Te faatiaraa a Mareko 10:1-52
-
Faaipoiporaa e faataaraa (1-12)
-
Haamaitai Iesu i te mau tamarii (13-16)
-
Uiraa a te hoê taata taoˈa rahi (17-25)
-
Haapaeraa no te Faatereraa arii (26-31)
-
Tohu-faahou-hia to Iesu pohe (32-34)
-
Aniraa a Iakobo raua Ioane (35-45)
-
E hoo Iesu no te taata e rave rahi (45)
-
-
Faaorahia te mata o Baretimaio (46-52)
10 Tia aˈera Iesu i reira, haere atura i te otia fenua o Iudea i tera ˈtu pae o Ioridana. Ruru faahou maira te nahoa ia ˈna ra e mai ta ˈna i matau, haapii atura oia ia ratou.+
2 Tapiri maira te mau Pharisea no te râmâ ia ˈna, e ui maira e mea tano anei ia au i te Ture ia faataa te hoê tane i ta ˈna vahine faaipoipo.+
3 Pahono atura oia: “Eaha ta Mose i faaue ia outou?”
4 Na ô maira ratou: “Ua vaiiho Mose ia papai te hoê tane i te tahi parau tuuraa ia faataa oia i ta ˈna vahine faaipoipo.”+
5 Parau atura râ Iesu: “No te etaeta o to outou aau+ i papai ai oia i teie ture no outou.+
6 I te omuaraa râ i to te Atua poieteraa i te taata, ‘ua poiete oia i te tane e te vahine.+
7 No reira te tane e faarue ai i to ˈna metua tane e to ˈna metua vahine,+
8 e riro raua ei hoê.’+ E ere atura ïa raua e piti, hoê râ.
9 No reira, o ta te Atua i taati, eiaha te taata e faataa ê.”+
10 Tei roto noa â ratou i te fare, ui maira te mau pǐpǐ ia ˈna no nia i te reira.
11 Na ô atura oia: “O te faataa i ta ˈna vahine faaipoipo, a faaipoipo atu ai i te tahi atu, ua faaturi ïa+ e ua taiva i te vahine matamua,
12 e ia faataa noa ˈtu te hoê vahine i ta ˈna tane faaipoipo, a faaipoipo atu ai i te tahi atu, ua faaturi atoa ïa.”+
13 Aratai maira te tahi mau taata i te mau tamarii ia Iesu ra ia tuu oia i to ˈna rima i nia ia ratou, tamaˈi aˈera râ te mau pǐpǐ ia ratou.+
14 I to Iesu iteraa ˈtu, aita oia i mauruuru e na ô atura i te mau pǐpǐ: “A vaiiho noa i te mau tamarii ia haere mai ia ˈu nei, eiaha e tapea ˈtu, no te feia hoi mai teie mau tamarii te Faatereraa arii a* te Atua.+
15 Oia mau ta ˈu e parau atu: Te taata e ore e farii i te Faatereraa arii a te Atua mai te hoê tamarii, eita roa ˈtu ïa e ô i roto.”+
16 Tauahi ihora Iesu i te mau tamarii e haamaitai atura ia ratou, ma te tuu i to ˈna rima i nia iho ia ratou.+
17 A haere atu ai Iesu, horo maira te hoê taata, tuturi ihora i mua ia ˈna e ui maira: “Orometua maitai, eaha ta ˈu e rave e noaa ˈi ia ˈu te ora mure ore?”+
18 Na ô atura Iesu: “Eaha oe e pii ai ia ˈu e Orometua maitai? Aita hoê aˈe e mea maitai, o te Atua anaˈe râ.+
19 Ua ite oe i te mau faaueraa: ‘Eiaha roa e taparahi pohe i te taata,+ eiaha roa e faaturi,+ eiaha roa e eiâ,+ eiaha roa e pari haavare,+ eiaha e taviri i te taata,+ a faatura i to metua tane e to metua vahine.’”+
20 Na ô maira taua taata ra: “Orometua, ua hope ia ˈu i te haapao i teie mau parau atoa mai to ˈu apîraa mai â.”
21 Hiˈo ihora Iesu ia ˈna ma te here e parau atura: “Hoê noa mea e toe ra ia oe: A haere a hoo i ta oe mau taoˈa, a horoa ˈtu ai i te moni na te feia veve, e taoˈa ïa ta oe i nia i te raˈi, e a pee mai ia ˈu.”+
22 Peapea ihora râ oia no taua parau ra e haere atura ma te oto, mea rahi hoi ta ˈna faufaa.+
23 Hiˈo ihora Iesu ati aˈe ia ˈna e na ô atura i ta ˈna mau pǐpǐ: “Mea fifi mau â no te feia mea rahi ta ratou moni ia ô i roto i te Faatereraa arii a te Atua!”+
24 Maere ihora râ te mau pǐpǐ i ta ˈna parau. Na ô atura Iesu: “Ta ˈu mau tamarii, mea fifi mau â ia ô i roto i te Faatereraa arii a te Atua!
25 Mea ohie aˈe no te hoê kamela ia ô i roto i te hoê apoo nira, i te hoê taata taoˈa rahi ia ô i roto i te Faatereraa arii a te Atua.”+
26 Rahi roa ihora to ratou maere e na ô maira ia ˈna:* “O vai ïa te nehenehe e ora ˈtu?”+
27 Hiˈo tia ˈtura Iesu ia ratou e na ô atura: “I te taata, e ore e tia, i te Atua râ, oia ïa, e tia hoi i te Atua te mau mea atoa.”+
28 Parau maira Petero ia Iesu: “Inaha, ua haapae matou i te mau mea atoa e ua pee mai ia oe.”+
29 Na ô atura Iesu: “Oia mau ta ˈu e parau atu: Te taata atoa tei haapae i to ˈna fare, to ˈna taeae, tuahine, metua vahine, metua tane, tamarii aore ra fenua no ˈu nei e no te parau apî oaoa,+
30 e hamani-ino-hia ïa.+ E fanaˈo râ oia tataihanere i teie nei â, te fare, te taeae, te tuahine, te metua vahine, te tamarii e te fenua, e i roto i te ao* no a muri aˈe, te ora mure ore ïa.
31 E rave rahi râ to mua te riro no muri, e to muri no mua.”+
32 A pauma ˈi Iesu e ta ˈna mau pǐpǐ i Ierusalema, o ˈna to mua, maere ihora te mau pǐpǐ. Te tahi atu râ e pee mai ra, ua mǎtaˈu ïa. Aratai rii ê atura Iesu i na 12 e faaite atura i ta ˈna e fatata i te faaruru:+
33 “Inaha, te pauma nei tatou i Ierusalema, e tuuhia te Tamaiti a te taata nei i te rima o te mau tahuˈa tiaau e te mau papai parau. E faautua ratou ia ˈna i te pohe, a tuu atu ai ia ˈna i te feia o te mau nunaa ěê
34 ia faaooohia, ia tutuhahia, ia huihia e ia haapohehia, i te toru râ o te mahana e tia faahou mai oia.”+
35 Haere maira o Iakobo raua Ioane na tamaiti a Zebedaio+ ia Iesu ra e na ô maira: “Orometua, te hinaaro nei mâua ia rave oe i ta mâua e ani atu.”+
36 Na ô atura Iesu ia raua: “Eaha ta orua e hinaaro ia rave au no orua?”
37 Parau maira raua: “A faatia ia parahi mâua i roto i to oe hanahana, hoê i to rima atau e te tahi i to rima aui.”+
38 Na ô atura râ Iesu: “Aita orua i ite i ta orua e ani mai nei. E haere anei ia orua ia inu i ta ˈu e fatata i te inu, aore ra ia bapetizohia mai ia ˈu nei e fatata i te bapetizohia?”+
39 Parau maira raua: “E haere ia mâua.” Na ô atura Iesu: “E inu orua i ta ˈu e inu e e bapetizohia orua mai ia ˈu nei e bapetizohia.+
40 Te parahiraa râ i to ˈu rima atau aore ra i to ˈu rima aui, e ere na ˈu e horoa ˈtu, no te feia râ no ratou i faaineinehia ˈi teie na parahiraa.”
41 I to te tahi atu mau pǐpǐ hoê ahuru faarooraa i te reira, inoino ihora ratou ia Iakobo e ia Ioane.+
42 Pii ihora râ Iesu ia ratou ia haere mai e na ô atura: “Ua ite outou e te faatere ra te mau arii o teie nei ao i te mau nunaa o te haavî-atoa-hia ra e te feia mana.+
43 Eiaha roa mai tera i rotopu ia outou, o tei hinaaro hoi ia rahi oia i rotopu ia outou, ia riro ïa ei tavini no outou e tia ˈi,+
44 e o tei hinaaro o ˈna na mua i rotopu ia outou, ia riro ïa ei tavini no outou paatoa.
45 Ua haere mai hoi te Tamaiti a te taata nei eiaha ia tavinihia oia, no te tavini râ+ e no te horoa i to ˈna ora* ei hoo* no te taata e rave rahi.”+
46 Tomo atura Iesu e ta ˈna mau pǐpǐ i Ieriko. A haere mai ai râ ratou e te hoê nahoa rahi i rapae ia Ieriko, te parahi noa ra i te pae purumu te hoê matapo e taparu haere ra, o Baretimaio te iˈoa, e tamaiti na Timaio.+
47 I to ˈna faarooraa e o Iesu no Nazareta tera e haere mai ra, pii maira oia: “Iesu, Tamaiti a Davida,+ aroha* mai ia ˈu!”+
48 Tamaˈi aˈera e rave rahi ia ˈna ia mamû oia, puai noa ˈtu â râ to ˈna tuôraa: “Tamaiti a Davida, aroha* mai ia ˈu!”
49 Tia noa ihora ïa Iesu e na ô atura: “A pii ia ˈna.” Parau aˈera ratou i taua matapo ra: “A faaitoito! A tia mai, te pii mai ra oia ia oe.”
50 Faarue ihora te matapo i to ˈna ahu tapoˈi, tia taue maira e haere maira ia Iesu ra.
51 Na ô atura Iesu ia ˈna: “Eaha ta oe e hinaaro ia rave au no oe?” Parau maira te matapo: “Raboni,* ia ite faahou vau.”
52 Na ô atura Iesu: “A haere. No to oe faaroo i ora ˈi oe.”+ Ite faahou ihora oia+ e pee maira ia Iesu.
Nota i raro i te api
^ Aore ra “Basileia o.”
^ Huri-atoa-hia “na ô aˈera te tahi i te tahi.”
^ Aore ra “aroha hamani maitai.”
^ Aore ra “aroha hamani maitai.”
^ “Orometua” te auraa.
