Paraleipomeno buka matamua 10:1-14
-
Poheraa Saula e ta ˈna mau tamaiti (1-14)
10 Aro maira râ te mau Philiseti ia Iseraela. Horo ê atura te mau faehau o Iseraela i mua i te mau Philiseti, e mea rahi tei taparahihia i nia i te mouˈa Gilaboa.+
2 Tapapa maira te mau Philiseti ia Saula e ta ˈna mau tamaiti, e tairi aˈera te mau Philiseti ia Ionatana, Abinadaba e Maleki-sua,+ ta Saula mau tamaiti.
3 Uˈana roa ˈtura te aroraa i nia ia Saula, ite aˈera te feia teˈa ia ˈna, e pepe ihora oia i te feia teˈa.+
4 Na ô atura Saula i ta ˈna tavini amo mauhaa: “A huti i ta oe ˈoˈe e a patia ia ˈu, aˈunei teie mau tane peritome-ore-hia e hamani ino*+ ai ia ˈu.” Aita râ ta ˈna tavini amo mauhaa i hinaaro, ua mǎtaˈu roa hoi oia. Rave ihora ïa Saula i te ˈoˈe e faatopa ihora oia ia ˈna i nia iho.+
5 I te iteraa te tavini amo mauhaa e ua pohe o Saula, faatopa atoa ihora oia ia ˈna i nia i ta ˈna iho ˈoˈe e pohe ihora.
6 Ua pohe ïa Saula e ta ˈna e toru tamaiti, e te feia atoa tei aro i to ˈna pae,* hoê â ratou i te poheraa.+
7 I te iteraa te ati Iseraela i roto i te peho e ua horo ê te taata atoa e ua pohe Saula e ta ˈna mau tamaiti, faarue aˈera ratou i to ratou mau oire e horo ê atura. Haere maira te mau Philiseti e parahi ihora i tera mau oire.
8 I te mahana i muri iho, i to te mau Philiseti haereraa mai e eiâ i te mau taoˈa i nia i te mau tino pohe, ite aˈera ratou i te tino o Saula e ta ˈna mau tamaiti i nia i te mouˈa Gilaboa.+
9 Eiâ ihora ïa ratou i te mau mea i nia ia ˈna, tâpû ihora i to ˈna upoo e rave aˈera i ta ˈna mau mauhaa tamaˈi. Tono atura ratou i te vea na te fenua o te mau Philiseti no te faaite i te parau apî i ta ratou mau idolo+ e te nunaa.
10 Vaiiho atura ratou i ta ˈna mau mauhaa tamaˈi i roto i te hiero o to ratou atua e tuu ihora i to ˈna upoo i roto i te hiero o Dagona.+
11 I te faarooraa to Iabesa+ i Gileada i ta te mau Philiseti i rave ia Saula,+
12 tia aˈera te mau taata tamaˈi atoa e tii i te tino o Saula e o ta ˈna mau tamaiti. Hopoi aˈera ratou i taua mau tino ra i Iabesa, huna ihora i to ratou mau ivi i raro aˈe i te tumu raau rahi i Iabesa,+ e haapae atura ratou i te maa e hitu mahana.
13 Ua pohe ïa Saula no to ˈna taiva ia Iehova, aita hoi oia i faaroo i te parau a Iehova,+ ua haere atoa oia e farerei i te hoê vahine e demoni hiˈohiˈo to ˈna,+
14 aita râ i ui ia Iehova, i haapohe ai oia ia ˈna a tuu atu ai i te tiaraa arii ia Davida te tamaiti a Iese.+
