Oto o Ieremia 1:1-22
א [Alepha]*
1 Auê, o ˈna noa ˈtura te parahi ra i teie nei, te oire tei î na i te taata!+
Auê, ua riro oia mai te hoê vahine ivi, mea taata oia i rotopu i te mau nunaa na mua ˈˈe!+
Auê, ua faahepohia oia e rave i te ohipa, o ˈna te tamahine huiarii i rotopu i te mau fenua!+
ב [Beta]
2 E taˈi rahi oia i te po,+ e e puru roa to ˈna papariˈa i te roimata.
Aita hoê o ta ˈna mau tane atoa i reira no te tamahanahana ia ˈna.+
Ua taiva to ˈna mau hoa atoa ia ˈna.+ Ua riro ratou ei enemi no ˈna.
ג [Gimela]
3 Ua hopoi-ê-hia Iuda+ na roto i te hepohepo e te faatîtîraa ino mau.+
Te parahi ra oia i rotopu i te mau nunaa.+ Aita to ˈna e vahi faafaaearaa.
Ua noaahia oia i te feia atoa e hamani ino ra ia ˈna a ahoaho ai oia.
ד [Daleta]
4 Te oto ra te mau eˈa o Ziona, no te mea aita hoê e haere mai ra i te oroa.+
Ua vavahihia to ˈna mau uputa atoa.+ Te ahoaho ra to ˈna mau tahuˈa.
Te oto ra to ˈna mau vahine apî,* e e ahoaho rahi to ˈna.
ה [He]
5 I teie nei, e fatu* no ˈna to ˈna mau enemi. Aita to to ˈna mau enemi e haapeapearaa.+
Ua hopoi hoi Iehova i te oto i nia ia ˈna no te rahi o ta ˈna mau hapa.+
Ua hopoi-tîtî-hia ta ˈna mau tamarii e te enemi.+
ו [Vau]
6 Ua ere te tamahine o Ziona i to ˈna unauna taatoa.+
E au to ˈna huiarii i te aili tei ore i ite mai i te vahi aihere,E e haere ratou ma te rohirohi na mua i tei aˈuaˈu ra ia ratou.
ז [Zaina]
7 I te mau mahana a hepohepo ai e a vai ai oia ma te nohoraa ore, e haamanaˈo IerusalemaI ta ˈna mau mea faufaa atoa i te mau mahana i tahito ra.+
I te toparaa to ˈna nunaa i roto i te rima o te enemi e aita ta ˈna e tauturu,+Ua ite to ˈna mau enemi ia ˈna e ua ata* i to ˈna hiˈaraa.+
ח [Heta]
8 E hara rahi ta Ierusalema.+
No reira oia i riro ai ei mea faufau.
Pauroa tei faatura na ia ˈna, e vahavaha ïa ia ˈna i teie nei, ua ite hoi ratou i to ˈna vai-tahaa-raa.+
E autâ+ e e fariu ê oia no te haama.
ט [Teta]
9 Tei nia to ˈna viivii i to ˈna ahu.
Aita oia i feruri i to ˈna ananahi.+
Mea riaria mau to ˈna hiˈaraa. Aita hoê no te tamahanahana ia ˈna.
E Iehova, ia ite mai oe i to ˈu hepohepo, ua faateitei hoi te enemi ia ˈna.+
י [Ioda]
10 Ua tuu te enemi i to ˈna rima i nia i ta ˈna mau taoˈa atoa.+
Ua ite hoi oia i te mau nunaa i te tomoraa i roto i to ˈna nao,*+Taua mau nunaa ra ta oe i parau maitai eiaha ratou ia amui e to oe nunaa.
כ [Kapha]
11 Te hepohepo ra to ˈna mau taata atoa. Te imi ra ratou i te maa.+
Ua horoa ratou i ta ratou mau faufaa no te tahi maa, ia ora noa ˈˈe ratou.
Inaha, e Iehova, ia ite mai oe ua riro vau ei vahine* faufaa ore.
ל [Lameda]
12 Outou pauroa e haere ra na te purumu, aita anei outou e huru ê ra?
A hiˈo e ia ite outou!
Te vai ra anei te tahi mauiui mai ta ˈu i faaruru,Ta Iehova i haamauiui ia ˈu i te mahana o to ˈna riri ura?+
מ [Mema]
13 Mai nia mai to ˈna faataeraa mai i te auahi i roto i to ˈu mau ivi,+ a vî atu ai to ˈu mau ivi atoa ia ˈna.
Ua hohora oia i te tahi upeˈa no to ˈu avae. Ua faahepo oia ia ˈu ia otohe.
Ua faariro oia ia ˈu ei vahine faaruehia.
E maˈi to ˈu i te mahana taatoa.
נ [Nuna]
14 Ua haaputuputu oia i ta ˈu mau hapa i to ˈna rima ei zugo a taamu atu ai i nia i to ˈu aˈî.
Ua tuuhia te reira i nia i to ˈu aˈî, e ua ere au i to ˈu puai.
Ua tuu Iehova ia ˈu i te rima o te feia eita ta ˈu e nehenehe e haapaari atu.+
ס [Sameha]
15 Ua iriti ê Iehova pauroa te tane puai no rotopu ia ˈu.+
Ua titau oia i te hoê nuu e aro ia ˈu no te haaperehu i to ˈu mau tane apî.+
Ua taataahi Iehova i te tamahine apî* o Iuda i roto i te taataahiraa vine.+
ע [Oina]
16 No teie mau mea vau e taˈi ai.+ Te tahe nei to ˈu roimata mai te pape.
Ua atea hoi te taata atoa o te nehenehe e tamahanahana e e faaitoito ia ˈu.
Ua hepohepo ta ˈu mau tamaiti, ua upootia hoi te enemi.
פ [Pe]
17 Ua toro o Ziona i to ˈna rima.+ Aita hoê no te tamahanahana ia ˈna.
E faaueraa ta Iehova i horoa i te mau enemi atoa o Iakoba ati aˈe ia ˈna no te aro ia ˈna.+
Ua riro Ierusalema ei mea faufau na ratou.+
צ [Sadi]
18 Mea parau-tia Iehova,+ o ta ˈna mau faaueraa* hoi ta ˈu i orure hau.+
A faaroo mai, outou te mau nunaa atoa, e ia ite mai outou i to ˈu mauiui.
Ua hopoi-tîtî-hia to ˈu mau vahine apî* e to ˈu mau tane apî.+
ק [Kopha]
19 Ua pii au i ta ˈu mau tane, ua taiva râ ratou ia ˈu.+
Ua pohe ta ˈu mau tahuˈa e ta ˈu mau matahiapo i roto i te oire,A imi ai ratou i te maa ia ora noa ratou.+
ר [Resa]
20 A hiˈo mai, e Iehova, e hepohepo rahi hoi to ˈu.
Ua horuhoru roa to ˈu aau.
Ua taahuri roa to ˈu mafatu i roto ia ˈu, e orure hau mau â hoi au.+
Te faatupu ra te ˈoˈe i te pohe i rapae.+ E i roto i te fare, e pohe atoa.
ש [Sina]
21 Ua faaroo te mau taata i ta ˈu autâ. Aita e taata no te tamahanahana ia ˈu.
Ua faaroo to ˈu mau enemi atoa i to ˈu ati.
Ua oaoa ratou no te mea na oe i faatupu i te reira.+
E faatae mai hoi oe i te mahana ta oe i faaite haere,+ te mahana e riro ai ratou mai ia ˈu.+
ת [Tau]
22 Ia faaite-pauroa-hia to ratou ino i mua ia oe, e ia faautua oe ia ratou,+Mai ta oe i faautua ia ˈu no ta ˈu mau hapa atoa.
Mea rahi hoi to ˈu hepohepo, e ua maˈihia to ˈu aau.
Nota i raro i te api
^ Na pene 1-4, e himene oto ïa papaihia ia au i te anairaa o te piapa Hebera.
^ Aore ra “aita i taoto aˈenei i te tane.”
^ Heb: “upoo.”
^ Aore ra “umere.”
^ Te faahitihia ra o Ierusalema mai te hoê taata.
^ Heb: “aita i taoto aˈenei i te tane.”
^ Heb: “to ˈna vaha.”
^ Heb: “aita i taoto aˈenei i te tane.”
