Isaia 33:1-24
33 Ua ati oe te taata haamou tei ore i haamouhia,+Oe te taata taiva tei ore i taivahia!
Ua oti anaˈe ia oe i te haamou, e haamouhia oe.+
Ua oti anaˈe ia oe i te taiva, e taivahia oe.
2 E Iehova, a hamani maitai mai na ia matou.+
Tei ia oe to matou tiaturiraa.
Ia riro oe ei puai*+ no matou i te mau poipoi atoa,Oia mau, to matou faaoraraa i te taime ahoaho.+
3 E horo ê te mau nunaa ia faaroo ratou i te ahoahoa.
Ia tia mai oe, e purara te mau nunaa.+
4 Mai te vivi taehae ia haaputuputu, oia atoa te mau faufaa ta oe i haru ia haaputuputuhia.E popore te taata i te reira mai te mau aere vivi.
5 E faateiteihia Iehova,Tei te teiteiraa hoi i nia roa to ˈna parahiraa.
E î o Ziona ia ˈna i te parau-tia e te ohipa afaro.
6 O ˈna te papuraa o to oe oraraa,*E te rahi o te faaoraraa,+ te paari, te ite e te mǎtaˈu ia Iehova,+Tera ta ˈna taoˈa.
7 Inaha, te tuô ra to ratou mau aito i roto i te aroâ.Te auê ra te mau vea hopoi i te parau hau.
8 Aita e taata i nia i te mau purumu rahi.Aita e taata e ratere ra na nia i te mau eˈa.
Ua ofati oia* i te faufaa.Ua faarue oia i te mau oire.Aita oia e tâuˈa ra i te taata.+
9 Te oto* ra te fenua e te maemae ra.
Ua haama Lebanona,+ ua oriorio.
Ua riro Sarona mai te medebara,E te ere ra Basana raua Karemela i to raua rauere.+
10 “I teie nei, e tia mai au i nia,” te parau ra Iehova,“I teie nei, e faahanahana vau ia ˈu.+I teie nei, e faateitei au ia ˈu.
11 E hapû outou i te aihere mǎrô e e fanau i te tumu sitona mǎrô.
E pau outou i to outou huru feruriraa mai te tahi auahi.+
12 E e riro te mau nunaa mai te puˈa e ama ra.
Mai te raau taratara tei tâpûhia, e paapaa ratou i te auahi.+
13 Outou tei te atea ê ra, a faaroo mai i ta ˈu e rave!
E outou tei pihai iho noa mai, ia farii outou e mea puai au!
14 Te mǎtaˈu ra te feia rave hara i Ziona ra.+Te rûrû ra te feia taiva:
‘O vai o tatou e ora i te vahi e auahi ura to reira?+
O vai o tatou e ora i roto i te auahi ura noa?’
15 Te taata o te pee noa i te parau-tia,+O te parau i te mea afaro,+O te haapae i te apî e noaa mai i te ohipa taviri,Aita to ˈna rima i rave mai i te peta,+O te tapiri i to ˈna tariˈa i te parau o te taparahiraa taata,E o te tapo i to ˈna mata ia ore ia ite i te mea ino,
16 E parahi oia i te mau vahi teitei.To nia iho to ˈna haapuraa* papu i te mau pare mato,E horoahia mai ta ˈna maa,E e pape noa ta ˈna.”+
17 E hiˈo to oe mata i te tahi arii i roto i to ˈna unauna.E ite te reira i te tahi fenua atea.
18 E haamanaˈo* oe i roto i to oe aau i te riaria:
“Teihea te papai parau?
Teihea te taata tei faito na i te ô titauhia?+
Teihea te taata tei taio na i te mau pare?”
19 Eita oe e ite faahou i te nunaa vahavaha,E nunaa mea fifi* roa ia taa i to ratou reo,E reo maumau to ratou ta oe e ore e taa.+
20 A hiˈo ia Ziona, te oire o ta tatou mau oroa!+
E ite to oe mata ia Ierusalema mai te tahi nohoraa hau,E fare ie eita e hautihia.+
E ore roa te mau naero rahi o te fare ie e tatarahia,E eita hoê o to ˈna mau taura e mutu.
21 I reira hoi Tei Teitei, Iehova,E riro ai no tatou ei tuhaa fenua o te mau anavai, o te mau taheraa pape aano,Aita e pahi mea hôe e fano na reiraE aita e pahi rahi e na reira i te fano.
22 O Iehova hoi to tatou Haava,+O Iehova to tatou Iriti ture,+O Iehova to tatou Arii.+Na ˈna e faaora ia tatou.+
23 E matara te mau taura,Eita te tira e mau, eita atoa e tuuhia te ie.
I taua tau ra, e operehia te faufaa e rave rahi tei haruhia.E rave atoa te pirioi i te tahi tuhaa rahi o te taoˈa haruhia.+
24 E aita e taata e parau: “E maˈi to ˈu.”+
E faaorehia te hape a te nunaa e parahi ra i te fenua.+
Nota i raro i te api
^ Heb: “rima.”
^ Heb: “to oe mau mahana.”
^ Oia hoi te enemi.
^ Huri-atoa-hia “mǎrô roa.”
^ Aore ra “vahi teitei.”
^ Aore ra “feruriruri.”
^ Heb: “hohonu.”
