Iosua 8:1-35
8 Na ô maira Iehova ia Iosua: “Eiaha e mǎtaˈu e eiaha e riaria.+ A rave na muri ia oe pauroa te faehau e a pauma e aro ia Ai. Inaha, ua tuu vau i te arii o Ai, to ˈna nunaa, to ˈna oire e to ˈna fenua+ ia oe.
2 A rave ia Ai e i to ˈna arii mai ta oe i rave ia Ieriko e i to ˈna arii.+ E nehenehe râ outou e rave na outou i ta ˈna mau taoˈa e ta ˈna mau animara. A tuu i te tahi pǔpǔ tamoemoe i muri i te oire.”
3 Pauma aˈera ïa Iosua e pauroa te faehau e aro ia Ai. Maiti ihora Iosua e 30 000 aito puai e tono atura ia ratou i te po.
4 Faaue atura oia ia ratou: “Inaha, ei pǔpǔ tamoemoe outou i muri i te oire. Eiaha e faaatea roa i te oire, e ia ineine outou pauroa.
5 E tapiri atu vau e te feia atoa na muri ia ˈu i te oire, e ia haere mai ratou e aro ia matou mai te taime matamua,+ e horo ê matou ia ratou.
6 Ia aˈuaˈu mai ratou ia matou, e faaatea matou ia ratou i te oire, e parau hoi ratou: ‘Te horo ê nei ratou ia tatou mai te taime matamua.’+ E e horo ê matou ia ratou.
7 I reira outou to te pǔpǔ tamoemoe e tia mai ai e e haru ai i te oire. E tuu Iehova to outou Atua ia ratou ia outou.
8 I te haruraa iho â outou i te oire, e tanina+ outou i te reira. E rave outou mai ta Iehova i parau. Tera ïa ta ˈu faaueraa.”
9 Tono atura Iosua ia ratou, e haere aˈera ratou i te vahi e tamoemoe ai ratou i te enemi. Ua faaea ratou i ropu ia Betela e ia Ai, i te pae tooa o te râ o Ai, a faaea noa ˈi Iosua i te toea o te mau faehau ra i taua po ra.
10 I muri iho, tia maira Iosua i te poipoi roa, haaputuputu maira i te mau faehau, e aratai aˈera oia e te mau matahiapo o Iseraela ia ratou i Ai.
11 Pauma aˈera pauroa te faehau+ e na muri ra ia ˈna i mua i te oire. Puhapa aˈera ratou i te pae apatoerau o Ai, to ropu te peho ia ratou e ia Ai.
12 I taua taime ra, ua rave oia piri i te 5 000 tane e ua tuu ia ratou ei pǔpǔ tamoemoe+ i ropu ia Betela+ e ia Ai, i te pae tooa o te râ o te oire.
13 Patia ˈtura ïa te mau faehau i te puhapa rahi i te pae apatoerau o te oire,+ e te pǔpǔ faehau no muri i te pae tooa o te râ o te oire.+ Haere ihora Iosua i ropu i te peho i taua po ra.
14 I te iteraa iho â te arii no Ai i te reira, haere oioi maira oia e te mau tane o te oire i rapae i te poipoi roa no te aro ia Iseraela i te hoê vahi e itehia ˈtu ai te vahi papu pâpâmǎrô. Aita râ oia i ite e pǔpǔ tamoemoe tei tuuhia i muri i te oire.
15 I te aroraa mai te mau tane no Ai, horo ê aˈera Iosua e pauroa to Iseraela tei na muri ia ˈna na te purumu e tae atu ai i te medebara.+
16 Ua faauehia to te oire atoa e aˈuaˈu ia ratou. E a aˈuaˈu ai ratou ia Iosua, faaateahia ˈtura ïa ratou i te oire.
17 Aita hoê aˈe tane i Ai e i Betela. Ua faarue ratou pauroa i te oire tei vai matara noa no te aˈuaˈu ia Iseraela.
18 Na ô maira Iehova ia Iosua: “A toro i te mahae i roto i to rima i nia ia Ai+ ra, e tuu hoi au i tera oire i to rima.”+ Toro ihora Iosua i te mahae i roto i to ˈna rima i nia i te oire.
19 I te tororaa iho â oia i to ˈna rima, tia oioi aˈera te pǔpǔ tamoemoe mai te vahi i tapuni ai ratou, horo aˈera i roto i te oire e haru aˈera i te reira. I reira iho, tanina ˈtura+ ratou i te oire.
20 I te huriraa te mau tane no Ai, ite aˈera ratou i te au auahi o te oire e pee ra i nia i te raˈi, e aita ˈtura to ratou e puai no te horo i tera e tera pae. Aro aˈera ïa te mau faehau tei horo i te medebara i te feia tei aˈuaˈu na ia ratou.
21 I te iteraa Iosua e pauroa Iseraela e ua haru te pǔpǔ tamoemoe i te oire e te pee ra te au auahi o te oire i nia, huri aˈera ratou e aro atura i te mau tane no Ai.
22 Haere maira te pǔpǔ tamoemoe i rapae i te oire no te aro ia ratou a mau atu ai te mau tane no Ai i ropu, e ati Iseraela to te tahi e te tahi pae, e taparahi pohe aˈera ia ratou e aita hoê i ora mai aore ra i horo ê.+
23 Haru ora maira râ ratou i te arii no Ai+ e hopoi atura i mua ia Iosua.
24 I te otiraa ia Iseraela i te haapohe i te mau taata atoa no Ai i rapae i te oire, i te medebara i reira to ratou aˈuaˈuraa ia ratou, e i te poheraa pauroa te toea o ratou i te ˈoˈe, hoˈi aˈera ratou pauroa i Ai e taparahi pohe aˈera i to reira i te ˈoˈe.
25 Te taata atoa tei pohe i taua mahana ra, te tane e te vahine, 12 000, pauroa te taata no Ai.
26 Aita Iosua i faahoˈi mai i to ˈna rima ta ˈna i toro i te mahae+ e ia haamou-roa-hia te mau taata atoa no Ai.+
27 Rave maira Iseraela i te mau animara e te mau taoˈa haruhia o tera oire na ratou, ia au i te mau faaueraa ta Iehova i horoa ia Iosua.+
28 Tanina ˈtura Iosua ia Ai e faariro atura i te reira ei oire ano e a muri noa ˈtu,+ mai te itehia ra i teie mahana.
29 Tarî atura oia i te tino pohe o te arii no Ai i nia i te hoê pou* e ahiahi noa ˈtu, e a fatata ˈi te mahana i te topa, faaue atura Iosua ia tatara mai i to ˈna tino pohe mai nia mai i te pou.+ Taorahia ˈtura te reira i te tomoraa o te uputa o te oire, e faatiahia aˈera te tahi pueraa ofai teitei i nia iho ia ˈna, o te vai noa ra i teie mahana.
30 I reira to Iosua hamaniraa i te hoê fata i nia i te mouˈa Ebala+ no Iehova te Atua o Iseraela,
31 mai ta Mose te tavini a Iehova i faaue i te ati Iseraela e mai tei papaihia i roto i te buka o te Ture+ a Mose: “Hoê fata ofai aita i taraihia i te mauhaa auri.”+ I nia iho to ratou pûpûraa i te tusia taauahi ia Iehova e te tusia no te hau.+
32 Papai ihora oia i reira i nia i na ofai i te Ture+ ta Mose i papai i mua i te ati Iseraela.+
33 Te tia ra pauroa Iseraela, to ratou mau matahiapo, te feia toroa e to ratou mau haava i te tahi e te tahi pae o te Afata i mua i te mau tahuˈa ati Levi e amo ra i te afata o te faufaa a Iehova. To reira atoa te taata ěê e noho ra i rotopu ia ratou e te taata tumu.+ Te tia ra te afaraa o ratou i mua i te mouˈa Gerizima, e te tahi afaraa i mua i te mouˈa Ebala+ (mai ta Mose te tavini a Iehova i faaue na),+ no te haamaitai i te nunaa o Iseraela.
34 I muri iho, taio haapuai atura oia i te mau parau atoa o te Ture,+ te mau haamaitairaa+ e te mau ati,+ ia au i te mau mea atoa tei papaihia i roto i te buka o te Ture.
35 Aita hoê parau o te mau parau atoa ta Mose i faaue aita Iosua i taio haapuai i mua i te amuiraa taatoa o Iseraela,+ i mua atoa i te mau vahine, te mau tamarii e te mau taata ěê+ e noho* ra i rotopu ia ratou.+
