Te mau tavana 12:1-15
12 Titauhia aˈera te mau taata o Epheraima, e na roto aˈera ratou i te anavai no te haere i Zaphona* e parau maira ia Iepheta: “Eaha oe i ore ai i titau ia matou ia haere na muri ia oe i te tahi atu pae e aro i te ati Amona?+ E tanina matou i to oe fare o oe atoa i roto.”
2 Na ô atura râ Iepheta ia ratou: “E tamaˈi rahi ta matou to ˈu mau taata i te ati Amona. Ua titau vau ia outou ia tauturu mai, aita râ outou i faaora ia ˈu i to ratou rima.
3 I to ˈu iteraa e eita outou e faaora ia ˈu, faaoti ihora vau e faaruru i te pohe e haere atura e aro i te ati Amona,+ e tuu maira Iehova ia ratou i to ˈu rima. Eaha ïa outou i haere mai ai i teie mahana e aro ia ˈu?”
4 Haaputuputu ihora Iepheta i te mau taata atoa o Gileada,+ e aro aˈera ratou ia Epheraima. Pau ihora o Epheraima i to Gileada mau taata. I parau na Epheraima: “E feia noa outou tei horo ê ia Epheraima, outou te ati Gileada i Epheraima e Manase.”
5 Haru ihora Gileada i te mau vahi papaˈu o Ioridana+ na mua ˈˈe ia Epheraima. E ia tamata to Epheraima mau taata i te horo ê, e parau ratou: “A vaiiho ia ˈu ia haere i te tahi atu pae,” e ui ïa to Gileada mau taata i te taata tataitahi: “E ati Epheraima oe?” Ia pahono oia: “Eita!,”
6 e parau ratou ia ˈna: “A parau na Hiboleta.” E parau râ oia: “Siboleta,” eita hoi e haere ia ˈna ia parau “Hiboleta.” E haru ïa ratou ia ˈna a taparahi pohe atu ai ia ˈna i te mau vahi papaˈu o Ioridana. E 42 000 ïa ati Epheraima tei pohe i tera taime.
7 Ua tavana Iepheta i nia ia Iseraela e ono matahiti. I muri iho, pohe ihora Iepheta ati Gileada e hunahia ihora oia i to ˈna oire i Gileada.
8 Tavana ihora Ibezana no Betelehema i nia ia Iseraela i muri mai ia ˈna.+
9 E 30 tamaiti ta ˈna e e 30 tamahine. Horoa faaipoipo ihora oia i ta ˈna mau tamahine i te tane no rapae i to ˈna opu, e hopoi maira oia e 30 vahine no te faaipoipo i ta ˈna mau tamaiti. Ua tavana oia i nia ia Iseraela e hitu matahiti.
10 Pohe ihora Ibezana e hunahia ihora oia i Betelehema.
11 I muri mai ia ˈna, tavana ihora Elona ati Zebuluna i nia ia Iseraela. Ua tavana oia i nia ia Iseraela hoê ahuru matahiti.
12 Pohe ihora Elona ati Zebuluna e hunahia ihora oia i Aialona i te fenua o Zebuluna.
13 I muri mai ia ˈna, tavana ihora Abadona te tamaiti a Hilela ati Piratona i nia ia Iseraela.
14 E 40 tamaiti ta ˈna e e 30 mootua tamaroa tei na nia iho e 70 asini. Ua tavana oia i nia ia Iseraela e vaˈu matahiti.
15 Pohe ihora Abadona te tamaiti a Hilela ati Piratona e hunahia ihora oia i Piratona i te fenua o te opu o Epheraima i te mouˈa o te ati Amaleka.+
Nota i raro i te api
^ Huri-atoa-hia “i apatoerau.”