Te mau tavana 15:1-20
-
Tahooraa Samasona i te mau Philiseti (1-20)
15 I muri aˈe, i te mau mahana o te ootiraa sitona, haere ihora Samasona e hiˈo i ta ˈna vahine faaipoipo. Ua hopoi atoa oia i te tahi puaaniho apî. Na ô atura oia: “Te hinaaro ra vau e tomo i roto i te piha taotoraa* o ta ˈu vahine faaipoipo.” Aita râ to ˈna metua tane hoovai i faatia ia ˈna ia tomo.
2 Parau maira to ˈna metua tane hoovai: “Ua manaˈo vau: ‘Papu, mea hae iho â na oe ia ˈna.’+ Horoa ˈtura ïa vau ia ˈna na to taata apee.+ E ere anei mea nehenehe aˈe to ˈna teina ia ˈna? A rave na râ ia ˈna.”
3 Na ô atura râ Samasona: “I teie taime, eita vau e nehenehe e faahapahia e te mau Philiseti no te rave-ino-raa ia ratou.”
4 Haere atura ïa Samasona e haru ihora e 300 alope. Rave ihora oia i te rama, taamu tataipiti ihora i na alope na te aero, e tuu ihora hoê rama i ropu e piti aero.
5 Tutui ihora oia i na rama e tuu ihora i na alope na roto i te mau faaapu huero maa a te mau Philiseti. Tanina ihora oia pauroa, te ruru e te amaa huero maa, oia atoa te mau faaapu vine e te mau faaapu olive.
6 Ui aˈera te mau Philiseti: “Na vai i rave i teie ohipa?” Parauhia maira ratou: “Na Samasona, te hunoa a te taata no Timina, no te mea ua rave oia i ta ˈna vahine faaipoipo e ua horoa na to ˈna taata apee.”+ Pauma aˈera te mau Philiseti e tanina aˈera i tera vahine e to ˈna metua tane.+
7 Na ô atura Samasona ia ratou: “Tera aˈe ta outou raveraa, eita vau e faaea e ia tahoo roa vau ia outou.”+
8 Tairi ihora oia ia ratou te tahi i muri iho i te tahi i te hoê taparahiraa rahi.* Pou ihora oia i muri iho e faaea ihora i roto i te hoê ana* o te mato Etama.
9 I muri aˈe, pauma aˈera te mau Philiseti e puhapa ihora i Iuda e hahaere aˈera na Lehi.+
10 Parau atura to Iuda: “Eaha outou i pauma mai ai e aro ia matou?” Pahono maira ratou: “Ua pauma mai matou no te haru* ia Samasona, no te rave ia ˈna mai ta ˈna i rave ia matou.”
11 Pou ihora ïa e 3 000 taata o Iuda i te ana* o te mato Etama e parau atura ia Samasona: “Aita oe i ite e na te mau Philiseti e faatere ra ia tatou?+ Eaha ïa oe i na reira ˈi ia tatou?” Na ô maira oia ia ratou: “Mai ta ratou i rave ia ˈu, o ta ˈu ïa e rave ia ratou.”
12 Parau atura râ ratou ia ˈna: “Ua haere mai matou e haru* ia oe e e tuu ia oe i te mau Philiseti.” Na ô maira Samasona: “A horeo mai ia ˈu eita outou e rave ino ia ˈu.”
13 Parau atura ratou ia ˈna: “Eita, e taamu noa matou ia oe, a tuu atu ai ia oe ia ratou ra, eita râ matou e haapohe ia oe.”
Taamu aˈera ïa ratou ia ˈna i e piti taura apî e aratai aˈera ia ˈna i nia mai raro mai i te mato.
14 I to ˈna taeraa i Lehi, umere aˈera te mau Philiseti i te farereiraa ia ˈna. Haapuai maira te varua o Iehova ia ˈna,+ riro aˈera na taura i nia i to ˈna rima mai te taura lino tei paapaa i te auahi, e marua ihora na taura mai nia mai i to ˈna rima.+
15 Itehia maira ia ˈna te ivi taa o te tahi asini oni tei pohe aˈenei. Haru maira oia i taua ivi taa ra e haapohe ihora 1 000 taata i te reira.+
16 E na ô ihora Samasona:
“I te ivi taa o te tahi asini, hoê haapueraa, piti haapueraa!
I te ivi taa o te tahi asini i haapohe ai au 1 000 taata.”+
17 I muri iho i to ˈna paraparauraa, taora ihora oia i te ivi taa e topa ihora i taua vahi ra i te iˈoa Ramata-lehi.*+
18 Poihâ roa ihora oia. Tiaoro ihora oia ia Iehova e na ô atura: “Na oe i horoa mai i teie faaoraraa rahi i te rima o to tavini. Teie nei râ, ia pohe anei au no te poihâ, a topa ˈtu ai i roto i te rima o tei peritome-ore-hia?”
19 Haafatafata ihora ïa te Atua i te tahi apoo e vai ra i Lehi, e tahe maira te pape mai reira mai.+ I to ˈna inuraa i te pape, itoito faahou maira oia e oraora faahou maira. No reira oia i topa ˈi i taua vahi ra i te iˈoa o Ene-hakore,* i Lehi tae roa mai i teie mahana.
20 E ua tavana oia i nia ia Iseraela i te mau mahana o te mau Philiseti e 20 matahiti.+
Nota i raro i te api
^ Aore ra “to ˈna piha.”
^ Heb: “a apǎpǎ ˈi te avae na nia iho i te huha.”
^ Aore ra “afâ.”
^ Aore ra “taamu.”
^ Aore ra “afâ.”
^ Aore ra “taamu.”
^ “Vahi teitei o te taa” te auraa.
^ “Pape pihaa a tei tiaoro” te auraa.
