Paraleipomeno buka matamua 22:1-19
22 Na ô ihora Davida: “Ei ǒ nei te fare o Iehova te Atua mau, e ei ǒ nei te fata e pûpû ai Iseraela i te tusia taauahi.”+
2 Faaue ihora ïa Davida ia haaputuputuhia te feia ěê+ o te ora ra i te fenua o Iseraela, e faatoroa ˈtura ia ratou ei feia tarai ofai no te tâpû e no te tarai i te ofai no te paturaa o te hiero* o te Atua mau.+
3 Faaineine atoa ˈtura Davida i te auri e rave rahi no te mau naero o te mau uputa tomoraa e no te mau puoiraa, oia atoa te veo e rave rahi aita i haere ia faito,+
4 oia atoa te tumu arezi+ e rave rahi, aita i pau i te taio. Ua hopoi mai hoi to Sidona+ e to Turia+ i te tumu arezi e rave rahi ia Davida ra.
5 Na ô ihora Davida: “Mea apî ta ˈu tamaiti o Solomona e aita i ineine atura,+ e mea tia ia hau ê te nehenehe o te fare o te patuhia no Iehova,+ ia faaite-haere-hia to ˈna parau e to ˈna unauna+ na te mau fenua atoa.+ E faaineine ïa vau i te ohipa no ˈna.” Faaineine atura ïa Davida i te taihaa e rave rahi hou oia a pohe ai.
6 Hau atu â, titau atura oia i ta ˈna tamaiti ia Solomona e faaue atura ia ˈna ia patu i te hoê hiero no Iehova te Atua o Iseraela.
7 Na ô atura Davida ia Solomona ta ˈna tamaiti: “Ua hinaaro vau e patu i te hoê fare no te iˈoa o Iehova to ˈu Atua.+
8 Ua parau mai râ Iehova ia ˈu: ‘Mea rahi te toto ta oe i haamanii, e e tamaˈi rahi ta oe i aro. E ere na oe e patu i te fare no to ˈu iˈoa,+ mea rahi hoi te toto ta oe i haamanii i nia i te fenua nei i mua ia ˈu.
9 Inaha, e fanauhia mai ta oe te hoê tamaiti+ o te riro ei taata hau,* e e horoa vau i te faafaaearaa no ˈna ma te faaora ia ˈna i to ˈna mau enemi ati aˈe.+ No reira oia e topahia ˈi i te iˈoa Solomona,*+ e e horoa vau i te hau e te peapea ore ia Iseraela i to ˈna mau mahana.+
10 Na ˈna e patu i te hoê fare no to ˈu iˈoa.+ E riro oia ei tamaiti na ˈu e e riro vau ei metua no ˈna.+ E haamau papu vau i te terono o ta ˈna faatereraa arii i nia ia Iseraela e a muri noa ˈtu.’+
11 “I teie nei, ta ˈu tamaiti, ei pihai iho Iehova ia oe, ia manuïa oe i te paturaa i te fare o Iehova to Atua, mai ta ˈna i parau no oe.+
12 I te taime e tuu atu ai Iehova i te mana ia oe i nia ia Iseraela, ia horoa mai oia i te paari e te maramarama,+ ia haapao noa oe i te ture a Iehova to Atua.+
13 Ia haapao maite oe i te mau ture+ e te mau faaueraa ta Iehova i parau ia Mose ia horoa ia Iseraela,+ e manuïa ïa oe. Ia itoito e ia puai oe. Eiaha e mǎtaˈu e eiaha e riaria.+
14 Ua rohi au i te faaineine no te fare o Iehova 100 000 taleni* auro e 1 000 000 taleni ario, e te veo e te auri+ eita e nehenehe e faito. Ua faaineine atoa vau i te raau e te ofai.+ E faarahi faahou râ oe i te reira.
15 Mea rahi te rave ohipa ia oe ra: te feia tarai ofai, te feia patu,+ te feia tarai raau e te feia aravihi no te ohipa e rave rau.+
16 No te rahi o te auro, te ario, te veo e te auri, eita e haere ia faito.+ No reira, i teie nei, a haamata i te ohipa, e ei pihai iho Iehova ia oe.”+
17 Faaue atura Davida i te huiarii taatoa o Iseraela ia tauturu ia Solomona ta ˈna tamaiti:
18 “E ere anei tei pihai iho Iehova to outou Atua ia outou? E aita anei oia i horoa i te faafaaearaa ati aˈe ia outou? Ua tuu mai hoi oia i te feia no teie fenua i to ˈu nei rima, e ua vî to teie fenua ia Iehova e i to ˈna nunaa.
19 I teie nei, a imi papu ia Iehova to outou Atua+ ma to outou aau e ora taatoa, e a haamata i te patu i te nao* o Iehova te Atua mau,+ ia nehenehe te afata o te faufaa a Iehova e te mau taihaa moˈa a te Atua mau+ ia afaihia i te fare e hamanihia no te iˈoa o Iehova.”+
Nota i raro i te api
^ Heb: “fare.”
^ Heb: “faafaaearaa.”
^ E taˈo Hebera e “Hau” te auraa.
^ 1 taleni: 34,2 kg. Hiˈo i te tuhaa hau B14.
