Levitiko 8:1-36
-
Faatoroaraa i te autahuˈaraa a Aarona (1-36)
8 Paraparau noa maira Iehova ia Mose, a na ô ai:
2 “A rave ia Aarona e ta ˈna mau tamaiti,+ te mau ahu,+ te monoˈi faatavai,+ te puaatoro oni o te tusia no te hara, na mamoe oni e piti, e te farii pane hopue ore,+
3 e a haaputuputu i te amuiraa taatoa i te tomoraa o te tiahapa o te amuiraa.”
4 Rave ihora Mose mai ta Iehova i faaue ia ˈna, e putuputu maira te amuiraa i te tomoraa o te tiahapa o te amuiraa.
5 Parau atura Mose i te amuiraa: “Teie ta Iehova i faaue mai ia rave.”
6 Haafatata maira ïa Mose ia Aarona e ta ˈna mau tamaiti e horoi ihora ia ratou i te pape.+
7 I muri iho, tuu ihora oia i te ahu roa+ i nia ia Aarona, taamu ihora i te hatua i nia ia ˈna,+ faaoomo ihora ia ˈna i te ahu aita e rima,+ tuu ihora i te tiputa+ i nia ia ˈna e taamu atura i te reira i te hatua raraahia+ o te tiputa, a mau maitai atu ai i nia ia ˈna.
8 Tuu atura oia i te tapoˈi ouma+ i nia ia ˈna e tuu ihora i te Urima e te Tumima+ i roto i te tapoˈi ouma.
9 Tuu ihora oia i te taamu upoo taa ê+ i nia i to ˈna upoo, e tuu atura i nia i te muaraa o te taamu upoo taa ê i te auro anaana tei tupaipaihia, te tapao moˈa no te pûpûraa,*+ mai ta Iehova iho â i faaue ia Mose.
10 Rave atura Mose i te monoˈi faatavai, faatavai atura i te sekene e te mau mea atoa i roto+ e haamoˈa ˈtura i te reira.
11 I muri iho, pîpî ihora oia maa vahi o te reira e hitu taime i nia i te fata, e faatavai atura i te fata e to ˈna mau taihaa atoa, e te tura e to ˈna vairaa no te haamoˈa i te reira.
12 Ninii ihora oia maa monoˈi faatavai i nia i te upoo o Aarona e faatavai atura ia ˈna no te haamoˈa ia ˈna.+
13 I muri iho, haafatata maira Mose i te mau tamaiti a Aarona, faaoomo ihora ia ratou i te mau ahu roa, taamu atura i te hatua i nia ia ratou, e tuu ihora i te taamu upoo i nia i to ratou upoo,+ mai ta Iehova i faaue ia Mose.
14 Putô maira oia i muri iho i te puaatoro oni o te tusia no te hara, e tuu ihora Aarona e ta ˈna mau tamaiti i to ratou rima i nia i te afii o te puaatoro oni o te tusia no te hara.+
15 Tupai ihora Mose i te puaatoro oni, rave ihora i te toto+ i to ˈna manimani rima, parai ihora i na tara e maha o te fata, e tamâ ihora i te fata i te hara. Area te toea o te toto, manii ihora oia i te raroraa o te fata, no te haamoˈa i te reira no te pûpû i te faahauraa i nia iho.
16 I muri iho, rave ihora oia pauroa te mii i nia iho i te aau, te puu o te upaa, e na mape e piti e to raua mii, e tutui ihora Mose i te reira a au auahi atu ai i nia i te fata.+
17 Faaue ihora oia ia taninahia tei toe mai o te puaatoro oni, to ˈna iri, to ˈna iˈo e to roto i to ˈna aau, i rapaeau i te puhapa,+ mai ta Iehova i faaue ia Mose.
18 Haafatata maira oia i muri iho i te mamoe oni o te tusia taauahi, e tuu ihora Aarona e ta ˈna mau tamaiti i to ratou rima i nia i te afii o te mamoe oni.+
19 Tupai atura Mose i te mamoe oni e pîpî ihora i te toto ati aˈe te fata.
20 Tâpûpû ihora oia i te mamoe oni, e tutui ihora Mose i te afii, e tei tâpûpûhia e te toâhua* a au auahi atu ai.
21 Horoi ihora oia i te aau e na avae i te pape, e tutui ihora Mose i te mamoe oni taatoa a au auahi atu ai i nia i te fata. E tusia taauahi ïa ei mea hauˈa noˈanoˈa au maitai.* E tusia pûpûhia ia Iehova na roto i te auahi, mai ta Iehova i faaue ia Mose.
22 Putô maira oia i te piti o te mamoe oni, te mamoe oni o te faatoroaraa,+ e tuu ihora Aarona e ta ˈna mau tamaiti i to ratou rima i nia i te afii o te mamoe oni.+
23 Tupai ihora Mose i te mamoe oni, rave ihora maa toto o te mamoe oni, e parai ihora i nia iho i te hiti o te tariˈa atau o Aarona e i nia iho i to ˈna manimani rima rahi atau e i nia i to ˈna manimani avae rahi atau.
24 I muri iho, haafatata maira Mose i te mau tamaiti a Aarona, e parai ihora maa toto i nia iho i te hiti o to ratou tariˈa atau e i nia iho i to ratou manimani rima rahi atau e i nia i to ratou manimani avae rahi atau. Pîpî ihora râ Mose i te toea o te toto ati aˈe te fata.+
25 Rave ihora oia i muri iho i te mii, te aero mii, pauroa te mii i nia iho i te aau, te puu o te upaa, na mape e piti e to raua mii, e te huha atau.+
26 Rave ihora oia i roto i te farii pane hopue ore to mua ia Iehova hoê pane hopue ore mai te hei ra,+ hoê pane tahinuhia mai te hei ra,+ e hoê pai. Tuu atura oia i te reira i nia iho i te mii e te huha atau.
27 I muri iho, tuu pauroa ihora oia i te reira i roto i na apu rima o Aarona e na apu rima o ta ˈna mau tamaiti, e taueue atura i te reira ei tusia taueuehia i mua ia Iehova.
28 Rave maira Mose i te reira mai roto mai i to ratou rima, e tutui atura a au auahi atu ai i nia i te fata na nia iho i te tusia taauahi. E tusia faatoroaraa te reira ei mea hauˈa noˈanoˈa au maitai.* E tusia ïa pûpûhia ia Iehova na roto i te auahi.
29 Rave ihora Mose i te ouma e taueue atura i te reira ei tusia taueuehia i mua ia Iehova.+ E tuhaa na Mose te ouma o te mamoe oni faatoroaraa, mai ta Iehova i faaue ia Mose.+
30 Rave ihora Mose maa monoˈi faatavai+ e maa toto e vai ra i nia i te fata, e pîpî atura i nia ia Aarona e to ˈna mau ahu e i nia i ta ˈna mau tamaiti e te ahu o ta ˈna mau tamaiti. Haamoˈa ihora ïa oia ia Aarona e to ˈna mau ahu e ta ˈna mau tamaiti+ e to ratou mau ahu.+
31 Parau atura Mose ia Aarona e ta ˈna mau tamaiti: “A vaipâ+ i te iˈo i te tomoraa o te tiahapa o te amuiraa, ta outou e amu i reira e te pane i roto i te farii faatoroaraa, mai tei faauehia iho â ia ˈu: ‘E amu Aarona e ta ˈna mau tamaiti i te reira.’+
32 E tanina outou i tei toe o te iˈo e te pane.+
33 Eiaha roa outou e haere i rapae i te tomoraa o te tiahapa o te amuiraa e hitu mahana, e hope noa ˈtu te mau mahana o to outou faatoroaraa, no te mea e hitu mahana no te faatoroa ia outou ei tahuˈa.*+
34 Ua faaue Iehova ia rave tatou i ta tatou i rave i teie mahana no te pûpû i te faahauraa no outou.+
35 E faaea outou i te tomoraa o te tiahapa o te amuiraa i te ao e te po e hitu mahana+ e e haapao outou i ta Iehova i faaue ia outou,+ ia ore outou ia pohe, tera hoi tei faauehia mai ia ˈu.”
36 Rave aˈera Aarona e ta ˈna mau tamaiti i ta Iehova atoa i faaue na roto ia Mose.
Nota i raro i te api
^ Aore ra “hei moˈa.”
^ Aore ra “te mii ati aˈe te mape.”
^ Aore ra “tamǎrû.” Heb: “faahau.”
^ Aore ra “tamǎrû.” Heb: “faahau.”
^ Heb: “no te faaî i to outou rima.”
