Numera 13:1-33
13 Paraparau maira Iehova ia Mose, a na ô ai:
2 “A tono i te tahi mau tane e hiˈopoa haere i te fenua o Kanaana ta ˈu e horoa nei no te ati Iseraela. Ia tono oe hoê tane o te opu tataitahi, e raatira+ anaˈe i rotopu ia ratou.”+
3 Tono atura ïa Mose ia ratou mai te medebara o Parana+ na nia i te faaueraa a Iehova. E raatira anaˈe taua mau tane ra no te ati Iseraela.
4 Teie to ratou iˈoa: no te opu o Reubena, o Samua te tamaiti a Zakura,
5 no te opu o Simeona, o Saphata te tamaiti a Hori,
6 no te opu o Iuda, o Kaleba+ te tamaiti a Iephune,
7 no te opu o Isakara, o Igala te tamaiti a Iosepha,
8 no te opu o Epheraima, o Hotea+ te tamaiti a Nuna,
9 no te opu o Beniamina, o Paleti te tamaiti a Raphu,
10 no te opu o Zebuluna, o Gadiela te tamaiti a Sodi,
11 no te opu o Iosepha,+ no te opu o Manase,+ o Gadi te tamaiti a Susi,
12 no te opu o Dana, o Amiela te tamaiti a Gemali,
13 no te opu o Asera, o Setura te tamaiti a Mihaela,
14 no te opu o Naphatali, o Nahebi te tamaiti a Vophesi,
15 no te opu o Gada, o Geuela te tamaiti a Maki.
16 Tera te iˈoa o te mau tane ta Mose i tono e hiˈopoa haere i te fenua. Topa ˈtura o Mose ia Hotea te tamaiti a Nuna i te iˈoa o Iosua.*+
17 I to Mose tonoraa ia ratou e hiˈopoa haere i te fenua o Kanaana, na ô atura oia ia ratou: “A pauma i ǒ i te Negeba, e a pauma i te tuhaa fenua mouˈa.+
18 E hiˈo outou eaha te huru o tera fenua,+ mea puai anei te feia e parahi ra i ǒ aore ra mea paruparu, mea iti anei ratou aore ra mea rahi,
19 mea au anei te fenua aore ra eita, e puhapa anei te mau oire ta ratou e faaea ra aore ra mea auahia i te patu.
20 E a hiˈo e fenua taoˈa* anei aore ra e fenua veve,*+ e tumu raau anei to nia iho aore ra aita. Ia itoito+ outou e ia rave mai i te tahi maa hotu o te fenua.” I taua mau mahana ra, o te pararaa matamua o te vine.+
21 Pauma ˈtura ïa ratou e hiˈopoa haere atura i te fenua mai te medebara o Zîna+ e tae roa i Rehoba+ i pihai iho ia Lebo-hamata.*+
22 I to ratou paumaraa i te Negeba, tae aˈera ratou i Heberona,+ i reira Ahimana, Sesai e Talamai,+ na ati Anaka,+ e ora ˈi. Ua patuhia Heberona e hitu matahiti na mua ˈtu ia Zoana i Aiphiti.
23 I to ratou taeraa i te peho o Esekola,+ tâpû aˈera ratou i reira i te tahi amaa hoê noa peenave vine to nia iho, tei amohia e piti tane i nia i te tahi raau, e te tahi atoa mau remuna e suke.+
24 Parau atura ratou i taua vahi ra te peho o Esekola*+ no te peenave ta te ati Iseraela i tâpû i reira.
25 I te hoperaa e 40 mahana,+ hoˈi aˈera ratou na ta ratou hiˈopoa-haere-raa i te fenua.
26 Hoˈi maira ïa ratou ia Mose raua Aarona e te amuiraa taatoa o te ati Iseraela i te medebara o Parana, i Kadesa.+ Faatia maira ratou i ta ratou i ite i te amuiraa taatoa e faaite maira i te mau maa hotu o te fenua.
27 Teie ta ratou i faatia ia Mose: “Ua tomo matou i te fenua i tono ai oe ia matou, e te tahe mau â ra te û e te meri,+ e teie to ˈna mau maa hotu.+
28 Tera râ, e feia puai te parahi ra i tera fenua, e mea rarahi roa te mau oire auahia i te patu. Ua ite atoa matou i te ati Anaka i ǒ.+
29 Te parahi ra te ati Amaleka+ i te fenua o te Negeba.+ Te parahi ra te ati Heta, te ati Iebusi+ e te ati Amori+ i te tuhaa fenua mouˈa. Te parahi ra te ati Kanaana+ na te pae miti+ e na te pae anavai Ioridana.”
30 Tamata ˈtura ïa Kaleba i te tamǎrû i te nunaa e tia ra i mua ia Mose a na ô ai: “Mai pauma anaˈe i teie nei, e e rave mau â tatou i te fenua, no te mea e nehenehe mau â te reira e noaa ia tatou.”+
31 Parau maira râ te mau tane tei pauma e o ˈna: “Eita tatou e nehenehe e pauma e aro i tera nunaa, mea puai aˈe hoi ratou ia tatou.”+
32 Parau noa maira ratou i te ati Iseraela i te parau faatoaruaru+ no te fenua ta ratou i hiˈopoa haere, a na ô ai: “Mea atâta te fenua ta matou i hiˈopoa haere, e pohe mau â te taata, e pauroa te taata ta matou i ite, e tiapai tane.+
33 E ua ite matou i ǒ i te Nephilimi, te mau tamaiti a Anaka,+ no roto mai i* te Nephilimi, e e au tatou i te vivi i pihai iho, i ta tatou hiˈoraa e ta ratou atoa.”
Nota i raro i te api
^ Aore ra “Iehosua,” “E faaoraraa Iehova” te auraa.
^ Heb: “pararai.”
^ Heb: “poria.”
^ Aore ra “te tomoraa o Hamata.”
^ “Peenave vine” te auraa.
^ Aore ra “e huaai o.”
