Iosua 5:1-15
5 I te faarooraa iho â te mau arii atoa o te ati Amori+ i te pae tooa o te râ o Ioridana e te mau arii atoa o te ati Kanaana+ i te pae miti e ua mǎrô ia Iehova te pape o Ioridana i mua i te ati Iseraela e ia tae roa ratou i te tahi atu pae, toaruaru ihora to ratou aau+ e ere roa ihora ratou i te itoito no te ati Iseraela.+
2 I taua taime ra, na ô maira Iehova ia Iosua: “A hamani i te tipi ofai na oe e a peritome+ i te mau tane o Iseraela, no te piti o te taime.”
3 Hamani ihora ïa Iosua i te tipi ofai e peritome ihora i te mau tane o Iseraela i Gibea-haaralota.*+
4 Teie te tumu i peritome ai Iosua ia ratou: Ua pohe pauroa te tane tei faarue i Aiphiti, te feia tamaˈi atoa,* i roto i te medebara i to ratou tere i muri aˈe i to ratou faarueraa i Aiphiti.+
5 Ua peritomehia te mau tane atoa tei faarue i Aiphiti, area te mau tane atoa tei fanauhia i roto i te medebara i to ratou tere i muri aˈe i to ratou faarueraa i Aiphiti, aita ïa i peritomehia.
6 E 40 matahiti+ to te ati Iseraela haere-noa-raa na te medebara e ia pohe roa te nunaa taatoa, oia hoi te feia tamaˈi tei faarue i Aiphiti e tei ore i faaroo i te reo o Iehova.+ Ua horeo Iehova ia ratou e ore roa oia e faatia ia ratou ia ite i te fenua+ ta Iehova i horeo i to ratou mau tupuna e horoa no to ˈna nunaa,*+ e fenua e tahe noa te û e te meri.+
7 Mono aˈera ïa oia ia ratou i ta ratou mau tamaiti.+ O ratou ta Iosua i peritome. Mea peritome-ore-hia ratou, no te mea aita ratou i peritomehia i to ratou tere.
8 I te otiraa pauroa te tane o te nunaa i te peritomehia, faaea aˈera ratou i te vahi to reira ratou i roto i te puhapa e ia afaro roa mai ratou.
9 Na ô maira Iehova ia Iosua: “I teie mahana, ua faaore au i te faahaamaraa* a Aiphiti ia outou.” No reira i topahia ˈi taua vahi ra i te iˈoa o Gilagala*+ tae roa mai i teie mahana.
10 Puhapa noa ihora te ati Iseraela i Gilagala, e faatupu aˈera i te Pasa i te 14 o te mahana o te avaˈe,+ i te ahiahi, i te mau vahi papu pâpâmǎrô o Ieriko.
11 E amu aˈera ratou i te maa o te fenua i te mahana i muri iho i te Pasa, e pane hopue ore+ e e huero maa tunu-paa-hia, i taua mahana ra.
12 Ore aˈera te mâna i te mahana i amu ai ratou i te maa o te fenua. Aita faahou e mâna no te ati Iseraela,+ amu ihora râ ratou i te maa o te fenua o Kanaana i taua matahiti ra.+
13 I te piriraa Iosua i Ieriko, hiˈo aˈera oia e ite atura i te hoê taata+ e tia ra i mua ia ˈna, e ˈoˈe to roto i to ˈna rima.+ Haere atura Iosua ia ˈna ra e ui atura: “Tei to matou pae anei oe aore ra tei te pae o to matou mau enemi?”
14 Parau maira oia: “Aita, ua haere mai râ vau ei tamaiti huiarii* o te nuu a Iehova.”+ Tuturi ihora Iosua, tipapa ihora e parau atura ia ˈna: “Eaha ta to ˈu fatu e parau i ta ˈna tavini?”
15 Pahono maira te tamaiti huiarii o te nuu a Iehova ia Iosua: “A tatara i to tiaa, no te mea e vahi moˈa ta oe e tia nei.” I reira iho, na reira ˈtura Iosua.+
Nota i raro i te api
^ “Aivi o te mau iri i mua” te auraa.
^ Aore ra “te mau tane atoa ua tia te matahiti no te tau faehau.”
^ Heb: “no tatou.”
^ Heb: “ua huri ê au i te faaino.”
^ “Huri,” “Huri ê” te auraa.
^ Aore ra “raatira.”
