Paraleipomeno buka matamua 17:1-27
17 I te parahiraa iho â Davida i roto i to ˈna aorai,* na ô atura oia ia Natana+ te peropheta: “Te parahi nei au i roto i te hoê fare arezi,+ area te afata o te faufaa a Iehova, tei raro aˈe ïa i te tapoˈi tiahapa i te vairaa.”+
2 Pahono maira Natana ia Davida: “Te mau mea atoa ta oe e hinaaro ra e rave, a rave ïa, tei ia oe hoi te Atua mau.”
3 I tera iho â po, na ô maira te Atua ia Natana:
4 “A haere e a parau i ta ˈu tavini ia Davida: ‘Teie ta Iehova e parau ra: “E ere na oe e patu i te fare ia parahi au i roto.+
5 Aita hoi au i parahi aˈenei i roto i te hoê fare mai te mahana mai â i aratai mai ai au ia Iseraela mai Aiphiti mai e tae roa mai i teie mahana. Ua haere noa râ vau mai tera i tera tiahapa e mai tera i tera sekene.*+
6 I te roaraa a haere ai au e o Iseraela taatoa, ua parau aˈena anei au i te mau tavana o Iseraela ta ˈu i faatoroa no te tiai i to ˈu nunaa: ‘Eaha outou i ore ai i hamani i te hoê fare arezi no ˈu?’”’
7 “I teie nei, a parau ïa i ta ˈu tavini ia Davida: ‘Teie ta Iehova o te mau nuu* e parau ra: “Ua rave mai au ia oe mai te mau vahi aihere mai, i reira oe i te tiairaa i te mau mamoe, no te riro ei aratai no to ˈu nunaa o Iseraela.+
8 Ei pihai iho vau ia oe i te mau vahi atoa e haere ai oe,+ e haamou vau* i to oe mau enemi atoa.+ E faarahi au i to iˈoa e e riro oe ei taata tuiroo* i te fenua nei.+
9 E horoa vau i te hoê vahi no to ˈu nunaa o Iseraela, a haaparahi atu ai ia ratou i reira. E ora ratou i reira e eita ratou e haapeapea-faahou-hia. Eita te feia ino e haavî* faahou ia ratou mai ta ratou i rave na+
10 mai te mahana mai â i faatoroa ˈi au i te tavana i nia i to ˈu nunaa o Iseraela.+ E vî to oe mau enemi atoa ia ˈu.+ Hau atu â, te parau atu nei au ia oe, o vau, o Iehova, e haamau vau i te hoê utuafare huiarii* no oe.
11 “‘“Ia hope to oe pue mahana e ia reva oe i to oe ra mau tupuna, e faaarii au i to oe huaai i muri aˈe ia oe, hoê o ta oe mau tamaiti,+ e e haamau papu vau i to ˈna mana arii.+
12 Na ˈna e patu i te hoê fare no ˈu,+ e e haamau papu vau i to ˈna terono e a muri noa ˈtu.+
13 E riro vau ei metua no ˈna e e riro oia ei tamaiti na ˈu.+ Eita vau e iriti ê i to ˈu here taiva ore ia ˈna ra,+ mai ta ˈu i na reira no tei faatere na mua ˈtu ia oe.+
14 E haamau papu vau ia ˈna i roto i to ˈu fare e e horoa vau i te mana arii ia ˈna e a muri noa ˈtu.+ E vai to ˈna terono e a muri noa ˈtu.”’”+
15 Faaite maira Natana ia Davida i tera mau parau atoa e tera orama taatoa.
16 Parahi atura ïa te arii Davida i raro i mua ia Iehova e parau aˈera: “O vai hoi au, e te Atua e Iehova? E o vai to ˈu utuafare i rave ai oe i teie mau mea atoa no ˈu?+
17 Mai te mea ra e aita i navai te reira, e te Atua e, te faaite atoa mai ra oe e vai â to ˈu utuafare* no te hoê tau maoro,+ e ua hiˈo mai oe ia ˈu mai te mea e taata rahi au, e te Atua e Iehova!
18 Eaha ˈtu â ta ˈu, ta to tavini o Davida, e nehenehe e parau ia oe no te tura ta ˈu e fanaˈo nei, ua matau maitai hoi oe ia ˈu?+
19 E Iehova, no to tavini e no te mea tera to hinaaro, ua rave oe i tera mau mea faahiahia atoa ma te faaite i to oe rahi.+
20 E Iehova, aita ˈtu mai ia oe,+ e aita e Atua maori râ oe.+ Na te mau mea atoa ta matou i faaroo e haapapu ra i te reira.
21 E o vai hoi nunaa i te fenua nei mai to oe nunaa o Iseraela?+ E te Atua mau e, ua haere oe e hoo mai ia ratou, ia riro ratou ei nunaa no oe.+ Ua faaite oe i to iˈoa ma te rave i te ohipa faahiahia e te mǎtaˈu rahi:+ ua tiahi oe i te tahi atu mau nunaa i mua i to oe nunaa+ ta oe i hoo mai i Aiphiti.
22 Ua faariro oe ia Iseraela ei nunaa no oe e a muri noa ˈtu.+ E ua riro mai oe, e Iehova, ei Atua no ratou.+
23 I teie nei, e Iehova, ia vai te parau ta oe i fafau no nia i to tavini e to ˈna utuafare e a muri noa ˈtu, e ia rave oe mai ta oe i fafau.+
24 Ia faateiteihia to iˈoa e ia vai â e a muri noa ˈtu,+ e ia parau te taata: ‘O Iehova o te mau nuu, te Atua o Iseraela, e Atua oia no te nunaa o Iseraela!’ Ia haamau-papu-hia te utuafare o to tavini o Davida i mua ia oe.+
25 Ua faaite hoi oe, to ˈu Atua, i to tavini i ta oe opuaraa e haamau i te hoê utuafare huiarii* no ˈna. No reira vau, to tavini, e pure ai ia oe ma te tiaturi.
26 E Iehova, o oe te Atua mau! Ua fafau oe i teie mau mea maitatai no to tavini.
27 No reira, ia farii oe, a haamaitai i te utuafare o to tavini, e ia vai â e a muri noa ˈtu i mua ia oe. E Iehova, ua haamaitai hoi oe i te utuafare o to tavini e e fanaˈo oia i te maitai e a muri noa ˈtu.”
Nota i raro i te api
^ Heb: “fare.”
^ Peneiaˈe “mai te hoê puhapa i te tahi atu e mai te hoê vahi nohoraa i te tahi atu” te auraa.
^ Aore ra “sabaota.”
^ Heb: “iriti ê au.”
^ Heb: “E faarahi au i to iˈoa mai te iˈoa o te feia rarahi.”
^ Heb: “faarohirohi.”
^ Heb: “hamani Iehova i te hoê fare.”
^ Heb: “fare.”
^ Heb: “hamani i te hoê fare.”
