Paraleipomeno buka matamua 15:1-29
15 Hamani noa ˈtura Davida i te fare no ˈna i roto i te Oire o Davida. Faaineine atura oia i te hoê vahi no te Afata a te Atua mau e faatia ˈtura i te hoê tiahapa no te reira.+
2 Na ô ihora Davida: “Eiaha ei taata e amo i te Afata a te Atua mau, maori râ te ati Levi, o ratou hoi ta Iehova i maiti no te amo i te Afata a Iehova e no te tavini noa ia ˈna.”+
3 Titau atura Davida i to Iseraela taatoa i Ierusalema no te afai i te Afata a Iehova i te vahi ta ˈna i faaineine no te reira.+
4 Titau atura Davida i te huaai o Aarona+ e te ati Levi:+
5 to te ati Kohata, o Uriela te raatira e 120 o to ˈna mau taeae,
6 to te ati Merari, o Asaia+ te raatira e 220 o to ˈna mau taeae,
7 to te ati Geresoma, o Ioela+ te raatira e 130 o to ˈna mau taeae,
8 to te huaai o Elizaphana,+ o Semaia te raatira e 200 o to ˈna mau taeae,
9 to te huaai o Heberona, o Eliela te raatira e 80 o to ˈna mau taeae,
10 to te huaai o Uziela,+ o Aminadaba te raatira e 112 o to ˈna mau taeae.
11 Titau atoa ˈtura Davida i na tahuˈa o Zadoka+ raua Abiatara+ e na tane ati Levi o Uriela, Asaia, Ioela, Semaia, Eliela e Aminadaba
12 e na ô atura oia ia ratou: “O outou te mau upoo o te mau opu fetii o te ati Levi. A haamoˈa ia outou, outou e to outou mau taeae, e a afai i te Afata a Iehova te Atua o Iseraela i te vahi i faaineinehia e au.
13 Aita outou i amo i te Afata i te taime matamua,+ aita hoi tatou i imi e nafea râ te raveraa.+ No reira te riri o Iehova to tatou Atua i ura ˈi i nia ia tatou.”+
14 Haamoˈa aˈera ïa te mau tahuˈa e te ati Levi ia ratou no te uta mai i te Afata a Iehova te Atua o Iseraela.
15 Amo ihora te ati Levi i te Afata a te Atua mau i nia i to ratou tapono i na raau amoraa,+ mai ta Mose i faaue ia au i te parau a Iehova.
16 Parau atura Davida i na raatira o te ati Levi ia maiti i te feia himene i rotopu i to ratou mau taeae no te himene ma te oaoa, apeehia i te mau upaupa: te kinura,+ te upaupa taura e te sumebalo.+
17 Maiti ihora ïa te feia ati Levi ia Hemana+ te tamaiti a Ioela e, no roto i to ˈna mau taeae, ia Asapha+ te tamaiti a Berekia e, no roto i te ati Merari to ratou mau taeae, ia Etana+ te tamaiti a Kusaia.
18 Tei ia ratou ra to ratou mau taeae no roto i te piti o te tuhaa:+ o Zekaria, Beni, Iaaziela, Semiramota, Iehiela, Uni, Eliaba, Benaia, Maaseia, Matitia, Elephele, e Mikeneia e Obeda-edoma e Ieiela na tiai uputa.
19 Na te feia himene o Hemana,+ Asapha+ e Etana e hauti i te sumebalo veo,+
20 e na Zekaria, Aziela, Semiramota, Iehiela, Uni, Eliaba, Maaseia e Benaia e hauti i te upaupa taura faatanohia i nia i te Alamota.*+
21 E na Matitia,+ Elephele, Mikeneia, Obeda-edoma, Ieiela e Azazia e hauti i te kinura faatanohia i nia i te Seminita,*+ no te aratai i te himene.
22 Na Kenania+ te raatira o te ati Levi e tiaau i te utaraa o te Afata, mea ite hoi oia i tera ohipa,
23 e o Berekia raua Elikana na tiai uputa i pihai iho i te Afata.
24 Faaoto haapuai aˈera na tahuˈa o Sebania, Iosaphata, Netanela, Amasai, Zekaria, Benaia e Eliezera i te pu i mua i te Afata a te Atua mau,+ e ua tavini atoa Obeda-edoma raua Iehia ei tiai uputa i pihai iho i te Afata.
25 Tii aˈera Davida, te mau matahiapo o Iseraela e te mau raatira tausani i te afata o te faufaa a Iehova i te fare o Obeda-edoma+ ma te oaoa.+
26 Ua tauturu hoi te Atua mau i te ati Levi ia amo i te afata o te faufaa a Iehova. Pûpû ihora ïa ratou e hitu puaatoro oni apî e e hitu mamoe oni ei tusia.+
27 Ua oomo Davida i te hoê ahu maitai roa aita e rima, mai te ati Levi atoa o tei amo i te Afata, te feia himene, e Kenania te raatira o te utaraa o te Afata e o te feia himene. E tiputa lino atoa ta Davida i oomo.+
28 Hopoi maira te ati Iseraela taatoa i te afata o te faufaa a Iehova ma te umere,+ e te oto o te pu e rave rau,+ e te sumebalo, ma te hauti haapuai i te upaupa taura e te kinura.+
29 I te taeraa mai râ te afata o te faufaa a Iehova i te Oire o Davida,+ hiˈo maira Mikala+ ta Saula tamahine na roto i te haamaramarama e ite maira i te arii Davida te ouˈauˈa ra e te arearea ra. Haamata ˈtura oia i te vahavaha ia ˈna i roto i to ˈna aau.+
