Levitiko 22:1-33
22 Paraparau faahou maira Iehova ia Mose, a na ô ai:
2 “A parau ia Aarona e ta ˈna na tamaiti ia haapao maitai i ta ratou huru raveraa* i te mau mea moˈa ta te ati Iseraela e haamoˈa e e pûpû mai ia ˈu,+ e eiaha e haafaufaa ore i to ˈu iˈoa moˈa.+ O vau o Iehova.
3 A na ô atu: ‘E hope noa ˈtu to outou mau uˈi, te taata o to outou huaai, a viivii ai oia, o te tapiri atu i te mau mea moˈa ta te ati Iseraela e haamoˈa e e pûpû ia Iehova, ia haapohehia taua taata ra mai mua ia ˈu.+ O vau o Iehova.
4 Te tane o to Aarona huaai e lepera to ˈna+ aore ra e tahe mai te tahi mea no te maˈi no roto mai ia ˈna,+ eiaha oia e amu i te mau mea moˈa tae roa i te taime mea viivii ore ai oia,+ te tane atoa o te tapea i te tahi taata tei viivii i te hoê taata pohe,+ te hoê tane ua tahe mai to ˈna pape tane,+
5 te hoê tane o te tapea i te hoê animara viivii o te aere+ aore ra o te tapea i te tahi atu tane tei viivii no te mau tumu rau, a viivii atu ai oia.+
6 E viivii te taata o te tapea i te hoê o teie mau mea e ahiahi noa ˈtu, e eiaha oia e amu i te hoê o te mau mea moˈa, e hopu râ oia ia ˈna i te pape.+
7 Ua mairi anaˈe te mahana, mea viivii ore ïa oia. I muri iho oia e nehenehe ai e amu vetahi o te mau mea moˈa no te mea e maa na ˈna tera.+
8 Eiaha atoa oia e amu i te tahi animara tei pohe ê na aore ra tei hahaehia e te mau animara oviri, a viivii atu ai i te reira.+ O vau o Iehova.
9 “‘E haapao ratou i ta ˈu i faaue atu, ia ore ratou ia hara no te haapao ore e ia pohe no te reira, no te mea ua haaviivii ratou i te mau mea moˈa. O vau o Iehova, o te haamoˈa nei ia ratou.
10 “‘Eiaha te taata e ere i te tahuˈa* e amu i te tahi mea moˈa.+ Eiaha te taata ěê e parahi ra i ǒ te hoê tahuˈa aore ra te hoê rave ohipa tei tarahuhia e amu i te tahi mea moˈa.
11 Ia hoo mai râ te hoê tahuˈa i te tahi taata i ta ˈna iho moni, e nehenehe taua taata ra e amu atoa i te mea moˈa. E nehenehe atoa te mau tavini fanauhia i roto i to ˈna utuafare e amu atoa i ta ˈna maa.+
12 Ia faaipoipo te tamahine a te hoê tahuˈa i te hoê tane e ere i te tahuˈa,* eiaha oia e amu i te ô no roto i te mau mea moˈa.
13 Ia riro râ te tamahine a te hoê tahuˈa ei ivi aore ra ua taa i ta ˈna tane e aita to ˈna e huaai e e hoˈi oia i te fare o to ˈna metua tane i reira oia i te oraraa i to ˈna apîraa, e nehenehe oia e amu i te maa a to ˈna metua tane.+ Eiaha râ te tahi taata e ere i te tahuˈa* e amu i te reira.
14 “‘Ia hape te hoê taata i te amuraa i te tahi mea moˈa, e horoa ïa oia i te tahi atu tusia moˈa i te tahuˈa e oia atoa hoê tuhaa i nia e pae o te hoo o te reira.+
15 Eiaha ïa ratou e haaviivii i te mau mea moˈa ta te ati Iseraela e horoa ei ô na Iehova,+
16 a roohia te ati Iseraela i te utua no ta ratou hapa i te amuraa i ta ratou mau mea moˈa, o vau hoi o Iehova, o te haamoˈa nei ia ratou.’”
17 Paraparau noa maira Iehova ia Mose, a na ô ai:
18 “A paraparau ia Aarona e ta ˈna na tamaiti e pauroa te ati Iseraela e a na ô atu: ‘Ia hopoi mai te hoê ati Iseraela aore ra te hoê taata ê e parahi ra i Iseraela i te hoê tusia taauahi+ ia Iehova no te rave i ta ˈna i euhe aore ra no te pûpû i te hoê ô horoa noa,+
19 e hopoi mai oia i te hoê puaatoro oni oraora maitai+ no roto mai i te nǎnǎ, te mau mamoe oni apî aore ra te mau puaaniho, ia fariihia oia.
20 Eiaha outou e hopoi mai i te animara e ino to nia iho,+ e ere hoi i te reira e fariihia ˈi outou.
21 “‘Ia hopoi mai te hoê taata i te hoê tusia no te hau+ ia Iehova no te rave i ta ˈna i euhe aore ra ei ô horoa noa, ei animara oraora maitai ïa no roto mai i te nǎnǎ puaatoro aore ra te nǎnǎ mamoe aore ra puaaniho, e fariihia ˈi oia. Eiaha roa ˈtu e ino to nia iho i taua animara ra.
22 Eiaha ei animara matapo, ua fati te ivi, ua mutu, e iritona, e una aore ra e maˈi iri afii to te reira. Eiaha oe e hopoi mai i te hoê o teie mau animara ia Iehova aore ra i te hoê tusia mai tera i nia i te fata na Iehova.
23 E nehenehe oe e hopoi mai i te hoê puaatoro oni aore ra te hoê mamoe mea roa roa aore ra mea poto roa hoê avae ei ô horoa noa, eita râ te reira e fariihia ei tusia euhe.
24 Eiaha outou e hopoi mai ia Iehova i te hoê animara ua paruparu aore ra ua perehu te hua aore ra ua patehehia, e eiaha outou e pûpû i tera mau huru animara i to outou fenua.
25 Eiaha outou e hopoi mai i te hoê o teie mau animara mai roto mai i te rima o te hoê taata ê ei maa e pûpûhia i to outou Atua, mea viivii hoi te reira e e ino to nia iho. Eita te reira e fariihia.’”
26 Paraparau faahou maira Iehova ia Mose, a na ô ai:
27 “Ia fanauhia mai te hoê puaatoro oni aore ra fanauˈa mamoe oni aore ra puaaniho, e faaea oia e te maiaa e hitu mahana.+ Mai te vaˈu râ o te mahana e fariihia ˈi te reira ei ô, ei tusia pûpûhia ia Iehova na roto i te auahi.
28 No te puaatoro aore ra te mamoe, eiaha outou e tupai i te maiaa e ta ˈna fanauˈa i te hoê â mahana.+
29 “Ia pûpû outou ei tusia i te hoê tusia haamauruuru ia Iehova,+ ia tano ïa ta outou pûpûraa i te reira a fariihia ˈtu ai outou.
30 E amuhia taua tusia ra i taua mahana ra. Eiaha outou e vaiiho i te tahi e poipoi noa ˈtu.+ O vau o Iehova.
31 “E auraro outou i ta ˈu mau faaueraa e e haapao outou i te reira.+ O vau o Iehova.
32 Eiaha outou e haafaufaa ore i to ˈu iˈoa moˈa,+ e e haamoˈahia vau i rotopu i te ati Iseraela.+ O vau o Iehova, o te haamoˈa nei ia outou,+
33 tei aratai ra ia outou i rapae i te fenua o Aiphiti no te faaite ia outou o vau te Atua.+ O vau o Iehova.”
Nota i raro i te api
^ Heb: “ia faataa ê mai ia ratou.”
^ Heb: “taata ê,” oia hoi e ere i te huaai o Aarona.
^ Aore ra “tane ê.”
^ Heb: “taata ê,” oia hoi e ere i te huaai o Aarona.