Numera 8:1-26
8 Paraparau maira Iehova ia Mose, a na ô ai:
2 “A paraparau ia Aarona e a na ô atu: ‘Ia faaama oe i na mori, e turama na mori e hitu i te vahi i mua mai i te vairaa mori.’”+
3 Na reira ihora ïa Aarona: Faaama ihora oia i na mori no te vahi i mua mai i te vairaa mori,+ mai ta Iehova iho â i faaue ia Mose.
4 Mai teie te hamaniraahia te vairaa mori: Mea hamanihia i te auro tupaihia. Mai to ˈna tumu tae roa i to ˈna mau raupua, e auro tupaihia.+ Ua hamanihia te vairaa mori ia au i te orama+ ta Iehova i faaite ia Mose.
5 Paraparau faahou maira Iehova ia Mose, a na ô ai:
6 “A rave i te ati Levi mai rotopu i te ati Iseraela, e a tamâ ia ratou.+
7 Mai teie ia tamâ oe ia ratou: A pîpî i te pape tamâraa hara i nia ia ratou, e hahu ratou i to ratou tino taatoa i te hoê reta, e horoi ratou i to ratou mau ahu e e tamâ ratou ia ratou.+
8 I muri iho, e rave ratou i te hoê puaatoro oni apî+ e te tusia huero maa+ no te reira, hamanihia i te faraoa ota oro-maitai-hia anoihia i te hinu, e e rave oe i te tahi atu puaatoro oni apî no te hoê tusia no te hara.+
9 E aratai oe i te ati Levi i mua i te tiahapa o te amuiraa e e haaputuputu oe i te amuiraa taatoa o te ati Iseraela.+
10 Ia aratai oe i te ati Levi i mua ia Iehova, e tuu te ati Iseraela i to ratou rima i nia iho i te ati Levi.+
11 E e pûpû* Aarona i te ati Levi i mua ia Iehova ei tusia taueuehia+ no rotopu i te ati Iseraela, e e rave ratou i te taviniraa a Iehova.+
12 “I muri iho, e tuu te ati Levi i to ratou rima i nia i te afii o na puaatoro oni.+ Ia oti, a pûpû atu hoê ei tusia no te hara e te tahi atu ei tusia taauahi ia Iehova no te pûpû i te faahauraa+ no te ati Levi.
13 E e tuu oe i te ati Levi i mua ia Aarona e ta ˈna na tamaiti, a pûpû* atu ai ia ratou ei tusia taueuehia ia Iehova.
14 E faataa ê oe i te ati Levi mai rotopu i te ati Iseraela, e e riro te ati Levi no ˈu.+
15 I muri iho, e tomo mai te ati Levi no te rave i ta ratou taviniraa i te tiahapa o te amuiraa. Mai tera ia tamâ oe ia ratou e ia pûpû* oe ia ratou ei tusia taueuehia.
16 Mea horoahia hoi ratou, horoahia mai ia ˈu no rotopu i te ati Iseraela. Ei mono i te mau matahiapo atoa a te ati Iseraela,+ e rave au ia ratou no ˈu.
17 Na ˈu hoi pauroa te matahiapo e te fanauˈa matamua+ a te ati Iseraela. Ua haamoˈa vau ia ratou no ˈu i te mahana i tairi ai au pauroa te matahiapo e te fanauˈa matamua i te fenua o Aiphiti.+
18 E rave au i te ati Levi ei mono i te mau matahiapo atoa i rotopu i te ati Iseraela.
19 E horoa vau i te ati Levi ei ô ia Aarona e ta ˈna na tamaiti mai rotopu i te ati Iseraela, no te rave i te taviniraa i te tiahapa o te amuiraa+ no te ati Iseraela e no te pûpû i te faahauraa no te ati Iseraela, ia ore te tahi ati ia tupu i rotopu i te ati Iseraela+ no te tapiriraa mai te nunaa o Iseraela i te vahi moˈa.”
20 Na reira ˈtura Mose, Aarona e te amuiraa taatoa o te ati Iseraela i te ati Levi. Pauroa ta Iehova i faaue ia Mose no te ati Levi, o ta te ati Iseraela ïa i rave ia ratou.
21 No reira, tamâ aˈera te ati Levi ia ratou e horoi aˈera i to ratou mau ahu.+ I muri iho, pûpû* ihora Aarona ia ratou ei tusia taueuehia i mua ia Iehova.+ E pûpû ihora Aarona i te faahauraa no ratou no te tamâ ia ratou.+
22 I muri iho, tomo maira te ati Levi no te rave i ta ratou taviniraa i te tiahapa o te amuiraa i raro aˈe i te tiaauraa a Aarona e ta ˈna na tamaiti. Mai ta Iehova iho â i faaue ia Mose no te ati Levi, o tei ravehia ïa ia ratou.
23 Paraparau maira Iehova ia Mose, a na ô ai:
24 “No te ati Levi teie parau: Mai 25 matahiti e nia ˈtu, e apiti te hoê ati Levi i te feia faataahia no te rave i te taviniraa i te tiahapa o te amuiraa.
25 Ua hau anaˈe râ 50 matahiti, eita oia e apiti faahou atu e eita oia e tavini faahou.
26 E nehenehe oia e tauturu i to ˈna mau taeae e amo ra i te mau hopoia i te tiahapa o te amuiraa, eiaha râ oia e tavini i reira. Tera ta oe e rave i te ati Levi e ta ratou mau hopoia.”+
Nota i raro i te api
^ Heb: “taueue,” oia hoi faahaere mai te hoê pae i te tahi atu pae.
^ Heb: “taueue,” oia hoi faahaere mai te hoê pae i te tahi atu pae.
^ Heb: “taueue,” oia hoi faahaere mai te hoê pae i te tahi atu pae.
^ Heb: “taueue,” oia hoi faahaere mai te hoê pae i te tahi atu pae.
