mau tahuˈa e amo ra i te afata o te faufaa,+ e to reira noa na ofai tae roa i teie mahana.
10 Tia noa ihora te mau tahuˈa e amo ra i te Afata i ropu i te anavai Ioridana e oti roa aˈera te mau mea atoa ta Iehova i faaue ia Iosua e parau i te nunaa ia rave, ia au i te mau mea atoa ta Mose i faaue ia Iosua. E te haere ru noa ra te nunaa i te tahi atu pae.
11 I te taeraa iho â te nunaa taatoa i te tahi atu pae, haere aˈera te mau tahuˈa e te afata a Iehova i te tahi atu pae i mua i te mata o te nunaa.+
12 Area te ati Reubena, te ati Gada e te afaraa o te opu o Manase, haere aˈera ïa ma te faaineinehia+ no te aroraa na mua i te tahi atu mau ati Iseraela, mai ta Mose i faaue ia ratou.+
13 Piri i te 40 000 faehau e mauhaa tamaˈi ta ratou tei haere i te tahi atu pae na mua ia Iehova i te mau vahi papu pâpâmǎrô o Ieriko.
14 Faateitei ihora Iehova ia Iosua i mua i te mata o Iseraela taatoa+ i taua mahana ra, e faatura maitai* ihora ratou ia ˈna i te mau mahana atoa o to ˈna oraraa, mai ia ratou i faatura maitai ia Mose.+
15 Na ô maira Iehova ia Iosua:
16 “A faaue i te mau tahuˈa e amo ra i te afata+ o te Haamanaˈoraa* ia haere mai i rapae i te pape Ioridana.”
17 Faaue ihora ïa Iosua i te mau tahuˈa: “A haere mai i rapae i te pape Ioridana.”
18 I to te mau tahuˈa e amo ra i te afata+ o te faufaa a Iehova haereraa mai i rapae i te pape e i te taahiraa to ratou tapuae avae i te hiti anavai, tahe faahou aˈera te pape o Ioridana e vaipue+ aˈera mai na mua ˈˈe.
19 Ua tae te nunaa i te tahi atu pae o Ioridana i te ahuru o te mahana o te avaˈe matamua, e puhapa ihora i Gilagala+ i te otia hitia o te râ o Ieriko.
20 Area na 12 ofai no roto i te anavai Ioridana te raveraahia mai, faatia aˈera Iosua i te reira i Gilagala.+
21 Na ô atura oia i te ati Iseraela: “Ia ui mai ta outou mau tamarii i to ratou mau metua a muri aˈe: ‘Eaha te auraa o tera mau ofai?,’+
22 e faataa outou ia ratou: ‘Ua na roto atu Iseraela i te pape Ioridana na nia i te repo mǎrô+
23 i te mǎrôraa ia Iehova to outou Atua te pape o Ioridana i mua ia ratou e ia tae pauroa ratou i te tahi atu pae, mai ta Iehova to outou Atua i rave i te miti Uteute i te mǎrôraa ia ˈna te reira i mua ia matou e ia tae pauroa matou i te tahi atu pae.+
24 Ua na reira oia ia ite te mau nunaa atoa o te fenua i te puai rahi o to Iehova rima+ e ia mǎtaˈu noa outou ia Iehova to outou Atua.’”
