Levitiko 9:1-24
-
Pûpûraa Aarona i te tusia (1-24)
9 I te vaˈu o te mahana,+ titau ihora Mose ia Aarona e ta ˈna mau tamaiti e te mau matahiapo o Iseraela.
2 Parau atura oia ia Aarona: “A rave i te hoê fanauˈa puaatoro maitai no te tusia no te hara+ e te hoê mamoe oni oraora maitai no te tusia taauahi, e a hopoi mai ia raua i mua ia Iehova.
3 E parau râ oe i te ati Iseraela: ‘A rave i te hoê puaaniho oni oraora maitai no te tusia no te hara e te hoê fanauˈa puaatoro maitai e te hoê mamoe oni apî oraora maitai, hoê matahiti to ratou, no te tusia taauahi,
4 e te hoê puaatoro oni e te hoê mamoe oni no te mau tusia no te hau,+ no te pûpû ei tusia i mua ia Iehova, e te hoê tusia huero maa+ anoihia i te hinu, i teie hoi mahana e fa ˈtu ai Iehova ia outou.’”+
5 Hopoi maira ïa ratou i ta Mose i faaue i mua i te tiahapa o te amuiraa. Faafatata maira te amuiraa taatoa e tia aˈera i mua ia Iehova.
6 Parau atura Mose: “Teie ta Iehova i faaue ia outou ia rave, ia fa mai te hanahana o Iehova ia outou.”+
7 Parau atura Mose ia Aarona: “A tapiri i te fata, a hopoi mai i ta oe tusia no te hara+ e ta oe tusia taauahi, a pûpû i te faahauraa no oe+ e no to opu fetii, a hopoi mai i te tusia a te nunaa+ e a pûpû i te faahauraa no ratou,+ mai ta Iehova iho â i faaue.”
8 Tapiri oioi ihora Aarona i te fata e tupai atura i te fanauˈa puaatoro o te tusia no ta ˈna iho mau hara.+
9 Hopoi maira te mau tamaiti a Aarona i te toto+ ia ˈna ra, tutau ihora oia i to ˈna manimani rima i roto i te toto, parai atura i nia i te mau tara o te fata e manii ihora i te toea o te toto i te raroraa o te fata.+
10 Tutui ihora oia i te mii e na mape e te puu o te upaa o te tusia no te hara, a au auahi atu ai i nia i te fata, mai ta Iehova iho â i faaue ia Mose.+
11 Tanina ˈtura oia i te iˈo e te iri i rapaeau i te puhapa.+
12 I muri iho, tupai ihora oia i te tusia taauahi, horoa maira te mau tamaiti a Aarona i te toto ia ˈna ra e pîpî atura oia i te reira ati aˈe te fata.+
13 Horoa maira ratou i te tusia taauahi tei tâpûpûhia e te afii, e tutui ihora oia i te reira a au auahi atu ai i nia i te fata.
14 Horoi atoa ihora oia i te aau e na avae, e tutui ihora i te reira a au auahi atu ai i nia i te fata na nia iho i te tusia taauahi.
15 Pûpû ihora oia i muri iho i te tusia a te nunaa. Rave ihora oia i te puaaniho o te tusia no te mau hara a te nunaa, tupai ihora i te reira e pûpû ihora i te tusia no te hara mai te tusia matamua.
16 Pûpû ihora oia i te tusia taauahi ia au i te raveraa titauhia.+
17 Pûpû ihora oia i muri iho i te tusia huero maa,+ a faaî ai i to ˈna rima maa vahi o te reira e a tutui ai i te reira a au auahi atu ai i nia i te fata, hau atu i te tusia taauahi o te poipoi.+
18 I muri iho, tupai ihora oia i te puaatoro oni e te mamoe oni o te tusia no te hau no te nunaa. Horoa maira te mau tamaiti a Aarona i te toto ia ˈna ra, e pîpî atura oia i te reira ati aˈe te fata.+
19 No te mau vahi mii o te puaatoro oni,+ te aero mii o te mamoe oni, te mii i nia iho i te aau, na mape, e te puu o te upaa,+
20 tuu aˈera ratou i taua mau vahi mii atoa ra i nia iho i te ouma o na animara, e tutui atura oia i te mau vahi mii a au auahi atu ai i nia i te fata.+
21 Taueue ihora râ Aarona i te ouma e te huha atau o na animara ei tusia taueuehia i mua ia Iehova, mai ta Mose iho â i faaue.+
22 Toro ihora Aarona i to ˈna rima i te nunaa ra, haamaitai atura ia ratou,+ e pou maira i muri iho i to ˈna pûpûraa i te tusia no te hara e te tusia taauahi e te mau tusia no te hau.
23 Tomo atura Mose raua Aarona i roto i te tiahapa o te amuiraa, haere maira i rapaeau e haamaitai aˈera i te nunaa.+
Fa maira to Iehova hanahana i te nunaa taatoa,+
24 e e auahi maira no ǒ mai ia Iehova+ e pau ihora te tusia taauahi e te mau vahi mii i nia i te fata i te auahi. I te iteraa te nunaa taatoa i te reira, tuô aˈera ratou e tipapa ihora te mata i raro i te repo.+
