Salamo 78:1-72
-
Te hamani maitai o te Atua e to Iseraela ereraa i te faaroo
Masekila* a Asapha.+
78 A faaroo mai e to ˈu nunaa i ta ˈu ture.*A fariu mai i to outou tariˈa i te mau parau a to ˈu vaha.
2 E parau to ˈu vaha i te hoê parau paari.
E tuu atu vau i te tahi mau piri no mutaa ihora.+
3 Te mau mea ta tatou i faaroo e e ite ra,Ta to tatou mau metua i faatia ia tatou,+
4 Eita tatou e huna i te reira i ta ratou mau tamaiti.E faatia tatou i te uˈi e haere mai ra+Te mau ohipa a Iehova e au ia aruehia e to ˈna puai,+Te mau mea faahiahia ta ˈna i rave.+
5 Ua tuu oia i te hoê haamanaˈoraa ia Iakoba raE ua haamau i te hoê ture i Iseraela.Ua faaue oia i to tatou mau tupunaIa faaite i teie mau mea i ta ratou mau tamarii,+
6 No te uˈi i muri mai,Te mau tamarii e fanauhia mai, ia ite ratou i te reira.+
E na ratou e faatia i te reira i ta ratou mau tamarii.+
7 E tuu ïa ratou i to ratou tiaturiraa i te Atua ra.
Eita ratou e haamoˈe i te mau ohipa a te Atua,+E pee râ ratou i ta ˈna mau faaueraa.+
8 Eita ratou e riro mai to ratou mau tupuna,Te hoê uˈi faaroo ore e te orure hau,+Te hoê uˈi e te aau papu ore*+E o tei taiva i te Atua.
9 E fana ta te mau tamaiti a Epheraima,Ua otohe râ ratou i te mahana tamaˈi.
10 Aita ratou i tapea i te faufaa a te Atua+E aita ratou i farii i te pee i ta ˈna ture.+
11 Ua moˈe-atoa-hia ia ratou i ta ˈna i rave,+Ta ˈna mau ohipa faahiahia ta ˈna i faaite ia ratou.+
12 Ua rave oia i te mau ohipa faahiahia i mua i te mata o to ratou mau tupuna,+I te fenua o Aiphiti, te tuhaa fenua o Zoana.+
13 Ua vahi oia i te miti ia nehenehe ratou e haere,E ua faatia oia i te pape mai te hoê patu.+
14 Ua aratai oia ia ratou i te hoê ata i te aoE te maramarama auahi i te po taatoa.+
15 Ua vahi oia i te mato i roto i te medebara,Ua haamâha oia i to ratou poihâ mai te mea ra te inu ra ratou i te pape o te hoê moana hohonu.+
16 Ua faatahe oia i te pape mai roto mai i te mato.Ua haamanii mai oia i te pape mai te mau anavai ra.+
17 Tera râ, ua tamau ratou i te rave i te hara ia ˈna,Ma te orure hau i Tei Teitei Roa ˈˈe i roto i te medebara.+
18 Ua aa* ratou i te Atua i roto i to ratou aau,+Ma te titau i te maa ta ratou i hinaaro noa na.
19 Haamata ˈtura ïa ratou i te amuamu i te Atua ma te parau:“E nehenehe anei ta te Atua e horoa mai i te maa i roto i te medebara?”+
20 Inaha, ua tairi oia i te hoê matoIa tahe mai te pape e ia manii te tahora.+
“E nehenehe atoa anei ta ˈna e horoa mai i te faraoaAore ra e horoa mai i te inaˈi na to ˈna nunaa?”+
21 I to Iehova faarooraa ia ratou, riri roa ihora oia.+Ama aˈera te auahi+ i nia ia Iakoba,E riri roa ihora oia ia Iseraela,+
22 Aita hoi ratou i tuu i to ratou tiaturiraa i te Atua ra.+Aita ratou i tiaturi e e nehenehe ta ˈna e faaora ia ratou.
23 Faaue ihora ïa oia i te mau raˈi tapoˈipoˈi i nia,E iriti ihora oia i te mau uputa o te raˈi.
24 Faatopa maira oia i te mâna ei maa na ratou.Ua horoa mai oia i te sitona no te raˈi mai.+
25 Amu atura te taata i te faraoa a tei puai.*+Mea navai maitai te maa ta ˈna i horoa na ratou.+
26 Faaara ˈtura oia i te mataˈi no hitia o te râ i te raˈi,E ma to ˈna puai, pupuhi atura oia i te hoê mataˈi apatoa.+
27 Faatopa maira oia i nia ia ratou i te inaˈi mai te repo ra,E manu mai te one tahatai ra.
28 Faatopa maira oia i te reira i ropu i to ˈna puhapa,Ati aˈe i to ˈna mau fare ie.
29 Tamaa e haapuupuu atura ratou i taua maa ra.Ua horoa oia i ta ratou i hinaaro.+
30 Hou râ a mâha roa ˈi to ratou hinaaro,Tei roto noa â ta ratou maa i to ratou vaha,
31 Ura ihora to te Atua riri rahi tahoo i nia ia ratou.+
Haapohe ihora oia i to ratou feia puai roa ˈˈe.+Taparahi pohe ihora oia i te mau tane apî no Iseraela.
32 Noa ˈtu te reira, ua rave atu â ratou i te hara,+E aita ratou i faatupu i te faaroo i ta ˈna mau ohipa faahiahia.+
33 Haapoto ihora ïa oia i to ratou mau mahana mai te mea ra e aho noa te reira,+E to ratou matahiti na roto i te tahi mau ati o tei tupu taue noa mai.
34 Ia haapohe râ oia ia ratou, e imi ratou ia ˈna.+E hoˈi mai e e imi ratou i te Atua,
35 E haamanaˈo ratou o te Atua to ratou Mato+E o te Atua Teitei Roa ˈˈe Tei hoo mai* ia ratou.+
36 Ua tamata râ ratou i te haavarevare ia ˈna i to ratou vaha,E ua haavare ratou ia ˈna i to ratou arero.
37 Ua taiva ratou ia ˈna+E aita ratou i haapao i ta ˈna faufaa.+
38 E aroha hamani maitai râ to ˈna,+E faaore* oia i ta ratou hapa e eita oia e haapohe ia ratou.+
Mea pinepine oia i te tapearaa i to ˈna riri+A ore atu ai e vaiiho ia uˈana to ˈna riri rahi tahoo taatoa.
39 Ua haamanaˈo hoi oia e e taata noa ratou,+E mataˈi o te haere ra e o te ore e hoˈi mai.
40 Mea pinepine ratou i te orure-hau-raa ia ˈna i roto i te medebara+E i te haamauiuiraa i to ˈna aau i roto i te medebara!+
41 Ua tamau noa ratou i te tamatamata i to te Atua faaoromai,+E ua faaoto ratou i Tei Moˈa o Iseraela.
42 Aita ratou i haamanaˈo i to ˈna puai,*I te mahana i faaora ˈi* oia ia ratou i te enemi ra,+
43 I to ˈna faatupuraa i ta ˈna mau tapao i Aiphiti+E ta ˈna mau semeio i te tuhaa fenua o Zoana,
44 E i to ˈna faariroraa i te mau anavai o Nile ei toto+Ia ore ratou e inu i te pape i taua mau taheraa pape ra.
45 Tono atura oia i te aere raˈo no te patia ia ratou+E te rana no te tuino i to ratou fenua.+
46 Horoa ˈtura oia i ta ratou maa hotu na te mau vivi taehae,Te ohipa a to ratou rima na te mau aere vivi.+
47 Tuino atura oia i ta ratou mau tumu vine i te ûa paari+E ta ratou mau tumu sukamino i te ofai ûa paari.
48 Tuu atura oia i ta ratou mau animara i te ûa paari ra+E ta ratou mau nǎnǎ animara i te mau anapa uira ra.*
49 Faatupu ihora oia i to ˈna riri rahi i nia ia ratou,Te hae e te inoino e te ahoaho.Tono atura oia i te nuu melahi no te faatae mai i te ati.
50 Ua faaateatea oia i te hoê eˈa no to ˈna riri.
Aita oia i faaherehere ia ratou i te pohe.E ua tuu oia ia ratou* i te maˈi pee ra.
51 Haapohe ihora oia pauroa te tamarii matahiapo o Aiphiti,+Te haamataraa o to ratou puai faafanau i roto i te mau fare ie o Hama.
52 Faahaere atura oia i to ˈna nunaa i rapae i Aiphiti,+E aratai atura ia ratou mai te hoê nǎnǎ mamoe na roto i te medebara.
53 Ua aratai oia ia ratou ma te ati ore,E aita ratou i mǎtaˈu aˈe.+Ua tapoˈi te miti i to ratou mau enemi.+
54 E aratai atura oia ia ratou i to ˈna tuhaa fenua moˈa,+Teie tuhaa fenua mouˈa i noaa mai i to ˈna rima atau.+
55 Tiahi atura oia i te mau nunaa i mua ia ratou.+Tufa ˈtura oia i te tahi tuhaa ia ratou ra i te taura faito.+Haaparahi ihora oia i te mau opu o Iseraela i roto i to ratou mau fare.+
56 Ua tamau noa râ ratou i te aa* i te Atua Tei Teitei Roa ˈˈe e i te orure hau ia ˈna.+Aita ratou i haapao i ta ˈna mau haamanaˈoraa.+
57 Ua fariu ê atoa ratou e ua haavare mai to ratou mau tupuna.+
Ua riro ratou mai te hoê teˈa fefe, eita e nehenehe e tiaturi.+
58 Ua tamau ratou i te faainoino ia ˈna i to ratou mau vahi teitei,+E ua faariri ratou ia ˈna i ta ratou mau tii taraihia.+
59 Faaroo ihora te Atua e riri ihora oia,+Faarue roa ˈtura ïa oia ia Iseraela.
60 Faarue atura ïa oia i te sekene i Silo,+Te tiahapa i reira oia i te parahiraa i rotopu i te taata.+
61 Ua vaiiho oia ia ravehia te Afata e to ˈna mau enemi.+Ua vaiiho oia ia ratou ia rave i te taipe o to ˈna puai e to ˈna hanahana.
62 Ua vaiiho oia ia pohe to ˈna nunaa i te ˈoˈe,+E ua riri oia i ta ˈna tuhaa tutuuhia.
63 Ua pau to ˈna mau tane apî i te auahi,E aita e himene faaipoiporaa i himenehia no ta ˈna mau tamahine apî.*
64 Ua pohe ta ˈna mau tahuˈa i te ˈoˈe,+E aita ta ratou mau vahine ivi i taˈi.+
65 Ara maira Iehova mai te mea ra ua taoto oia,+Mai te hoê aito+ o te ara mai ra i muri aˈe i to ˈna inu-rahi-raa i te uaina.
66 Ua tairi oia i to ˈna mau enemi a horo ê ai ratou.+Ua tuu oia i te haama ia ratou ra e a muri noa ˈtu.
67 Ua faarue oia i te utuafare o Iosepha.Aita oia i maiti i te opu o Epheraima.
68 Ua maiti râ oia i te opu o Iuda,+Te mouˈa Ziona, o tei hinaarohia e ana.+
69 Ua hamani oia i to ˈna nao* ia vai maoro mai te mau raˈi,+Mai te fenua o ta ˈna i haamau e a muri noa ˈtu.+
70 Ua maiti oia i ta ˈna tavini ra ia Davida+E ua rave mai oia ia ˈna mai roto mai i te mau aua mamoe,+
71 A haapao noa ˈi oia i te mau mamoe ufa e horoa ra i te û na ta ratou mau fanauˈa.Ua faariro oia ia ˈna ei tiai mamoe i nia ia Iakoba, to ˈna nunaa,+E i nia ia Iseraela, ta ˈna tuhaa tutuuhia.+
72 Ua aupuru oia* ia ratou ma te aau haavare ore,+E ua aratai oia ia ratou ma te rima aravihi.+
Nota i raro i te api
^ Aore ra “haapiiraa.”
^ Heb: “o tei ore i ineine.”
^ Heb: “tamata.”
^ Aore ra “a te mau melahi.”
^ Aore ra “Tei tahoo.”
^ Heb: “tapoˈi.”
^ Heb: “rima.”
^ Heb: “hoo mai ai.”
^ Huri-atoa-hia “i te fiva rahi ra.”
^ Heb: “i to ratou ora.”
^ Heb: “tamata.”
^ Heb: “aita i taoto aˈenei i te tane.”
^ Oia hoi Davida.
