Numera 12:1-16
12 Haamata aˈera râ Miriama raua Aarona i te faaino ia Mose no te vahine ati Kusa ta ˈna i faaipoipo, ua rave hoi oia i te hoê ati Kusa ei vahine faaipoipo+ na ˈna.
2 Te parau ra raua: “Mea na roto noa anei ia Mose i paraparau ai Iehova? Aita anei oia i paraparau atoa na roto ia tâua?”+ Te faaroo noa ra Iehova.+
3 O Mose râ te taata mǎrû roa ˈˈe o te mau taata atoa*+ i nia i te fenua.
4 I reira iho, na ô maira Iehova ia Mose e ia Aarona raua Miriama: “A haere outou e toru i te tiahapa o te amuiraa.” Haere aˈera ïa ratou e toru.
5 Pou maira Iehova na roto i te pou ata,+ tia ihora i te tomoraa o te tiahapa e pii maira ia Aarona raua Miriama. Tapiri maira raua.
6 Na ô maira oia: “A faaroo mai na i ta ˈu mau parau. Ahiri e peropheta na Iehova to rotopu ia outou, e faaite au ia ˈu iho ia ˈna na roto i te tahi orama,+ e e paraparau vau ia ˈna na roto i te tahi moemoeâ.+
7 E ere râ mai tera no ta ˈu tavini o Mose! Ua horoahia ˈtu ia ˈna to ˈu utuafare taatoa.*+
8 E paraparau vau ia ˈna e aro e aro*+ ma te faaite roa ˈtu i te parau, eiaha râ na roto i te piri. E te hohoˈa o Iehova, o ta ˈna ïa e ite. No te aha ïa orua i ore ai i mǎtaˈu i te faaino i ta ˈu tavini ia Mose?”
9 Ura ihora ïa to Iehova riri ia raua, e faarue maira ia ratou.
10 Pee aˈera te ata mai nia ˈˈe i te tiahapa, e inaha, ua tairihia Miriama i te lepera mai te hiona ra te uouo.+ Fariu atura Aarona ia Miriama, e ite ihora e ua tairihia oia i te lepera.+
11 I reira iho, parau maira Aarona ia Mose: “Te taparu nei au ia oe, to ˈu fatu! Eiaha na e vaiiho i te utua o teie hara i nia ia mâua! E ohipa maamaa ta mâua i rave.
12 Eiaha na e vaiiho ia ˈna mai te tahi aiû fanau-pohe-hia ua pau te afaraa o te iˈo!”
13 Tiaoro ihora Mose ia Iehova: “E te Atua e, a faaora na i to ˈna maˈi!”+
14 Pahono maira Iehova ia Mose: “Ahiri to ˈna metua tane i tutuha roa i nia i to ˈna mata, eita anei oia e haama e hitu mahana? Ia faataa-ê-hia mai oia e hitu mahana i rapaeau i te puhapa,+ a nehenehe atu ai oia e faahoˈihia mai i muri iho.”
15 Faataa-ê-hia maira ïa Miriama i rapaeau i te puhapa e hitu mahana,+ e aita te nunaa i tatara i te mau fare ie e ia faahoˈi-roa-hia mai Miriama.
16 Faareva aˈera te nunaa mai Hazerota+ mai, e puhapa aˈera i te medebara o Parana.+
Nota i raro i te api
^ Aore ra “e taata haehaa roa o Mose, hau aˈe i te tahi atu taata.”
^ Heb: “I roto i to ˈu utuafare taatoa, te faaite nei oia mea haapao maitai oia.”
^ Heb: “e vaha e vaha.”
