Koheleta 9:1-18
9 Feruri maitai ihora ïa vau pauroa te reira i roto i to ˈu aau e taa ihora ia ˈu teie: Te taata parau-tia e te taata paari, oia atoa ta ratou mau ohipa, tei roto ïa i te rima o te Atua mau.+ Aita te taata i ite i te here e te hae tei tupu na mua ˈtu ia ratou.
2 Hoê â hopea to ratou pauroa,+ te taata parau-tia e te taata ino,+ te taata maitai e te taata viivii ore e te taata viivii, tei pûpû i te tusia e tei ore e pûpû. Hoê â te taata maitai e te taata rave hara, hoê â te taata e horeo e te taata e taiâ i te horeo.
3 Teie te ohipa hepohepo e tupu ra i raro aˈe i te mahana: No te mea hoê â hopea to te taata atoa,+ ua î atoa ïa te aau o te taata i te ino. E maamaa to roto i to ratou aau i te roaraa o to ratou oraraa, a pohe atu ai ratou!*
4 E tiaturiraa to te taata atoa i rotopu i te feia ora, no te mea mea au aˈe te hoê urî ora i te hoê liona pohe.+
5 Ua ite hoi* te feia ora e pohe ratou,+ aita râ te feia pohe i ite i te tahi mea,+ aita atoa ta ratou e haamaitairaa,* no te mea ua moˈe-roa-hia to ratou parau.+
6 Oia atoa to ratou here, to ratou hae e to ratou pohehae, ua moˈe ê na ïa. E aita faahou ta ratou e tuhaa i te mau ohipa e ravehia ra i raro aˈe i te mahana.+
7 A haere a amu i ta oe maa ma te oaoa, e a inu i ta oe uaina ma te aau rearea,+ ua mauruuru ê na hoi te Atua mau i ta oe mau ohipa.+
8 Ia uouo noa to oe ahu,* e eiaha e haamoˈe i te tuu i te monoˈi i nia i to oe upoo.+
9 Ia oaoa oe i to oe oraraa e ta oe vahine faaipoipo here+ i te mau mahana atoa o to oe oraraa faufaa ore, ta te Atua i horoa no oe i raro aˈe i te mahana, i te mau mahana atoa o to oe faufaa ore, tera hoi ta oe tuhaa i roto i te oraraa e i roto i ta oe ohipa rohirohi ta oe e tautoo ra i te rave i raro aˈe i te mahana.+
10 Pauroa te ohipa ta to oe rima e nehenehe e rave, a rave ma to puai atoa, aita hoi e ohipa, e opuaraa, e ite e e paari i te Apoo,*+ ta oe e haere ra.
11 E ohipa ˈtu â ta ˈu i ite i raro aˈe i te mahana, eita te taata vitiviti e upootia noa i te hororaa, te taata puai i te aroraa,+ aita atoa ta te feia paari e maa noa, ta te feia maramarama e taoˈa noa,+ eita atoa te feia e ite to ratou e manuïa noa,+ no te mea e roohia ratou pauroa i te taime e te tupuraa manaˈo-ore-hia.
12 Aita hoi te taata i ite i to ˈna taime.+ Mai te iˈa e mau i roto i te upeˈa haapohe e te manu e mau i roto i te marei, e noaa-atoa-hia te mau tamaiti a te taata i te taime ahoaho* ia roohia ratou i te reira.
13 Teie atoa ta ˈu i ite no nia i te paari i raro aˈe i te mahana, e ua maere au:
14 Te vai ra hoê oire nainai, tau taata noa te ora i roto. E haere maira hoê arii puai e haaati e e faatia i te puhapa no te aro i te reira.
15 Te vai ra hoê taata veve i roto, e feruriraa paari râ to ˈna, e na ˈna i faaora i te oire i to ˈna paari. Aita râ hoê i haamanaˈo i taua taata veve ra.+
16 E na ô ihora vau i roto ia ˈu: ‘Mea au aˈe te paari i te puai.+ Mea vahavahahia râ te paari o te hoê taata veve, e eita e tâuˈahia ta ˈna mau parau.’+
17 Mea au aˈe ia haapao i te mau parau hau a te taata paari i te tutuô a te taata e faatere ra i rotopu i te maamaa.
18 Mea au aˈe te paari i te mauhaa tamaˈi, e nehenehe râ ta te hoê noa taata rave hara e haamou e rave rahi faufaa.+
Nota i raro i te api
^ Heb: “e i muri iho, i roto i te feia pohe!”
^ Aore ra “Ua taa hoi i.”
^ Aore ra “aufauraa.”
^ Oia hoi te ahu araaraa e tapao no te oaoa, eiaha te ahu oto.
^ Aore ra “ati.”
