Te Sire a Solomona 1:1-17
-
Te himene o te mau himene (1)
-
Te vahine apî (2-7)
-
Te mau tamahine o Ierusalema (8)
-
Te arii (9-11)
-
“E hamani matou na oe i te faaunauna auro” (11)
-
-
Te vahine apî (12-14)
-
“No ˈu, e au ta ˈu here i te puohu mura noˈanoˈa” (13)
-
-
Te tiai mamoe (15)
-
“Mea nehenehe mau â oe, ta ˈu here”
-
-
Te vahine apî (16, 17)
-
‘Mea nehenehe oe, ta ˈu here’ (16)
-
1 Te himene o te mau himene,* na Solomona:+
2 “Apa mai ia ˈu, apa mai ia ˈu i to oe vaha,Mea au aˈe hoi to oe herehereraa mai i te uaina.+
3 Mea au mau te noˈanoˈa o ta oe monoˈi.+
E au to oe iˈoa i te monoˈi noˈanoˈa te niniihia.+No reira te mau vahine apî e here ai ia oe.
4 A rave ia ˈu ia oe ra,* e horo anaˈe.
Ua aratai te arii ia ˈu i roto i to ˈna mau piha!
E oaoa anaˈe e e popou anaˈe tâua.
E arue* anaˈe i to oe herehereraa mai hau aˈe i te uaina.
Ua tano iho â ratou* i te hereraa ia oe.
5 Mea maereere* au, mea haviti râ, e te mau tamahine o Ierusalema e,Mai te mau fare ie no Kedara,+ mai te mau ie o te mau fare ie+ o Solomona.
6 Eiaha e hiˈo noa mai ia ˈu no to ˈu ravarava,No te mea ua tamau te mahana i te hiˈo ia ˈu.
Ua riri te mau tamaiti a to ˈu metua vahine ia ˈu.Ua tono ratou ia ˈu e tiai i te mau faaapu vine,Aita râ vau i tiai i ta ˈu iho faaapu vine.
7 A parau mai, o oe ta ˈu* e here roa nei,Ihea oe e aratai ai i ta oe mau mamoe,+Ihea oe e faataoto ai ia ratou i te avatea.
Eaha vau e riro ai mai te hoê vahine puohuhia i te puroˈu*I rotopu i te mau nǎnǎ mamoe a to oe mau hoa?”
8 “Aita anaˈe oe i ite, e te vahine nehenehe roa ˈˈe,A haere a imi i te nǎnǎE a aratai i ta oe mau fanauˈa puaaniho e amu i te aihere i pihai iho i te fare ie o te mau tiai.”
9 “E faahohoˈa vau ia oe, e ta ˈu here, i te hoê* puaahorofenua nehenehe i rotopu i te mau pereoo a Pharao.+
10 Mea nehenehe to oe papariˈa i te faaunauna,*To oe aˈî i te anairaa poe.
11 E hamani matou na oe i te faaunauna* auroE poe ario to nia iho.”
12 “A parahi ai te arii i to ˈna amuraa maa menemene,Mâˈi ihora te noˈanoˈa+ o ta ˈu monoˈi.*
13 No ˈu, e au ta ˈu here i te puohu mura noˈanoˈa+Ta ˈu e tuu i nia i to ˈu ouma i te po.
14 No ˈu, e au ta ˈu here i te pupa tiare kaphara+I rotopu i te mau faaapu vine no Ene-gedi.+
15 “Mea nehenehe mau â oe, ta ˈu here.
Mea nehenehe mau â oe. E au to oe mata i to te uupa.”+
16 “A hiˈo na, mea nehenehe oe e te haviti, ta ˈu here.+
O te mau rauere to tâua roˈi.
17 E arezi te mau raau tarava o to tâua fare,*E berusi te aroaro o to tâua fare.
Nota i raro i te api
^ Aore ra “Te himene nehenehe roa ˈˈe.”
^ Heb: “A huti ia ˈu na muri ia oe.”
^ Aore ra “faatia.”
^ Oia hoi te mau vahine apî.
^ Heb: “ereere.”
^ Aore ra “puroˈu oto.”
^ Aore ra “ta ˈu.”
^ Huri-atoa-hia “i rotopu i te rouru firihia.”
^ Aore ra “taoˈa menemene.”
^ Heb: “naradi.”
^ Aore ra “fare nehenehe.”
