Levitiko 1:1-17
-
Te tusia taauahi (1-17)
1 Pii maira Iehova ia Mose e paraparau maira ia ˈna mai te tiahapa o te amuiraa mai,+ a na ô ai:
2 “A paraparau i te ati Iseraela* e a parau ia ratou: ‘Ia hinaaro hoê o outou e hopoi mai i te hoê tusia ia Iehova no roto i te mau animara rata, e hopoi mai ïa outou i ta outou tusia no roto i te mau puaatoro aore ra i te mau mamoe e te puaaniho.+
3 “‘Mai te peu e puaatoro ta ˈna e pûpû ei tusia taauahi, e hopoi mai ïa oia i te hoê puaatoro oni oraora maitai.+ E hopoi mai oia i te reira ma te aau tae+ i mua ia Iehova i te tomoraa o te tiahapa o te amuiraa.
4 E tuu oia i to ˈna rima i nia i te afii o te tusia taauahi, e e fariihia te reira no te tapoˈi i ta ˈna mau hara.*
5 “‘I muri iho, e tupaihia te puaatoro oni apî i mua ia Iehova, e e hopoi mai na tamaiti a Aarona, te mau tahuˈa,+ i te toto a pîpî atu ai i te toto ati aˈe te fata,+ tei te tomoraa o te tiahapa o te amuiraa.
6 E hohorehia te iri o te tusia taauahi e e tâpûpûhia taua tusia ra.+
7 E tuu na tamaiti a Aarona, te mau tahuˈa, i te auahi i nia i te fata+ e e apǎpǎ ratou i te vahie i nia i te auahi.
8 E faanaho te mau tamaiti a Aarona, te mau tahuˈa, i te tusia tei tâpûpûhia,+ te afii e te toâhua,* na nia iho i te vahie i nia i te auahi, i nia iho i te fata.
9 E horoihia to ˈna aau e to ˈna na avae i te pape, e e tutui te tahuˈa i te reira, a au auahi atu ai i nia i te fata ei tusia taauahi, e tusia hauˈa noˈanoˈa au maitai* ia Iehova na roto i te auahi.+
10 “‘Mai te peu e mamoe aore ra e puaaniho ta ˈna e pûpû ei tusia taauahi,+ e hopoi mai oia i te hoê mamoe oni apî oraora maitai aore ra te hoê puaaniho oni apî oraora maitai.+
11 E tupaihia te reira i te pae apatoerau o te fata i mua ia Iehova, e e pîpî te mau tamaiti a Aarona, te mau tahuˈa, i to ˈna toto ati aˈe te fata.+
12 E tâpûpûhia te reira, e e faanaho te tahuˈa i te tusia tei tâpûpûhia, te afii e te toâhua,* na nia iho i te vahie i nia i te auahi, i nia iho i te fata.
13 E horoi oia i te aau e na avae i te pape, e e hopoi mai te tahuˈa pauroa te reira, a tutui atu ai ia au auahi i nia i te fata. E tusia taauahi ïa, e tusia hauˈa noˈanoˈa au maitai* ia Iehova na roto i te auahi.
14 “‘Tera râ, mai te peu e pûpû oia i te manu ei tusia taauahi ia Iehova, e hopoi mai ïa oia i ta ˈna tusia no roto i te mau uupa aore ra te mau uuairao apî.+
15 E hopoi mai te tahuˈa i te reira i nia i te fata e e ofati oia i to ˈna afii, a tutui atu ai ia au auahi i nia i te fata. Area to ˈna toto, e faatahehia i te pae fata.
16 E tatara oia i te pute arapoa o te manu e to ˈna mau huruhuru, a faarue atu ai i pihai iho i te fata, i te pae hitia o te râ, to reira te rehu.*+
17 E vahi oia i te manu na ropu i to ˈna na pererau ra ma te ore e faataa ê roa. Ia oti, e tutui te tahuˈa i te reira a au auahi atu ai i nia i te fata, na nia iho i te vahie i nia i te auahi. E tusia taauahi ïa, e tusia hauˈa noˈanoˈa au maitai* ia Iehova na roto i te auahi.
Nota i raro i te api
^ Heb: “te mau tamarii a Iseraela.”
^ Aore ra “te mii ati aˈe te mape.”
^ Aore ra “tamǎrû.” Heb: “faahau.”
^ Aore ra “te mii ati aˈe te mape.”
^ Aore ra “tamǎrû.” Heb: “faahau.”
^ Aore ra “rehu mii,” oia hoi e rehu anoihia e te mii o te mau tusia.
^ Aore ra “tamǎrû.” Heb: “faahau.”
