Numera 36:1-13
-
Ture ia faaipoipo te vahine e tuhaa ta ˈna (1-13)
36 Faafatata maira te mau upoo utuafare o te huaai o Gileada te tamaiti a Makira+ te tamaiti a Manase no te mau utuafare o na tamaiti a Iosepha, e paraparau maira i mua ia Mose e te mau raatira, te mau upoo utuafare o te ati Iseraela.
2 Na ô maira ratou: “Ua faaue Iehova ia oe, to matou fatu, ia opere kelero+ i te fenua ei tuhaa na te ati Iseraela, e ua faaue Iehova ia oe, to matou fatu, ia horoa i te tuhaa a to matou taeae o Zelophehada na ta ˈna na tamahine.+
3 Ia faaipoipo ratou i te tane o te tahi atu opu ati Iseraela, e tatarahia te tuhaa a taua mau vahine ra no roto i te tuhaa a to ratou metua tane, a apitihia ˈtu ai i te tuhaa a te opu o te tane ta ratou e faaipoipo e e tatarahia te reira no roto i ta matou tuhaa tei horoa-kelero-hia mai.
4 E ia tupu te Iubili+ no te nunaa o Iseraela, e apiti-atoa-hia te tuhaa a taua mau vahine ra i te tuhaa a te opu o te tane ta ratou e faaipoipo e e tatarahia ta ratou tuhaa i te tuhaa a te opu o to matou mau metua.”
5 Horoa ˈtura ïa Mose i teie poroi i te ati Iseraela na nia i te faaueraa a Iehova: “Mea tano te parau a te opu o na tamaiti a Iosepha.
6 Teie te parau ta Iehova i faaue no na tamahine a Zelophehada: ‘E nehenehe ratou e faaipoipo i te tane ta ratou e hinaaro. E faaipoipo râ ratou i te tane no roto i te opu o to ratou metua tane.
7 Aita e tuhaa a te ati Iseraela te riro i tera e tera opu, e tapea noa hoi te ati Iseraela i te tuhaa a te opu o to ratou mau tupuna.
8 E pauroa te tamahine e tuhaa ta ratou i rotopu i te mau opu o Iseraela, e riro ïa ei vahine faaipoipo na te hoê huaai o te opu o to ratou metua tane,+ ia fatu noa te ati Iseraela i te tuhaa a to ratou mau tupuna.
9 Aita e tuhaa te riro i tera e tera opu, ia tapea noa hoi te mau opu o Iseraela i ta ratou iho tuhaa.’”
10 Na reira aˈera na tamahine a Zelophehada mai ta Iehova i faaue ia Mose.+
11 Faaipoipo aˈera ïa Mahala, Tireza, Hogela, Mileka e Noa, na tamahine a Zelophehada,+ i na tamaiti a te mau taeae o to ratou metua tane.
12 Riro aˈera ratou ei vahine faaipoipo na te mau tane no roto i te fetii o Manase te tamaiti a Iosepha, a vai noa ˈtu ai ta ratou tuhaa i roto i te opu o to ratou metua tane.
13 Tera te mau faaueraa e faaotiraa haavaraa ta Iehova i horoa i te ati Iseraela na roto ia Mose i te mau vahi papu pâpâmǎrô o Moabi na te hiti Ioridana i Ieriko.+
