Te faatiaraa a Mareko 15:1-47
15 I te aahiata, putuputu aˈera te mau tahuˈa tiaau, te mau aratai ati Iuda e te mau papai parau, oia hoi te Sunederi taatoa. Taamu aˈera ratou ia Iesu, aratai atura ia ˈna e tuu atura ia Pilato ra.+
2 Ui maira ïa Pilato ia Iesu: “O oe anei te Arii o te ati Iuda?”+ Pahono atura oia: “Na oe noa iho â e parau ra.”+
3 Mea rahi râ te pariraa a te mau tahuˈa tiaau ia ˈna.
4 Ui faahou maira Pilato ia Iesu: “Eita oe e pahono?+ Mea rahi hoi ta ratou pariraa ia oe.”+
5 Aita râ Iesu i pahono faahou, a maere roa ˈi Pilato.+
6 I te mau oroa Pasa atoa, ua matau Pilato i te tuu mai i te hoê taata tapeahia ta te nahoa e ani.+
7 I taua mau mahana ra, ua tapeahia te hoê taata, o Baraba te iˈoa, e te tahi atu mau orure hau tei haapohe atoa i te taata i ta ratou orureraa hau.
8 Haere maira ïa te nahoa e ani maira ia Pilato i ta ˈna i matau i te rave no ratou.
9 Pahono atura oia: “Hinaaro outou ia tuu atu vau i te Arii o te ati Iuda?”+
10 Ua ite hoi Pilato e no te pohehae i tuu ai te mau tahuˈa tiaau ia Iesu ia ˈna ra.+
11 Onoono aˈera râ te mau tahuˈa tiaau i te nahoa ia ani ia Pilato ia tuu mai ia Baraba, eiaha râ ia Iesu.+
12 Na ô faahou atura Pilato: “E nafea ïa vau i te taata ta outou e parau ra te Arii o te ati Iuda?”+
13 Tuô noa ˈtura ratou: “I nia i te pou!”*+
14 Parau faahou atura râ Pilato: “No te aha hoi? E ohipa ino ta ˈna i rave?” Puai roa ˈtura râ ta ratou tuôraa: “I nia i te pou!”*+
15 Tuu atura Pilato ia Baraba ia mauruuru te nahoa. Faaue ihora oia ia huihia Iesu+ e tuu atura ia ˈna i te mau faehau ia haapohehia i nia i te pou.+
16 Aratai aˈera te mau faehau ia ˈna i roto i te aua, oia hoi i roto i te aorai o te tavana, e titau aˈera i te taatoaraa o te mau pǔpǔ faehau.+
17 Faaahu aˈera ratou ia ˈna i te ahu vareau, firi aˈera i te hoê hei taratara e tuu atura i nia i to Iesu upoo.
18 Na ô maira ratou: “Ia ora na* te Arii o te ati Iuda!”+
19 Tairi atoa maira ratou i to ˈna upoo i te aeho, tutuha aˈera i nia ia ˈna, tuturi ihora e piˈo roa ihora i mua ia ˈna.
20 I muri aˈe i to ratou faaoooraa ia ˈna, tatara aˈera ratou i te ahu roa vareau, faaahu ihora ia ˈna i to ˈna iho ahu tapoˈi e aratai atura ia ˈna i rapae ia patitihia i nia i te pou.+
21 Faahepo atoa ˈtura ratou i te hoê taata e haere ra na reira, na te mataeinaa maira, ia amo i te pou haamauiuiraa* o Iesu. O Simona no Kurene, te metua tane o Alesanedero raua Rupho.+
22 Afai atura ratou ia Iesu i te vahi parauhia Gologota, e “Apu upoo” te auraa ia hurihia.+
23 I reira, tamata ˈtura ratou i te horoa ˈtu i te uaina anoihia i te mura, te hoê raau taero,+ aita râ oia i rave.
24 Patiti aˈera ratou ia ˈna i nia i te pou e opere atura i to ˈna mau ahu ma te tuu i te kelero no te faaoti eaha ta te faehau tataitahi e rave.+
25 Tei te area hora 9* i patiti ai ratou ia ˈna i nia i te pou.
26 Ua papaihia i nia noa mai i to ˈna upoo tei parihia ia ˈna: “Te Arii o te ati Iuda.”+
27 E piti atoa eiâ tei patitihia i nia i te pou i pihai iho ia ˈna, hoê i to ˈna pae atau e hoê i to ˈna pae aui.+
28 *——
29 Faaino maira te feia e haere ra na reira ia ˈna, a tairiiri ai i te upoo+ e a na ô ai: “Era ˈtu te taata tei hinaaro e vavahi i te hiero e e patu i te reira e toru mahana.+
30 A faaora ia oe iho, a pou mai i raro i tena pou haamauiuiraa.”*
31 Faaooo atoa maira te mau tahuˈa tiaau e te mau papai parau ia ˈna, a na ô ai te tahi i te tahi: “Ua faaora o ˈna ia vetahi ê, eita râ ta ˈna e nehenehe e faaora ia ˈna iho!+
32 Ia pou mai te Mesia, te Arii o Iseraela, i teie nei i raro i te pou haamauiuiraa,* ia ite hoi matou a tiaturi atu ai ia ˈna.”+ Faaino atoa maira na eiâ tei patitihia i nia i te pou i pihai iho ia ˈna.+
33 Mai te hora 12 mai â i te avatea,* ati ihora te fenua taatoa i te poiri e tae atu i te hora 3.*+
34 E i te hora 3, tuô ihora Iesu: “Eli, Eli, lama sabakatani?” teie te auraa ia hurihia: “To ˈu Atua, to ˈu Atua, eaha oe i faarue mai ai ia ˈu?”+
35 I te faarooraa ˈtu vetahi e tia noa ra na reira, na ô aˈera ratou: “Faaroo na! Te pii ra o ˈna ia Elia.”
36 Horo ihora te hoê taata e tutau i te rimu i roto i te uaina toavaava, tuu ihora i nia i te hoê aeho e horoa ˈtura ia Iesu ra ia inu oia,+ a na ô ai: “Vaiiho noa ia ˈna! E hiˈo tatou e e haere mai anei Elia e haapou ia ˈna i raro.”
37 Tuô ihora râ Iesu e pohe atura.*+
38 Mahae ihora te paruru o te nao*+ mai nia mai e raro roa.+
39 I te iteraa te raatira faehau e tia ra i mua ia Iesu i te mau mea e tupu ra i to ˈna poheraa, na ô ihora oia: “O te Tamaiti a te Atua iho â teie taata.”+
40 E vahine atoa te hiˈo mai ra na te atea mai. I rotopu ia ratou, te vai ra o Maria Magadala, Maria te metua vahine o Iakobo iti raua Iose e o Salome,+
41 tei apee na ia Iesu i Galilea e tei tauturu na ia ˈna+ i reira. Mea rahi atu â te vahine tei pauma atoa na muri ia ˈna i Ierusalema.
42 Ua ahiahi ê na i taua taime ra e no te mea e mahana Faaineineraa, oia hoi te mahana hou te Sabati,
43 haere maira Iosepha Arimataio, mero faaturahia no te Sunederi o te tiai atoa ra i te Faatereraa arii a* te Atua. Faaitoito ihora oia i te haere i mua ia Pilato e ani maira i te tino o Iesu.+
44 Hinaaro ihora râ Pilato e ite e ua pohe anei Iesu aore ra aita, titau ihora oia i te raatira faehau e ani atura ia ˈna.
45 I to ˈna papuraa e ua pohe Iesu, faatia ˈtura oia ia Iosepha ia rave i te tino.
46 Hoo maira Iosepha i te ahu lino maitai, haapou maira i te tino i raro, vehî atura i te ahu lino maitai, tuu ihora i roto i te hoê menema*+ tei paohia i roto i te mato e turai atura i te hoê ofai i mua i te uputa o te menema.+
47 Area Maria Magadala raua Maria te metua vahine o Iose, hiˈo noa ˈtura ïa i te vahi i vaiihohia ˈi to Iesu tino.+
Nota i raro i te api
^ Aore ra “Haapohe ia ˈna i nia i te pou!”
^ Aore ra “Haapohe ia ˈna i nia i te pou!”
^ Aore ra “Maeva.”
^ Hel: “I te toru o te hora.”
^ Hiˈo i te tuhaa hau A3.
^ Hel: “i te ono o te hora.”
^ Hel: “i te iva o te hora.”
^ Aore ra “huti atura i to ˈna hutiraa aho hopea.”
^ Aore ra “Basileia o.”
^ Aore ra “menema haamanaˈoraa.”
