Levitiko 21:1-24
21 Na ô faahou maira Iehova ia Mose: “A paraparau i te mau tahuˈa, ta Aarona na tamaiti, e a na ô atu: ‘Eiaha hoê e haaviivii ia ˈna no te tahi taata pohe i rotopu i te nunaa.+
2 E nehenehe râ oia e na reira no te hoê fetii piri, to ˈna metua vahine, to ˈna metua tane, ta ˈna tamaiti, ta ˈna tamahine, to ˈna taeae,
3 e e nehenehe oia e haaviivii ia ˈna no to ˈna tuahine aita i taoto aˈenei i te hoê tane e o te faaea ra i ǒ ˈna, e aita â i faaipoipo atura.
4 Eiaha oia e haaviivii ia ˈna no te hoê vahine tei faaipoipo i te hoê tane o te nunaa, a ore atu ai e moˈa faahou.
5 Eiaha ratou e hahu i to ratou upoo,+ eiaha atoa e hahu i na hiti o to ratou taa, eiaha atoa to ratou tino ia mutumutu ia ratou.+
6 Ei feia moˈa ratou no to ratou Atua,+ e eiaha ratou e haafaufaa ore i te iˈoa o to ratou Atua,+ na ratou hoi e hopoi mai i te mau tusia e pûpûhia ia Iehova na roto i te auahi, oia hoi te maa na to ratou Atua, e ia moˈa ratou.+
7 Eiaha ratou e faaipoipo i te hoê vahine taiata,+ te hoê vahine tei haaviiviihia, aore ra te hoê vahine tei taa i ta ˈna tane,+ no te mea mea moˈa te tahuˈa no to ˈna Atua.
8 E haamoˈa oe ia ˈna,+ no te mea na ˈna e hopoi mai i te maa e pûpûhia i to oe Atua. Ei taata moˈa oia no oe, no te mea mea moˈa vau, o Iehova, o te haamoˈa nei ia oe.+
9 “‘Ia haaviivii te tamahine a te hoê tahuˈa ia ˈna ma te rave i te peu taiata, te haaviivii ra ïa oia i to ˈna metua tane. E taninahia oia.+
10 “‘Te tahuˈa rahi i rotopu i to ˈna mau taeae, ua niniihia te monoˈi faatavai i nia i to ˈna upoo+ e ua faatoroahia* no te oomo i te mau ahu tahuˈa,+ eiaha ïa e atuatu ore i to ˈna upoo aore ra e hahae i to ˈna mau ahu.+
11 Eiaha oia e tapiri atu i te hoê taata pohe.+ Eiaha oia e haaviivii ia ˈna no to ˈna metua tane aore ra metua vahine.
12 Eiaha oia e haere i rapae mai roto atu i te nao* e eiaha oia e haaviivii i te nao o to ˈna Atua,+ tei nia iho hoi ia ˈna te tapao no te pûpûraa, te monoˈi faatavai a to ˈna Atua.+ O vau o Iehova.
13 “‘E rave oia ei vahine faaipoipo na ˈna i te hoê vahine aita i taoto aˈenei i te hoê tane.+
14 Eiaha oia e faaipoipo i te hoê vahine ivi, te hoê vahine tei taa i ta ˈna tane, tei haaviiviihia, aore ra te hoê vahine taiata. E rave râ oia mai roto mai i to ˈna nunaa i te hoê vahine aita i taoto aˈenei i te hoê tane ei vahine faaipoipo na ˈna.
15 Eiaha oia e haaviivii i to ˈna huaai i rotopu i te nunaa,+ o vau hoi o Iehova o te haamoˈa nei ia ˈna.’”
16 Paraparau noa maira Iehova ia Mose, a na ô ai:
17 “A parau ia Aarona: ‘Te hoê tane o to huaai, e hope noa ˈtu to ratou mau uˈi, e ino to nia iho i to ˈna tino, eiaha e faafatata mai no te hopoi mai i te maa e pûpûhia i to ˈna Atua.
18 Te tane e ino to nia iho i to ˈna tino, eiaha o ˈna e faafatata mai: e matapo, e pirioi, mea fefe to ˈna vaha e ihu, mea roa roa hoê o to ˈna avae aore ra rima,
19 e tane avae fati aore ra rima fati,
20 e tua puu, e tane haa,* e tane mata maˈi, e maˈi maero aore ra e maˈi o te iri upoo to ˈna, aore ra tei perehu te hua.+
21 Eiaha te hoê tane o te huaai o Aarona te tahuˈa e ino to nia iho i to ˈna tino e faafatata mai no te hopoi mai i te mau tusia e pûpûhia ia Iehova na roto i te auahi. No te mea e ino to nia iho i to ˈna tino, eiaha oia e faafatata mai no te hopoi mai i te maa e pûpûhia i to ˈna Atua.
22 E nehenehe oia e amu i te maa e pûpûhia i to ˈna Atua no roto mai i te mau mea moˈa roa ˈˈe+ e no roto mai i te mau mea moˈa.+
23 Teie râ, eiaha oia e tapiri mai i te paruru,+ e eiaha oia e faafatata mai i te fata,+ no te mea e ino to nia iho ia ˈna, e eiaha oia e haaviivii i to ˈu nao,+ o vau hoi o Iehova, o te haamoˈa nei i te reira.’”+
24 Paraparau atura ïa Mose ia Aarona e ta ˈna na tamaiti e te ati Iseraela taatoa.
