Iosua 9:1-27
9 I te faarooraa te mau arii atoa o te pae tooa o te râ o Ioridana+ i tei tupu, to te tuhaa fenua mouˈa, i te Sephela, e na te hiti miti Rahi*+ taatoa, e i mua i Lebanona, te ati Heta, te ati Amori, te ati Kanaana, te ati Perizi, te ati Hevi e te ati Iebusi,+
2 tahoê aˈera ratou no te aro ia Iosua e ia Iseraela.+
3 Faaroo atoa aˈera to Gibeona+ i ta Iosua i rave ia Ieriko+ e ia Ai.+
4 Ohipa aˈera ratou ma te paari. Tuu aˈera ratou i te maa i roto i te pute tahito i nia iho i ta ratou mau asini, e te pute uaina tahito tei mahae e tei tafaihia.
5 E tiaa tahito atoa e te tafaihia tei to ratou avae, e e ahu tahito tei nia ia ratou. Pauroa te faraoa ta ratou i rave mai, mea mǎrô e te purehu hanoa.
6 Haere aˈera ratou ia Iosua ra i te puhapa i Gilagala+ e na ô maira ia ˈna e te mau tane o Iseraela: “Na te tahi fenua atea mai ra matou. I teie nei, a faaau i te tahi faufaa ia matou.”
7 Na ô atura râ te mau tane o Iseraela i te ati Hevi:+ “Peneiaˈe to pihai iho noa mai to outou faaearaa. E nafea ïa matou e faaau ai i te tahi faufaa ia outou?”+
8 Pahono maira ratou ia Iosua: “E tavini* matou na oe.”
Parau atura Iosua ia ratou: “O vai outou, e na hea mai ra outou?”
9 Na ô maira ratou ia ˈna: “Na te tahi fenua atea roa+ mai to mau tavini nei i te haereraa mai no te iˈoa o Iehova to Atua, no te mea ua faaroo matou i to ˈna roo e te mau mea atoa ta ˈna i rave i Aiphiti+
10 e te mau mea atoa ta ˈna i rave i na arii e piti o te ati Amori i te tahi atu pae* o Ioridana, te arii Sihona+ no Hesebona, e te arii Oga+ no Basana tei faaea na i Asetarota.
11 No reira to matou mau matahiapo e te mau taata atoa o to matou fenua i parau ai ia matou: ‘A rave i te maa no to outou tere e a haere a farerei ia ratou. A parau ia ratou: “E riro matou ei tavini na outou.+ I teie nei, a faaau i te tahi faufaa ia matou.”’+
12 Teie faraoa ta matou i rave ei maa na matou, te veavea noa ra i te mahana i faarue ai matou i to matou mau fare no te haere mai ia outou ra. A hiˈo na i teie nei, mea mǎrô e te purehu hanoa.+
13 E teie mau pute uaina, mea apî â i te faaîraahia e matou, ua mahae râ i teie nei.+ E ua ino to matou mau ahu e tiaa no te roa o te tere.”
14 Rave* aˈera te mau tane o Iseraela i te tahi tuhaa o ta ratou maa, aita râ i ui ia Iehova.+
15 Faaau ihora Iosua i te hau+ e i te tahi faufaa ia ratou ia ore e haapohe ia ratou, e tera ta te mau raatira o te amuiraa i horeo ia ratou.+
16 E toru mahana i muri iho i te faaauraa i te tahi faufaa ia ratou, faaroo aˈera te mau tane o Iseraela e ere mea atea to ratou faaearaa, tei pihai iho noa mai.
17 Reva aˈera te ati Iseraela e tae atura i to ratou mau oire i te toru o te mahana. O Gibeona,+ Kephira, Beerota e Kiriata-iearima+ to ratou mau oire.
18 Aita râ te ati Iseraela i aro ia ratou, no te mea ua horeo te mau raatira o te amuiraa ia ratou i te ora o Iehova+ te Atua o Iseraela. Haamata aˈera te amuiraa taatoa i te amuamu i te mau raatira.
19 Parau atura te mau raatira atoa i te amuiraa taatoa: “I te mea ua horeo matou ia ratou i te ora o Iehova te Atua o Iseraela, eita matou e faatiahia e hamani ino ia ratou.
20 Na ô tatou: E vaiiho tatou ia ratou ia ora, ia ore te Atua ia riri mai no ta tatou horeo ia ratou.”+
21 Parau faahou atura te mau raatira: “A vaiiho ia ratou ia ora, e riro mai râ ratou ei ohi vahie e ei tii pape na te amuiraa taatoa.” Tera ta te mau raatira i fafau ia ratou.
22 Titau atura Iosua ia ratou e na ô atura: “Eaha outou i haavare mai ai ia matou a na ô mai ai: ‘No te tahi vahi atea roa matou,’ e inaha, to pihai iho noa mai to outou faaearaa?+
23 Mai teie atu nei, ua ati* outou,+ e ei tiaraa tîtî noa â to outou ei ohi vahie e ei tii pape no te fare o to ˈu Atua.”
24 Pahono maira ratou ia Iosua: “Ua parau-maitai-hia i to mau tavini nei e ua faaue Iehova to Atua ia Mose ta ˈna tavini e horoa no outou i teie fenua taatoa e e haamou i to reira mau taata atoa mai mua ia outou.+ Mǎtaˈu ihora ïa matou no to matou ora no outou aˈe,+ e no reira matou i na reira ˈi.+
25 I teie nei, tei roto matou i to rima. A rave ia matou mai ta oe e manaˈo ra mea maitai e mea tia.”
26 O ta ˈna ïa i rave ia ratou. Ua faaora oia ia ratou i te rima o te ati Iseraela, o tei ore i haapohe ia ratou.
27 Faariro atura râ Iosua ia ratou i taua mahana ra ei ohi vahie e ei tii pape na te amuiraa+ e no te fata a Iehova i te vahi ta ˈna e maiti+ e tae roa i teie mahana.+
Nota i raro i te api
^ Oia hoi Mediteranea.
^ Aore ra “tîtî.”
^ Oia hoi te pae hitia o te râ.
^ Aore ra “Hiˈopoa.”
