Levitiko 10:1-20
10 I muri iho, rave maira na tamaiti tataitahi a Aarona o Nadaba raua Abihu+ i ta raua farii auahi, tuu ihora i te arahu ura i roto, e te mea noˈanoˈa+ i nia iho. Pûpû aˈera ïa raua i mua ia Iehova i te mea noˈanoˈa na roto i te auahi ma te tano ore,+ ta ˈna i ore i faaue ia raua.
2 I reira iho, e auahi maira no mua mai ia Iehova e pau atura raua i te auahi,+ a pohe atu ai raua i mua ia Iehova.+
3 Parau ihora Mose ia Aarona: “Teie ta Iehova i parau: ‘E haamoˈahia vau i rotopu i te feia i pihai iho ia ˈu,+ e e faahanahanahia vau i mua i to ˈu nunaa taatoa.’” Mamû noa ihora Aarona.
4 Titau ihora Mose ia Misaela raua Elizaphana, na tamaiti a Uziela+ te teina o te metua tane o Aarona, e parau atura ia raua: “Haere mai, a hopoi i to orua na fetii mai mua ˈtu i te vahi moˈa i te tahi vahi i rapaeau i te puhapa.”
5 Haere maira ïa raua e hopoi ê atura i na tane i roto i to raua ahu roa i te tahi vahi i rapaeau i te puhapa, mai ta Mose i parau ia raua.
6 Parau ihora Mose ia Aarona e te tahi atu na tamaiti ta ˈna, o Eleazara raua Itamara: “E atuatu outou i to outou upoo e eiaha e hahae i to outou mau ahu,+ ia ore outou ia pohe e ia ore te Atua ia riri i te amuiraa taatoa. Na to outou mau taeae o te nunaa taatoa o Iseraela e taˈi i te feia ta Iehova i haapohe i te auahi.
7 Eiaha roa outou e haere i rapaeau i te tomoraa o te tiahapa o te amuiraa a pohe outou, to nia iho hoi ia outou ta Iehova monoˈi faatavai.”+ Rave ihora ïa ratou ia au i ta Mose i parau.
8 Na ô maira Iehova ia Aarona:
9 “Eiaha oe e ta oe na tamaiti e inu i te uaina aore ra i te tahi atu ava ia tomo outou i roto i te tiahapa o te amuiraa,+ ia ore outou ia pohe. E faatureraa mure ore teie no to outou mau uˈi.
10 Ia itehia hoi te taa-ê-raa i rotopu i te mea moˈa e te mea moˈa ore, e i rotopu i te mea viivii e te mea viivii ore,+
11 e ia haapiihia te ati Iseraela i te mau faaueraa atoa ta Iehova i parau ia ratou na roto ia Mose.”+
12 Paraparau ihora Mose ia Aarona e ia Eleazara raua Itamara ta ˈna na tamaiti e toe ra: “A rave i tei toe o te tusia huero maa no roto mai i te mau tusia pûpûhia ia Iehova na roto i te auahi e a amu i te reira i pihai iho i te fata ei pane hopue ore,+ no te mea mea moˈa roa te reira.+
13 E amu outou i te reira i roto i te hoê vahi moˈa,+ no te mea e tuhaa tera na oe e e tuhaa na ta oe na tamaiti no roto mai i te mau tusia pûpûhia ia Iehova na roto i te auahi, tera hoi tei faauehia mai ia ˈu.
14 E amu atoa outou i te ouma o te tusia taueuehia e te huha o te tuhaa moˈa+ i roto i te hoê vahi viivii ore, o oe e ta oe na tamaiti e ta oe mau tamahine,+ no te mea ua horoahia te reira ei tuhaa na oe e ei tuhaa na ta oe na tamaiti no roto mai i te mau tusia no te hau a te ati Iseraela.
15 E hopoi mai ratou i te huha o te tuhaa moˈa e te ouma o te tusia taueuehia e te mau tusia mii pûpûhia na roto i te auahi, no te taueue i te tusia taueuehia i mua ia Iehova, e e riro te reira ei tuhaa vai tamau na oe e ta oe na tamaiti,+ mai ta Iehova i faaue.”
16 Imi maite ihora Mose i te puaaniho o te tusia no te hara,+ e ite ihora e ua taninahia. Riri ihora ïa oia ia Eleazara raua Itamara na tamaiti a Aarona e toe ra, e na ô atura:
17 “Eaha orua i ore ai i amu i te tusia no te hara i roto i te vahi moˈa,+ mea moˈa roa hoi e ua horoa oia i te reira na outou ia nehenehe outou e amo i te hape a te amuiraa e e pûpû i te tusia faahau no ratou i mua ia Iehova?
18 Inaha, aita to ˈna toto i hopoihia i roto i te vahi moˈa.+ Ia amu hoi orua i te reira e tia ˈi i roto i te vahi moˈa, mai tei faauehia mai ia ˈu.”
19 Pahono maira Aarona ia Mose: “Inaha, i teie mahana ua pûpû raua i ta raua tusia no te hara e ta raua tusia taauahi i mua ia Iehova.+ Tera râ, ua roohia vau i teie ati. Ahiri au i amu i te tusia no te hara i teie mahana, e mauruuru anei Iehova i te reira?”
20 I to Mose faarooraa i te reira, farii ihora oia.
