Ohipa a te mau aposetolo 23:1-35
23 A hiˈo noa ˈi Paulo i te Sunederi, na ô atura oia: “Taeae ma, i ora noa na vau ma te hoê manaˈo haava maitai roa i te aro o te Atua+ e tae roa mai i teie mahana.”
2 Faaue ihora te tahuˈa rahi o Anania i te feia e tia ra i pihai iho ia Paulo ia pâˈi i to ˈna vaha.
3 Na ô atura Paulo: “E tairi te Atua ia oe, haavarevare.* Te parahi nei oe no te haava ia ˈu ia au i te Ture e te ofati atoa nei oe i taua Ture ra ma te faaue ia pâˈihia vau.”
4 Na ô maira te feia e tia ra i pihai iho ia Paulo: “Te faaino nei oe i te tahuˈa rahi a te Atua.”
5 Parau atura Paulo: “Taeae ma, aita vau i ite e o te tahuˈa rahi o ˈna. Ua papaihia hoi: ‘Eiaha roa oe e faaino i te hoê raatira o to oe nunaa.’”+
6 I to Paulo iteraa e e Sadukea te hoê pae o te Sunederi e e Pharisea te tahi pae, tuô ihora oia: “Taeae ma, e Pharisea vau,+ e tamaiti na te Pharisea. Te haavahia nei au no te tiaturiraa o te tia-faahou-raa o te feia pohe.”
7 No to ˈna parauraa i te reira, tupu ihora te umeumeraa i rotopu i te Pharisea e te Sadukea e amahamaha ˈtura ratou.
8 Te parau ra hoi te Sadukea e aita e tia-faahou-raa, aita e melahi e aita atoa e varua. Area te Pharisea, te tiaturi ra ïa i te reira.+
9 Tutuô aˈera te taata, tia maira te tahi mau papai parau o te pǔpǔ a te Pharisea e mârô etaeta maira a na ô ai: “Aita matou i ite noa ˈˈe i te tahi hara a teie taata, peneiaˈe ua paraparau te hoê varua aore ra te hoê melahi ia ˈna.”+
10 I te uˈanaraa te umeumeraa, mǎtaˈu ihora te raatira o te nuu aˈunei Paulo e pohe ai ia ratou, e faaue atura i te mau faehau ia pou mai e haru ia Paulo mai rotopu mai ia ratou, a aratai atu ai ia ˈna i te nohoraa o te mau faehau.
11 Tera râ, i taua po ra, tia maira te Fatu i pihai iho ia Paulo e na ô maira: “A faaitoito!+ Mai ia oe i faataa maitai i te parau no ˈu i Ierusalema, e na reira atoa oe i Roma.”+
12 I te poipoiraa, opua aˈera te ati Iuda e horeo aˈera ratou e eita ratou e tamaa e eita atoa e inu e ia haapohe noa ˈtu ratou ia Paulo.
13 Ua hau atu i te 40 tane tei horeo mai teie.
14 Haere atura teie mau tane i te mau tahuˈa tiaau e i te mau aratai ati Iuda e na ô atura: “Ua horeo matou e eita matou e amu i te tahi maa e ia pohe noa ˈtu Paulo ia matou.
15 No reira, outou e te Sunederi atoa, a faaara i te raatira o te nuu ia haapou mai ia Paulo ia outou nei, mai te mea ra e te hinaaro ra outou e uiui atu â ia ˈna. Hou râ o ˈna e tae mai ai, ua ineine matou i te haapohe ia ˈna.”
16 Teie râ, faaroo ihora te tamaiti a te tuahine o Paulo i ta ratou opuaraa, tomo ihora oia i roto i te nohoraa o te mau faehau e faaara ˈtura ia Paulo.
17 Pii atura Paulo hoê o te mau raatira faehau ia haere mai e na ô atura: “Aratai na oe i teie taurearea i te raatira o te nuu, e parau hoi ta ˈna e faaite ia ˈna.”
18 Aratai ihora ïa te raatira faehau i te taurearea i te raatira o te nuu e na ô atura: “Ua pii mai Paulo te mau auri ra ia ˈu e ua ani mai ia aratai i teie taurearea ia oe nei, no te mea e parau ta ˈna e faaite ia oe.”
19 Rave ihora te raatira o te nuu i te rima o te taurearea, haere rii atura i te hoê vahi o raua anaˈe e ui atura: “Eaha ta oe parau e faaite mai?”
20 Parau maira te taurearea: “Ua tu te manaˈo o te ati Iuda e ani ia oe ia haapou mai ia Paulo i te Sunederi ananahi, mai te mea ra e te hinaaro ra ratou e uiui atu â ia ˈna.+
21 Eiaha râ oe e faatia i ta ratou aniraa, ua hau atu hoi i te 40 o to ratou mau tane te tamoemoe ra ia Paulo, e ua horeo ratou e eita ratou e tamaa e eita atoa e inu e ia pohe noa ˈtu Paulo ia ratou.+ Ua ineine ratou i teie nei e te tiai mai ra i ta oe parau faatia.”
22 Tuu atura ïa te raatira o te nuu i te taurearea ia haere i muri aˈe i to ˈna faaueraa ˈtu: “Eiaha oe e faaite e ua faaara mai oe ia ˈu.”
23 Titau ihora oia e piti raatira faehau e na ô atura: “A faaineine e 200 faehau no te haere i Kaisarea, e 70 atoa tane faahoro puaahorofenua e e 200 tane e omore ta ratou, i te area hora 9 i te po.*
24 A faaineine atoa i te puaahorofenua no Paulo, ia tae maitai o ˈna ia Felisi te tavana.”
25 Papai atura oia i te hoê rata mai teie:
26 “O vau Kalaudio Lusia, te papai atu nei au i teie rata ia oe, tavana rahi Felisi: Ia ora na!
27 I haruhia na teie taata e te ati Iuda e mai pohe o ˈna ia ratou, tae oioi atura râ vau e ta ˈu mau faehau e faaora ia ˈna,+ no te mea no ite noa maira vau e e taata Roma o ˈna.+
28 E no to ˈu hinaaro e ite eaha te tumu i pari ai ratou ia ˈna, haapou maira vau ia ˈna i roto i ta ratou Sunederi.+
29 Ite aˈera vau e ua parihia o ˈna i te mau mea no nia i ta ratou Ture,+ eiaha râ no nia i te tahi hara e tano ai ia pohe o ˈna aore ra ia tuuhia i roto i te tapearaa.
30 Ua faaarahia mai râ e te opua ra te ati Iuda e haapohe ia ˈna,+ te tono oioi atu nei ïa vau ia ˈna ia oe ra, a faaue ai i te feia pari ia tia atoa ˈtu i mua ia oe.”
31 I te po, rave aˈera ïa te mau faehau ia Paulo+ mai tei faauehia mai e aratai atura ia ˈna i Anetipaterisi.
32 Ananahi aˈe, vaiiho aˈera te mau faehau i te feia faahoro puaahorofenua ia aratai ia Paulo. Area ratou, hoˈi maira ïa i te nohoraa o te mau faehau.
33 Tomo atura te feia faahoro puaahorofenua i Kaisarea, horoa ˈtura i te rata i te tavana e tuu atoa ˈtura ia Paulo i mua ia ˈna.
34 Taio ihora te tavana i te rata, ui maira ia Paulo no teihea fenua o ˈna e ite aˈera e no Kilikia oia.+
35 Na ô maira oia: “E faaroo maitai au ia oe ia tae mai te feia i pari ia oe.”+ Faaue atura oia ia tapeahia Paulo i roto i te aorai o Heroda.
