Paraleipomeno buka matamua 21:1-30
21 Tia maira Satani* no te tairi ia Iseraela e turai atura ia Davida ia taio ia Iseraela.+
2 Parau atura ïa Davida ia Ioaba+ e te mau raatira o te nunaa: “A haere e taio i te ati Iseraela mai Beere-seba e tae atu i Dana.+ E a faaite mai ia ˈu ia ite au ehia rahiraa ratou.”
3 Na ô maira râ Ioaba: “Ia faarahi Iehova i to ˈna nunaa e ia tataihanere noa ˈtu! To ˈu fatu te arii, te tavini aˈena ra hoi ratou ia oe. No te aha to ˈu fatu e hinaaro ai e taio ia ratou? No te aha oe e rave ai i te hoê ohipa e hara ˈtu ai Iseraela?”
4 Ua faahepo râ te arii ia Ioaba. Reva aˈera ïa Ioaba, haere atura na Iseraela taatoa e hoˈi maira i Ierusalema.+
5 Faaite maira Ioaba ia Davida i te rahiraa taata o tei tapaohia. To Iseraela taatoa, 1 100 000 aito e ˈoˈe ta ratou, e to Iuda, 470 000 aito e ˈoˈe ta ratou.+
6 Aita râ Ioaba i taio ia Levi e Beniamina+ no te mea aita roa ˈtu oia i mauruuru i tera faaueraa a te arii.+
7 Aita roa râ te Atua mau i au i taua ohipa ra. Faaoti ihora ïa oia e faautua ia Iseraela.
8 Na ô atura Davida i te Atua mau: “E hara+ rahi ta ˈu i rave i to ˈu na reiraraa. A faaore mai na i ta ˈu hara,+ e ohipa maamaa roa hoi ta ˈu i rave.”+
9 Parau maira Iehova ia Gada,+ ta Davida taata ite orama:
10 “A haere e parau ia Davida: ‘Teie ta Iehova e parau ra: “E toru huru faautuaraa ta ˈu e tuu nei i mua ia oe. A maiti hoê ta ˈu e faatae mai i nia ia oe.”’”
11 Haere maira ïa Gada ia Davida ra e na ô maira ia ˈna: “Teie ta Iehova e parau ra: ‘Eaha ta oe e maiti?
12 E toru matahiti oˈe?+ Aore ra e toru avaˈe e pau oe i to oe mau enemi e e roohia oe i te ˈoˈe a te feia tei hae ia oe?+ Aore ra e toru mahana e tairi te ˈoˈe a Iehova i te fenua+ e e haaparare te melahi a Iehova i te maˈi pee+ i nia i te tuhaa fenua taatoa o Iseraela?’ A feruri e a parau mai eaha ta ˈu e pahono i tei tono mai ia ˈu.”
13 Na ô atura ïa Davida ia Gada: “E ahoaho rahi to ˈu. Mea au aˈe na ˈu ia topa i roto i te rima o Iehova, e aroha hamani maitai rahi hoi to ˈna.+ Eiaha râ vau ia topa i roto i te rima o te taata.”+
14 Tuu maira ïa Iehova i te maˈi pee+ i nia ia Iseraela. Pohe aˈera 70 000 taata ati Iseraela.+
15 Hau atu â, tono maira te Atua mau i te hoê melahi no te haamou ia Ierusalema. Te haamata ra te melahi i te rave i te ohipa i tonohia ˈi oia. Hiˈo maira Iehova e tatarahapa* ihora i taua ati ra.+ Parau atura oia i te melahi e faatae mai ra i te haamouraa: “Ua navai tera!+ A tuu i to rima i raro.” Tei pihai iho te melahi a Iehova i te vahi tairiiriraa huero maa* a Oranana+ ati Iebusi.+
16 I te hiˈoraa Davida i nia, ite aˈera oia i ta Iehova melahi e tia ra i ropu i te reva,* e ˈoˈe+ to roto i to ˈna rima, ua faatorohia i nia ia Ierusalema. Tipapa ihora Davida e te mau matahiapo i raro i te repo,+ ma te ahu oto i nia ia ratou.+
17 Na ô atura Davida i te Atua mau: “Na ˈu i faaue ia taiohia te nunaa. Na ˈu i rave i te hara, e na ˈu te hape.+ Teie râ mau mamoe iti, eaha ta ratou i rave? To ˈu Atua e Iehova, o vau ta oe e faautua, vau e te utuafare o to ˈu metua tane. Eiaha râ oe e faatae i teie ati i nia i to nunaa.”+
18 Faaue ihora te melahi a Iehova ia Gada+ ia parau ia Davida ia pauma i te vahi tairiiriraa huero maa a Oranana ati Iebusi+ e ia faatia i te hoê fata na Iehova.
19 Pauma aˈera ïa Davida i te vahi tairiiriraa huero maa mai ta Gada i parau ia ˈna. Ua paraparau Gada ia Davida i te iˈoa o Iehova.
20 I tera taime, te tairiiri ra Oranana i te sitona. Fariu maira oia e ite maira i te melahi. Tapuni aˈera ta ˈna na tamaiti e maha tei na muri mai ia ˈna.
21 I to Oranana iteraa ia Davida te haere mai ra, haere ihora oia mai te vahi tairiiriraa huero maa e tipapa ihora i mua ia Davida.
22 Na ô atura Davida ia Oranana: “A hoo mai* i te fenua o ta oe vahi tairiiriraa huero maa ia ˈu. E aufau vau ia oe i to ˈna tino moni. Te hinaaro ra vau e faatia i te hoê fata na Iehova i reira, ia faaea te ati o te tairi ra i te nunaa.”+
23 Na ô maira râ Oranana ia Davida: “To ˈu fatu te arii, a rave noa ˈtu i ta ˈu tâpû fenua, na oe te reira. A rave i ta oe e hinaaro. Te horoa ˈtu nei au i te puaatoro no te tusia taauahi, te iri tairiiriraa huero maa+ ei vahie, e te sitona ei tusia huero maa. Te horoa ra vau i tera mau mea atoa na oe.”
24 Pahono atura râ te arii Davida ia Oranana: “Eiaha! E aufau iho â vau i to ˈna tino moni, no te mea eita vau e rave i ta oe faufaa a horoa ˈtu ai na Iehova. Eita vau e pûpû i te tusia taauahi ta ˈu i ore i aufau.”+
25 Horoa ˈtura ïa Davida ia Oranana 600 sekela* auro no taua fenua ra.
26 Faatia ihora Davida i te hoê fata+ na Iehova e pûpû ihora i te tusia taauahi e te tusia no te hau. Pure aˈera oia ia Iehova, o tei pahono mai ia ˈna ma te faatae mai i te auahi+ no te raˈi mai i nia i te fata tusia taauahi.
27 Faaue maira Iehova i te melahi+ ia faahoˈi i ta ˈna ˈoˈe i roto i to ˈna vehî.
28 I tera taime, i to Davida iteraa e ua pahono mai Iehova ia ˈna i te vahi tairiiriraa huero maa a Oranana ati Iebusi, tamau noa ˈtura oia i te pûpû i te tusia i reira.
29 Tera râ, i taua tau ra, tei te vahi teitei i Gibeona+ te sekene o Iehova, ta Mose i faatia i te medebara, oia atoa te fata tusia taauahi.
30 Aita râ Davida i tae i ǒ no te ui i te Atua, ua mǎtaˈu hoi oia i te ˈoˈe a te melahi a Iehova.
Nota i raro i te api
^ Huri-atoa-hia “te tahi taata patoi.”
^ Aore ra “oto.”
^ Heb: “i ropu i te fenua e te raˈi.”
^ Heb: “horoa mai.”
^ 1 sekela: 11,4 g. Hiˈo i te tuhaa hau B14.
