Numera 9:1-23
9 Paraparau maira Iehova ia Mose i te medebara o Sinai i te avaˈe matamua+ o te piti o te matahiti i muri aˈe i to ratou haereraa mai i rapae i te fenua o Aiphiti, a na ô ai:
2 “E faaineine te ati Iseraela i te tusia no te Pasa+ i te taime faataahia+ no te reira.
3 I te 14 o te mahana o teie avaˈe i te ahiahi, e faaineine outou i te reira i te taime faataahia. Ia au i te mau faatureraa atoa e ia au i te mau raveraa atoa faataahia no te reira, e faaineine outou i te reira.”+
4 Parau atura ïa Mose i te ati Iseraela ia faaineine i te tusia no te Pasa.
5 Faaineine aˈera ratou i te tusia no te Pasa i te 14 o te mahana o te avaˈe matamua i te ahiahi, i te medebara o Sinai. Pauroa ta Iehova i faaue ia Mose, ua rave te ati Iseraela.
6 Tera râ, te vai ra te tahi mau taata tei viivii i te tapearaa i te hoê tino* pohe,+ a ore atu ai ratou e nehenehe e faaineine i te tusia no te Pasa i taua mahana ra. Haere maira ïa taua mau taata ra i mua ia Mose e ia Aarona i taua mahana ra,+
7 e na ô maira ia ˈna: “Mea viivii matou no te tapearaa i te hoê tino* pohe. No te aha matou i rotopu i te ati Iseraela+ e ore ai e nehenehe e hopoi mai i te tusia ia Iehova i te taime faataahia no te reira?”
8 Parau atura Mose ia ratou: “A tiai i ǒ nei, ia ite au eaha ta Iehova e faaue mai no outou.”+
9 Na ô maira ïa Iehova ia Mose:
10 “A parau i te ati Iseraela: ‘Noa ˈtu ua viivii te tahi taata i rotopu ia outou aore ra o to outou mau uˈi i muri mai i te tapearaa i te hoê tino pohe,+ aore ra ua reva i te hoê vahi atea, e faaineine iho â oia i te tusia no te Pasa no Iehova.
11 E faaineine ratou i te reira i te piti o te avaˈe,+ i te 14 o te mahana i te ahiahi. E amu ratou i te reira e te pane hopue ore e te pota avaava.+
12 Eiaha ratou e faaherehere i te tahi e poipoi noa ˈtu,+ e eiaha ratou e ofati i to ˈna ivi.+ E faaineine ratou i te reira ia au i te mau faatureraa atoa no te Pasa.
13 Area te taata e ere i te mea viivii aore ra aita i reva e aita i haapao i te faaineineraa i te tusia no te Pasa, e haapohehia taua taata ra mai roto mai i to ˈna nunaa,+ no te mea aita oia i hopoi mai i te tusia ia Iehova i te taime faataahia no te reira. E faautuahia taua taata ra no ta ˈna hara.
14 “‘E mai te peu e taata ê te faaea ra i rotopu ia outou, e faaineine atoa oia i te tusia no te Pasa no Iehova.+ E na reira oia ia au i te faatureraa e te raveraa faataahia no te Pasa.+ Ei hoê noa faatureraa no outou, no te taata ê e no te taata tumu o te fenua.’”+
15 I te mahana i faatiahia ˈi te sekene,+ tapoˈi maira te ata i te sekene, te tiahapa o te Haamanaˈoraa, area i te po, mai te auahi te huru te mea e faaea i nia ˈˈe i te sekene e poipoi noa ˈtu.+
16 Teie noa te tupu: Ia ao, e tapoˈi mai te ata i te reira, e ia po, te tahi mea ïa mai te auahi te huru.+
17 I te mau taime atoa e pee ai te ata mai nia i te tiahapa, e faareva te ati Iseraela i reira iho,+ e i te vahi e faaea ˈi te ata, i reira te ati Iseraela e puhapa ˈi.+
18 Na nia i te faaueraa a Iehova e faareva ˈi te ati Iseraela, e na nia i te faaueraa a Iehova e puhapa ˈi ratou.+ A faaea noa ˈi te ata i nia ˈˈe i te sekene, e puhapa noa ratou i reira.
19 Ia faaea noa te ata i nia ˈˈe i te sekene e rave rahi mahana, e faaroo te ati Iseraela ia Iehova e eita e faareva.+
20 I te tahi taime, e faaea te ata tau mahana noa i nia ˈˈe i te sekene. Na nia i te faaueraa a Iehova e puhapa noa ˈi ratou, e na nia i te faaueraa a Iehova e faareva ˈi ratou.
21 I te tahi taime, e faaea noa te ata i tera po e poipoi noa ˈtu, e ia pee anaˈe te ata ia poipoi aˈe, e faareva ratou. I te ao anei aore ra i te po e pee ai te ata, e faareva ratou.+
22 E piti mahana anei, hoê avaˈe, aore ra maoro atu â e faaea noa ˈi te ata i nia ˈˈe i te sekene, e puhapa noa te ati Iseraela e eita ratou e faareva. Ia pee anaˈe râ te ata, e faareva ratou.
23 Na nia i te faaueraa a Iehova e puhapa ˈi ratou, e na nia i te faaueraa a Iehova e faareva ˈi ratou. Ua faaroo ratou ia Iehova i ta Iehova i faaue na roto ia Mose.
